Amaethyddiaeth

Prifysgol Aberystwyth yw'r lle delfrydol i ddilyn gradd ymchwil mewn amaethyddiaeth. Mae ffermydd y brifysgol sydd wedi'u lleoli yng Ngogerddan (fferm ddefaid a chig eidion), Morfa Mawr (cynhyrchu âr), Trawsgoed (fferm laeth) a Phwllpeiran (ucheldir) yn ymestyn i gyfanswm o dros 800 hectar, ac yn amrywio o 0-600 metr uwchlaw lefel y môr.

Rhyngddynt, mae'r pedwar safle hyn yn manteisio ar ddaearyddiaeth Gorllewin Cymru i ddarparu sbectrwm o heriau amgylcheddol sy'n cynrychioli'n fras yr amodau tyfu ar gyfer tua 80% o laswelltiroedd y DU. Mae ein mentrau yn cynnwys diadelloedd o ddefaid masnachol ac o dras, buches odro sy’n cael eu godro’n robotig, uned amnewid heffrod godro, uned besgi cig eidion, a chynhyrchu âr sy'n canolbwyntio ar borthiant cartref gan gynnwys haidd, gwenith, ceirch a bysedd y blaidd.  

Mae ein rhaglenni bridio cnydau a glaswellt yn cael eu cydnabod yn rhyngwladol ac yn chwarae rhan bwysig wrth lunio cynhyrchu amaethyddol yn y DU ac yn rhyngwladol drwy ddatblygu glaswellt porthiant uchel eu siwgr, cnydau protein porthiant meillion gwyn a choch ac mae 65% o'r holl geirch yn y DU yn dod o fathau a ddatblygwyd yn Aberystwyth. 

Prifysgol Aberystwyth sy’n cynnal yr Arolwg o Fusnesau Ffermio blynyddol yng Nghymru ar ran Llywodraeth Cymru. Yr arolwg yw'r ffynhonnell fwyaf awdurdodol o wybodaeth ariannol am fusnesau ffermio, ac mae'n casglu data ariannol a ffisegol o tua 600 o ffermydd sy'n cael ei ddefnyddio gan wneuthurwyr polisi ac ymchwilwyr i asesu'r economaidd sy'n effeithio ar ffermio yng Nghymru.

Mae Prifysgol Aberystwyth yn gartref i Ganolfan a Labordai Milfeddygol1, cyfleuster ymchwil i iechyd anifeiliaid sy'n canolbwyntio ar dwbercwlosis buchol, a Chanolfan Barrett ar gyfer Rheoli Llyngyr, canolfan ymchwil rhyngddisgyblaethol sy'n arwain y frwydr yn erbyn clefydau a achosir gan lyngyr mewn da byw, megis haint llyngyr yr iau/afu.