Y Gyfraith

MPhil

Cynlluniwyd yr MPhil ar gyfer y rhai sy'n dymuno gwneud ymchwil mewn maes penodol o ddiddordeb cyfreithiol dan arweiniad arbenigol un o aelodau staff yr Adran.

Gofynion ar gyfer Cwblhau'r MPhil

Bydd gofyn i chi gwblhau traethawd ymchwil o tua 60,000 o eiriau. Byddwch yn cysylltu'n rheolaidd â'ch arolygydd, a fydd yn cynghori ac yn rhoi arweiniad ar y prosiect. Bydd y rhai sy'n astudio'r radd yn llawn amser hefyd yn dilyn cwrs byr ar hyfforddiant ymchwil i'w cynorthwyo i ddatblygu sgiliau ymchwil priodol.

Y Cyfnod Astudio ar gyfer yr MPhil

Y cyfnod cofrestru arferol ar gyfer myfyriwr amser llawn yw 12 mis, a dylech chi dreulio’r cyfnod hwnnw yn Aberystwyth. Y cyfnod cofrestru arferol ar gyfer myfyriwr rhan-amser yw dwy flynedd. Nid oes angen i'r rhai sy'n astudio'n rhan-amser fyw yn Aberystwyth yn ystod y cyfnod hwn.

Gradd Meistr drwy Ymchwil

Yn Aberystwyth, gallwch gofrestru ar gyfer MPhil neu LLM (Ymchwil). Nid oes gwahaniaeth rhwng y cymwysterau hyn. Mae'r rhan fwyaf o fyfyrwyr yn cofrestru ar gyfer yr MPhil, sy'n cael ei gydnabod yn y DU fel cymhwyster ymchwil, tra bod yr LLM fel arfer yn cael ei neilltuo ar gyfer rhaglenni Meistr a addysgir. Fodd bynnag, mae’n well gan rai myfyrwyr tramor dderbyn LLM gan fod y teitl yn dynodi’n glir mai gradd yn y gyfraith ydyw. Yn y naill achos neu'r llall, gallwch gofrestru am flwyddyn i lunio traethawd ymchwil o tua 50,000-60,000 o eiriau. Byddwch yn gweithio o dan gyfarwyddyd un neu fwy o arolygwyr, ond ni fydd angen i chi fynd i unrhyw ddosbarthiadau. Ar ôl y flwyddyn yn Aberystwyth mae gennych hyd at ddwy flynedd i ysgrifennu'ch traethawd ymchwil.

Mae astudio ar gyfer Meistr Ymchwil yn cynnig llawer o’r un pethau sy’n denu pobl i astudio am PhD. Byddai’n anghywir, fodd bynnag, i feddwl am draethawd hir Meistr fel PhD byr. Dylai traethawd ymchwil Meistr ddarparu trosolwg a beirniadaeth fanwl o unrhyw faes o’r gyfraith ond ni fwriedir iddo ddarparu dadansoddiad manwl yn yr un modd â PhD. Prif fantais y radd Meistr Ymchwil, felly, yw ei bod yn eich galluogi i gwblhau darn o ymchwil a chael cymhwyster amdano mewn cyfnod cymharol fyr.

Mae Adran y Gyfraith a Throseddeg wedi ymrwymo i bolisi o arloesi a datblygu mewn addysgu ac ymchwil ac mae’n adolygu’n rheolaidd ystod a chynnwys ei chynlluniau gradd, yn ogystal â’i dulliau addysgu ac asesu, er mwyn ymateb yn effeithiol i anghenion ac i ddisgwyliadau ein myfyrwyr.

Nod Adran y Gyfraith a Throseddeg yw sicrhau'r dewis gorau posibl o ran ei darpariaeth o addysg gyfreithiol a throseddegol wrth sicrhau bod yr addysgu yn cael ei lywio gan ysgolheictod cyfoes ar y lefel uchaf.