Hanes a TESOL (Dysgu Saesneg i Siaradwyr Ieithoedd Eraill) (gyda blwyddyn integredig yn astudio dramor)

Byddwch yn astudio hanes o’r cyfnod canoloesol i’r byd modern diweddar, gan edrych ar amrywiaeth o ffurfiau ar ymchwilio i hanes – o hanes cymdeithasol a gwleidyddol i’r economaidd a diwylliannol. Byddwch yn dysgu’r sgiliau sydd eu hangen ar haneswyr, megis asesu ffynonellau gwreiddiol, meistroli gweithiau eilradd a llunio dadansoddiadau o gymdeithasau’r gorffennol ar sail hanes. Ar yr un pryd, byddwch yn meithrin ystod o sgiliau cyfathrebu a fydd yn gweddu i’r elfennau TESOL yn y rhaglen ac yn eich helpu i ddysgu Saesneg i siaradwyr ieithoedd eraill.

Ymhlith y cyfleoedd i fyfyrwyr Hanes a TESOL yn Aberystwyth mae:

• cael profiad o addysgu arloesol sy’n seiliedig ar ymchwil yn yr Adran Hanes a Hanes Cymru, sydd â’r nod o ddatblygu eich sgiliau trosglwyddadwy mewn meysydd fel dadansoddi, dehongli, a chyfathrebu
• cael profiad o’r byd TESOL (a elwir hefyd yn TEFL) a’r cyfleoedd i deithio dramor y mae gyrfa ym maes TESOL yn ei chynnig
• cyfle i astudio dramor yn un o’n prifysgolion partner, i fynd ar leoliad gwaith ac i gynllunio ar gyfer eich gyrfa yn y dyfodol
• manteisio ar ein perthynas gydweithredol unigryw â Chanolfan y Celfyddydau Aberystwyth – un o’r cyfleusterau ar y campws sy’n adnodd gwych i staff a myfyrwyr y brifysgol – yn ogystal â mynediad llawn i Lyfrgell Genedlaethol Cymru.

Ein Staff

Mae staff yr Adran Hanes a Hanes Cymru yn ymchwilwyr gweithgar ac yn arbenigwyr yn eu meysydd Hanes. Mae’r mwyafrif wedi cymhwyso gyda PhD ac mae ganddynt TUAAU hefyd. I ganfod mwy am ein staff, ewch i’n tudalen staff yr adran.

Mae Cyflogadwyedd yn rhan annatod o’r cwrs gradd hwn. Drwy gydol y cwrs, byddwch yn ymwneud â’r dysgu mewn ffordd ymarferol, ar sail datrys problemau ac yn canolbwyntio ar sefyllfaoedd y byd go iawn. Bydd hyn yn rhoi’r cyfle ichi ddatblygu sgiliau cydweithio, arwain, a chreu tîm – sgiliau sy’n hanfodol mewn amrywiaeth o swyddi.