Cysylltiadau Rhyngwladol

Rydym yn cynnig addysgu o ansawdd uchel i fyfyrwyr ar ystod eang o fodiwlau (tua ugain i ddewis ohonynt ym mlynyddoedd 2 a 3), amgylchedd sy'n ysgogol yn ddeallusol ond yn gyfeillgar, ac ymdeimlad gwirioneddol o gymuned. Ar y cwrs hwn, byddwch yn dysgu am y cysyniadau, y polisïau a'r hanesion sy'n rhan o gysylltiadau rhyngwladol fel disgyblaeth. Byddwch yn dysgu sut i asesu digwyddiadau byd-eang o amrywiaeth o safbwyntiau ac i edrych ‘y tu ôl i’r penawdau’ i ddarganfod y ddeinameg ddyfnach sy’n gyrru gweithredoedd gwledydd, arweinwyr ac ymgyrchwyr. Gallwch astudio deinameg wleidyddol megis cenedlaetholdeb neu'r economi fyd-eang, dysgu am ddatblygiad a gwaddolion trefedigaethol, ystyried safbwyntiau gwahanol fel rhyddfrydiaeth neu rywedd, neu ddadansoddi problemau diogelwch allweddol. Yn ogystal, cewch gyfle i astudio sefydliadau rhyngwladol neu ranbarthau megis y Dwyrain Canol, Affrica neu gyfandiroedd America.    

Yn ogystal â mireinio eich sgiliau academaidd, bydd ein modiwlau yn rhoi ichi’r wybodaeth y bydd ei hangen arnoch ar gyfer bywyd ar ôl y Brifysgol, megis ysgrifennu blogiau a briffiau polisi, rhoi cyflwyniadau a defnyddio eich creadigrwydd i ddatrys problemau. Rydym hyd yn oed yn cynnal modiwlau efelychu chwarae rôl bob blwyddyn sy'n datblygu sgiliau negodi, perswadio, cydweithredu a gweithio mewn tîm. Mae gan ein graddedigion yrfaoedd mewn ystod eang o feysydd, megis diplomyddiaeth, newyddiaduraeth, neu weithio i bleidiau gwleidyddol, cyrff anllywodraethol neu sefydliadau rhyngwladol fel y Cenhedloedd Unedig, yn ogystal â dilyn llwybrau i raddedigion ym maes busnes, diwydiant, addysg a'r sector cyhoeddus.   

Cyfleoedd - Gall myfyrwyr Gwleidyddiaeth a Chysylltiadau Rhyngwladol yn Aberystwyth wneud y canlynol:

• Ymuno â'n 'Gemau Argyfwng' enwog – ymarfer chwarae rôl mewn symudiadau gwleidyddol a diplomyddol a gynhelir dros 3 diwrnod, ac un o uchafbwyntiau’r cwrs.
• Gwneud cais am le ar ein Cynllun Lleoliadau Seneddol, interniaeth chwe wythnos o hyd ar gyfer myfyrwyr yn yr ail flwyddyn i weithio ochr yn ochr ag Aelod Seneddol yn San Steffan neu Aelod o’r Senedd yng Nghaerdydd.
• Cymryd rhan yng ngweithgareddau'r Adran, fel y trafodaethau 'Bwrdd Crwn' rheolaidd ar ddigwyddiadau allweddol ledled y byd, gweithgareddau'r Gymdeithas Gwleidyddiaeth Ryngwladol, y cyfnodolyn myfyrwyr Interstate a'n nosweithiau cwis a phitsa poblogaidd.    

Ein Staff

Mae pob un o ddarlithwyr yr Adran Gwleidyddiaeth Ryngwladol yn ymchwilwyr gweithgar ac mae ganddynt gymwysterau hyd at safon PhD, ac mae gan y rhan fwyaf hefyd TUAAU.

Mae Cyflogadwyedd wedi’i wreiddio yn ein holl gyrsiau. Mae ein graddau’n darparu sylfaen gadarn i amrywiaeth fawr o yrfaoedd ar draws ystod o sectorau. Mae ein graddedigion yn hyblyg ac yn gallu dibynnu ar set o sgiliau trosglwyddadwy mewn economi fyd-eang sy’n newid yn gyflym, sy’n sicrhau bod galw mawr amdanynt. 

