Arloesi Bwyd-Amaeth

Bydd y cwrs hwn yn rhoi ichi’r sgiliau technegol a’r sgiliau cyfathrebu sydd eu hangen i sbarduno arloesedd ac arwain newid. Bydd y modiwlau dewisol yn eich galluogi i graffu'n fanylach ar agweddau penodol ar y gadwyn gyflenwi a/neu ehangu eich ystod o sgiliau cyfathrebu. Byddwch hefyd yn datblygu sgiliau ymchwil a'u rhoi ar waith drwy gynnal prosiect ymchwil sy’n seiliedig ar waith. 

Mae'r cwrs unigryw hwn yn darparu amrywiaeth o ddewisiadau mewn sgiliau cyfathrebu, y gwyddorau, a byd busnes. Bydd y modiwlau dysgu o bell yn cael eu darparu gan ddwy adran academaidd ym Mhrifysgol Aberystwyth, sef IBERS ac Ysgol Fusnes Aberystwyth. Bydd y sesiynau gweithdy ymarferol yn cael eu darparu gan Menter a Busnes, cwmni o Gymru sy'n arbenigo mewn cyfnewid gwybodaeth amaethyddol. 

Gellir astudio’r modiwlau fel rhan o’ch datblygiad proffesiynol parhaus neu o ran eich diddordeb eich hun, neu gellir eu cyfuno tuag at gymhwyster uwchraddedig. I gwblhau Tystysgrif Uwchraddedig rhan-amser ni allwch dreulio mwy na dwy flynedd. I gwblhau'r MSc llawn gallwch gymryd hyd at bum mlynedd. 

Derbynnir myfyrwyr ar y cwrs hwn dair gwaith y flwyddyn (mis Ionawr, mis Mai a mis Medi). Croesewir ceisiadau trwy gydol y flwyddyn. 

Ffioedd y Cwrs: 

Gweler y dudalen wybodaeth ynghylch ffioedd

Mae’r rhan fwyaf o’r bobl sy’n dilyn y cwrs hwn eisoes yn gweithio yn y sector bwyd-amaeth ac yn ystyried bod y cwrs yn ffordd o ddiweddaru a gwella eu gwybodaeth dechnegol wrth hefyd wella eu sgiliau cyfathrebu a gweithio tuag at gymhwyster. Mae hefyd yn gam delfrydol i'r rhai sydd eisiau mynd ymlaen i weithio yn y sector hwn. 

Sut byddaf i'n dysgu? 

Mae'r holl fodiwlau a ddarperir gan IBERS yn cael eu cynnal drwy gyfrwng dysgu o bell ar-lein. Mae pob modiwl ar-lein yn cynnwys darlithoedd wedi'u recordio gan academyddion ac arbenigwyr yn y diwydiant, yn ogystal â chyflwyniadau, podlediadau, projectau e-grŵp, darlleniadau dan arweiniad, gwerslyfrau rhyngweithiol a fforymau trafod, yn ogystal ag aseiniadau ac e-diwtorialau. Mae modiwlau Ysgol Fusnes Aberystwyth yn cael eu cyflwyno drwy weithdai. Mae'r modiwlau a seilir ar weithdai yn cynnwys dau weithdy deuddydd ac un sesiwn derfynol undydd. 

Disgwylir i fyfyriwr uwchraddedig astudio am 200 awr wrth ddilyn modiwl 20 credyd. Dylech ddisgwyl treulio 2-3 awr yr wythnos yn fras ar ddarlithoedd, cyflwyniadau a phodlediadau ar-lein, a gweddill yr amser ar ddarllen ac aseiniadau. Po fwya'r amser a'r ymdrech y gallwch eu rhoi, mwyaf yn y byd y byddwch yn elwa o astudio'r modiwl, a bydd eich graddau yn debygol o fod yn well.  

Sut fydda i’n cael fy asesu? 

Nid oes arholiadau yn rhan o’r rhaglen hon. Caiff y modiwlau a addysgir eu hasesu drwy waith cwrs (sef adroddiadau a thraethodau, ond hefyd adolygiadau o destunau perthnasol, astudiaethau achos, cynigion ymchwil a thasgau dadansoddi data), aseiniadau ar-lein, cyflwyniadau a fforymau trafod. Fel rheol mae'r modiwlau sy’n seiliedig ar weithdai yn cynnwys dylunio tasg ymarferol a’i rhoi ar waith yn rhan o'r asesiadau.