Cyfathrebu Di-wifr a Pheirianneg Systemau Amleddau Radio

Bydd y cwrs gradd Meistr unflwydd llawn-amser hwn yn ehangu'ch gwybodaeth ddamcaniaethol ac yn datblygu'ch sgiliau technegol, ymarferol a dadansoddol i fanteisio ar botensial technolegau'r sbectrwm radio sy'n hanfodol i gynnal economi fodern. Nod y cwrs hwn, a gaiff ei addysgu gan staff sy’n weithgar ym maes ymchwil ac arbenigwyr yn y diwydiant, yw datblygu a gwella sgiliau graddedigion a gweithwyr proffesiynol sydd eisoes yn gweithio yn sector y sbectrwm radio.

Mae'r radd MSc mewn Cyfathrebu Di-wifr a Pheirianneg Systemau Amleddau Radio yn ategu strategaeth Canolfan Sbectrwm Cenedlaethol y DU i ddod â'r byd academaidd, y llywodraeth a diwydiant ynghyd o fewn ecosystem sy’n arloesi â'r sbectrwm.

Ar y cwrs hwn, byddwch yn datblygu arbenigedd mewn meddalwedd, caledwedd a theori peirianneg y sbectrwm radio i fodloni'r galw cynyddol am beirianwyr medrus mewn diwydiannau megis cyfathrebu, y gofod, awyrofod a’r diwydiant modurol. Byddwch yn ymchwilio i bwysigrwydd rheoli sbectrwm electromagnetig cynyddol orlawn, sy'n dibynnu fwyfwy ar ddatblygiadau mewn technoleg synhwyro o bell, systemau awtonomaidd a deunydd newydd i fodloni'r galw.

Byddwch yn cydweithio ag ymchwilwyr a pheirianwyr y sbectrwm radio er mwyn cael hyfforddiant ar waith arloesi, ymchwil a datblygu a seilir ar y sbectrwm. Cewch gyfle i astudio amrywiaeth o bynciau arbenigol megis radar, synwyryddion ac offer gan ddefnyddio ymagweddau damcaniaethol yn ogystal â gwaith ymarferol a fydd yn cael eu harwain gan ymchwil. Bydd prosiect ymchwil, a fydd â chyswllt cryf â gofynion y diwydiant a phynciau ymchwil cyfredol, yn rhoi modd i chi ddatblygu sgiliau ehangach mewn ymchwil, cyfathrebu a chyflogadwyedd er mwyn rhoi hwb i chi i’ch helpu i fynd ymlaen i'r diwydiant neu i ymchwil academaidd bellach.

Y Ganolfan Sbectrwm Genedlaethol⁠ (CSG)

Mae'r Ganolfan Sbectrwm Genedlaethol (CSG) ym Mhrifysgol Aberystwyth yn cynnig cyfle unigryw i ymdrin â materion darpariaeth y sbectrwm radio, wrth i'r galw dyfu'n aruthrol am ddyfeisiadau newydd megis cerbydau awtonomaidd ar y tir, ar y môr ac yn yr awyr, ffermio deallus, y Rhwydwaith Pethau, 5G, a monitro iechyd yn ddigidol. Mae’r Ganolfan yn galluogi nodi, datblygu ac arddangos y technolegau galluogi sydd eu hangen er mwyn sicrhau, ehangu a manteisio i'r eithaf ar y gwerth a ddaw yn sgil hynny i’r Brydain Ddigidol trwy ddefnyddio'r sbectrwm electromagnetig a hyfforddi’r genhedlaeth nesaf o beirianwyr.

Math o radd: Msc

Cod y Cwrs: F935

Amser cyswllt: Tua 10-14 awr yr wythnos yn y ddau semester cyntaf, yna cytunir ar y cyd ar amser cyswllt â goruchwyliwr penodedig.

Ar ôl cwblhau'r cwrs hwn fe fyddwch wedi cael gwybodaeth a dealltwriaeth uwch am y sbectrwm radio ac am electromagnetedd a sut y'i defnyddir wrth ledaenu a synhwyro tonnau radio. Byddwch yn gallu ymdrin â phroblemau cymhleth ym maes radio a'r defnydd a wneir ohoni, gyda chymorth pecynnau cyfrifiadurol, ac fe fyddwch wedi meithrin sgiliau ychwanegol mewn dadansoddi beirniadol a dehongli data, yn ogystal â sut mae cyfleu'ch canfyddiadau ar lafar ac mewn adroddiadau ysgrifenedig.

Bydd graddedigion y radd Meistr hon mewn sefyllfa dda i symud ymlaen i weithio fel peirianwyr, technegwyr, ymgynghorwyr, ymchwilwyr, a rheolwyr.

Dulliau addysgu

Cyflwynir y radd MSc Cyfathrebu Di-wifr a Pheirianneg Systemau Amleddau Radio trwy gyfuniad o ddarlithoedd, prosiectau a gweithdai ymarferol.

Yn ystod y ddau semester cyntaf (Medi i Fai), bydd gennych fel arfer un seminar 2-3 awr fesul modiwl yr wythnos. Bydd sesiynau ychwanegol hefyd yn gweithio tuag at ddatblygu eich prosiect. Yn ystod semester tri byddwch yn derbyn cefnogaeth gan eich arolygydd prosiect penodedig; cytunir ar yr amser cyswllt ar y cyd.

Dulliau Asesu

Asesir y cwrs trwy ymarferion gweithdy, enghreifftiau, adroddiadau technegol, adroddiadau ffurfiol, cyflwyniadau ac arholiadau.