Mae'r setiau o sgiliau yn cynnwys: 

• sgiliau datrys problemau a meddwl creadigol effeithiol 
• sgiliau technoleg gwybodaeth 
• gallu gweithio'n annibynnol ac yn aelod o dîm 
• sgiliau rheoli amser a threfnu 
• sgiliau cyfathrebu da, yn ysgrifenedig ac ar lafar 
• hunanddibyniaeth a'r gallu i’ch ysgogi eich hun 

Pa gyfleoedd sydd ar gael i mi ar ôl gorffen fy ngradd? 

Mae ein graddedigion wedi cael gwaith yn y meysydd canlynol: 

• y sector datblygu 
• gwleidyddiaeth leol a chenedlaethol 
• y Gwasanaeth Sifil 
• ymchwil ar ran y Llywodraeth 
• ymchwil cymdeithasol 
• y trydydd sector, e.e. cyrff anllywodraethol 
• sefydliadau rhyngwladol 
• newyddiaduraeth. 
• newyddiaduriaeth. 

Pa gyfleoedd sydd ar gael i fi yn ystod fy astudiaethau yn y Brifysgol? 

Mae cyflogadwyedd wedi’i wreiddio ym mhob elfen o’n dysgu. Rydym yn dysgu ein myfyrwyr i anelu at yr yrfa y dymunant ei chael, nid y swydd y gallant ei chael. 

• Rydym yn cynnal rhaglen Lleoliadau Gwaith Seneddol uchel ei bri, sy'n golygu y gallwch gael profiad gwaith gwerthfawr yn gweithio gydag Aelod Seneddol (Tŷ'r Cyffredin, San Steffan) neu Aelod o’r Senedd (Senedd Cymru, Caerdydd) am gyfnodau rhwng 4 a 6 wythnos yn ystod yr haf. Yn ystod yr amser hwnnw fe fyddwch yn ysgrifennu adroddiadau ac areithiau, yn gwneud prosiectau ymchwil ac yn ymateb i faterion sy'n codi yn yr etholaeth. Efallai y bydd cyfleoedd pellach i chi gymryd rhan mewn etholiadau ac amryw faterion rhyngwladol. 
• Rydym hefyd yn gartref i Interstate, sef y cyfnodolyn gwleidyddiaeth ryngwladol hynaf ym Mhrydain i gael ei redeg gan fyfyrwyr, sy'n rhoi cyfle unigryw i chi i gyhoeddi'ch gwaith (sydd yn enwedig o fanteisiol os hoffech fynd ymlaen i astudiaethau uwchraddedig) neu i gael profiad gwerthfawr o weithio’n rhan o'r tîm golygyddol. Mae cymdeithasau myfyrwyr yn cynnig ysbrydoliaeth ac yn meithrin ymdeimlad cymunedol cryf yn yr adran, gyda rhaglenni o ddadleuon gwleidyddol, siaradwyr gwadd, cynadleddau a gweithdai, ynghyd â llawer o weithgareddau cymdeithasol megis y ddawns flynyddol. 

Pa gyfleoedd profiad gwaith a geir wrth astudio? 

Cliciwch yma i ddysgu am y gwahanol gyfleoedd y mae tîm Gyrfaoedd Prifysgol Aberystwyth yn eu cynnig. 

Gallwch wella'ch cyfleoedd cyflogaeth gyda GO Wales a BMG (y cynllun Blwyddyn mewn Gwaith) sy'n cael eu rheoli gan ein hadran Gyrfaoedd.  

Rwyf wrth fy modd â'r cwrs Cysylltiadau Rhyngwladol, oherwydd ei fod yn bwnc sy'n denu ystod eang o bobl o bob cwr o Brydain ac yn rhyngwladol, sy'n golygu eich bod yn dod ar draws ystod eang o bobl a safbwyntiau. Mae'r seminarau'n rhoi cyfle gwych i gael trafodaethau ac i ddysgu, ac mae'r darlithoedd eu hunain yn ddiddorol, a’r darlithwyr hwythau yr un mor ddiddorol! Roxy Taylor 

Mae'r Adran Gwleidyddiaeth Ryngwladol wedi rhoi dealltwriaeth newydd i mi o'r byd trwy ei modiwlau sy'n ymwneud â chysyniadau globaleiddio a bywydau menywod yn y Trydydd Byd. Mae arbenigwyr yma ar gynifer o feysydd, ac mae'n wych bod y tiwtoriaid mor hawdd siarad â nhw. Mae fy nhair blynedd yma yn Aberystwyth wedi bod yn addysg i mi, yn ogystal â bod yn llawer o sbort, a byddwn yn argymell astudio yma i unrhyw un. Hannah Mitchell 

Darlithwyr gwych, adeilad gwych, pobl wych ar y cwrs! Matthew David Bold