Y Gyfraith

Mae Adran y Gyfraith a Throseddeg bob amser yn awyddus i groesawu myfyrwyr ymchwil, sy'n gwneud cyfraniad pwysig i'r Adran a'r Brifysgol. Mae'r Adran yn ymfalchïo yn safon uchel yr arolygiaeth a ddarperir i fyfyrwyr uwchraddedig. Fe welwch fod gan eich arolygydd ddiddordeb brwd yn eich cynnydd, a'i fod bob amser wrth law i gynnig anogaeth, arweiniad a chyngor.

Yn y blynyddoedd diwethaf mae llawer o fyfyrwyr uwchraddedig o Adran y Gyfraith a Throseddeg wedi cyhoeddi eu hymchwil ar ffurf llyfrau ac erthyglau, ac mae aelodau staff bob amser yn hapus i roi cyngor i fyfyrwyr ar gyhoeddi. Bu sawl cyhoeddiad hefyd o ganlyniad i brosiectau ymchwil ar y cyd rhwng staff ac uwchraddedigion.

Hyfforddiant Ymchwil

Darperir Hyfforddiant Ymchwil i bob myfyriwr ymchwil uwchraddedig, ac mae'n ofyniad sefydliadol bod hyfforddiant priodol yn cael ei ddarparu i fyfyrwyr ymchwil yn unol â gofynion naill ai'r ESRC neu Fwrdd Ymchwil y Celfyddydau a'r Dyniaethau (AHRB), yn dibynnu ar bwnc a methodoleg eich prosiect ymchwil.

Gofynion ar gyfer Cwblhau'r PhD

Mae gradd PhD yn gofyn am draethawd ymchwil sylweddol o tua 80,000-100,000 o eiriau. Bydd y traethawd ymchwil yn cael ei ysgrifennu o dan arolygiaeth aelod o staff yr Adran. Bydd y rhai sy'n astudio'n llawn amser hefyd yn dilyn cwrs ar sgiliau ymchwil a strategaeth i'w cynorthwyo i ennill y sgiliau sydd eu hangen ar gyfer ymchwil gyfreithiol academaidd. Os yw eich prosiect ymchwil yn dod o fewn maes astudiaethau cymdeithasol-gyfreithiol neu droseddeg, bydd gofyn i chi gwblhau Rhaglen Hyfforddiant Ymchwil y Gyfadran a gymeradwywyd gan ESRC. Gwneir hyn yn eich blwyddyn gyntaf o astudio am PhD ac mae'n darparu hyfforddiant ar fethodoleg ymchwil feintiol ac ansoddol ac anghenion ymchwil y gwyddorau cymdeithasol. 

PhD

Dyfernir PhD ar ôl cwblhau traethawd ymchwil boddhaol o tua 80,000-100,000 o eiriau ac yna arholiad viva voce. Tair blynedd yw'r cyfnod cofrestru arferol (amser-llawn) a disgwylir y bydd y traethawd hir yn cael ei gyflwyno ymhen pedair blynedd ar ôl cofrestru. Treulir rhan o'r flwyddyn gyntaf yn ymgymryd â hyfforddiant ymchwil, gan adael yr ail a'r drydedd flwyddyn i chi wneud ymchwil amser-llawn i'r pwnc o'ch dewis.

Mae PhD yn eich galluogi i arbenigo yn y pwnc o’ch dewis ac i archwilio cymhlethdodau eich pwnc, boed hynny ym maes y gyfraith neu droseddeg, yn ei gyd-destun. Er mwyn bodloni'r arholwyr, mae’n rhaid i chi ddangos gwreiddioldeb meddwl yn ogystal â dadansoddiad manwl. Ystyrir PhD yn gam sylweddol mewn gyrfaoedd academaidd neu yrfaoedd sy'n ymwneud â'r byd academaidd. Mae'n dangos eich bod yn gallu cyflawni ymchwil manwl a chyflwyno canlyniadau'r ymchwil hwnnw mewn ffordd ddealladwy. 

DProf

Mae’r Ddoethuriaeth Broffesiynol, neu DProf, yn fwy addas i'r rhai sy'n dilyn gyrfaoedd proffesiynol yn hytrach na gyrfaoedd academaidd, a'i nod yw rhoi cyfle i weithwyr proffesiynol cymwys i astudio tuag at ddoethuriaeth tra byddant yn parhau â'u gwaith cyflogedig. Dyfernir DProf i gydnabod bod unigolyn wedi llwyddo i gwblhau rhaglen astudio gymeradwy a addysgir, ynghyd â darn o waith ymchwil uwch. Mae’r elfen gydweithredol a ddarperir gan brosiect sy’n seiliedig ar waith ymarferol yn rhoi cyfle delfrydol i ymgorffori'r wybodaeth newydd yn y gweithle a sicrhau bod eich ymchwil yn berthnasol i'ch sector.