Technoleg Gwybodaeth Busnes

Wrth weld yr elfennau allweddol ar gyfer sicrhau busnes effeithlon, gan gynnwys dadansoddi systemau, cymwysiadau cronfeydd data, amgylchedd busnes, systemau e-fasnach ac e-fusnes, rhaglennu a chyfarpar y we, byddwch yn dysgu’n gyflym sut i ddadansoddi anghenion busnesau a’u trosi’n systemau busnes effeithiol.

Ar ôl cwblhau’r radd Technoleg Gwybodaeth Busnes yn llwyddiannus byddwch wedi meithrin y sgiliau a’r galluoedd craidd hanfodol y mae galw mawr amdanynt ymhlith cyflogwyr yn y maes hwn.

Dyma rai o’r cyfleoedd sydd ar gael i fyfyrwyr Technoleg Gwybodaeth Busnes (gyda blwyddyn sylfaen integredig) yn Aberystwyth:

• defnyddio labordai sy’n cael eu diweddaru’n rheolaidd ac ynddynt ystod lawn o adnoddau cyfrifiadureg gan gynnwys Windows, Linux a MacOS.
• cael eich dysgu gan ddarlithwyr sydd â chysylltiadau agos â diwydiant a chynadleddau peirianneg meddalwedd
• dilyn modiwlau ar brosesau busnes, llunio gwefannau, HCI, ac e-fasnach.

Ein Staff

Mae gan bron bob un o ddarlithwyr yr Adran Cyfrifiadureg gymwysterau hyd at safon PhD, ac mae gan y gweddill brofiad helaeth ym maes ymchwil neu ddiwydiant. Mae'n rhaid i bob darlithydd newydd ennill cymhwyster TUAAU, ac felly maent yn Gymrodyr Uwch neu'n Gymrodyr o'r Academi Addysg Uwch. Mae'r adran hefyd yn cyflogi nifer o staff arddangos a thiwtoriaid rhan amser a rhai arddangoswyr sy'n fyfyrwyr, wedi’u dewis o blith ein hisraddedigion a'n huwchraddedigion. Mae ein cymrodyr ymchwil a'n cynorthwywyr ymchwil (y rhan fwyaf ohonynt â gradd PhD) hefyd yn gwneud rhywfaint o waith dysgu o bryd i'w gilydd pan fo hynny'n briodol.

Mae gan ein graddedigion ddealltwriaeth dda o ofynion y byd masnachol o ran systemau cyfrifiadurol a ffordd broffesiynol o adeiladu’r systemau hynny o gydrannau safonol cronfeydd data, y we a meddalwedd swyddfa. Bydd y cynllun gradd hwn yn rhoi mantais ichi wrth wneud cais am swyddi sy’n gofyn am adeiladu systemau masnachol gan ddefnyddio gwahanol offer a blociau adeiladu, defnyddio dulliau dadansoddol i gyflwyno TG er mwyn datrys problemau busnes, darparu atebion masnachol sy’n defnyddio cronfeydd data a’r we, a darparu cymorth i ddefnyddwyr TG.