Cysylltiadau Rhyngwladol a Hanes Milwrol

Mae’r cynllun gradd anrhydedd sengl hwn yn cynnig addysgu o ansawdd uchel i fyfyrwyr ar draws ystod eang o fodiwlau (tua ugain i ddewis ohonynt ym mlynyddoedd 2 a 3), amgylchedd sy'n ysgogol yn ddeallusol ond yn gyfeillgar, ac ymdeimlad gwirioneddol o gymuned. Byddwch yn astudio sut mae rhyfela wedi datblygu ers cyfnod Napoleon, gan ystyried sut a phaham y mae natur rhyfel wedi newid. Gallwch ystyried sut mae technoleg wedi siapio ymladd, o oes stêm i arfau niwclear, dronau a seiber-ryfela. Byddwch hefyd yn dysgu am y syniadau allweddol sy'n siapio ein dealltwriaeth o natur rhyfel a sut y caiff rhyfeloedd eu cynnal: egwyddorion gweithrediadau milwrol, rôl brwydro, pwysigrwydd arweinyddiaeth a chudd-wybodaeth, a grym diwydiant. Yn Aberystwyth, rydym yn defnyddio dull rhyngwladol sy’n gwreiddio eich gwybodaeth am faterion milwrol o fewn cyd-destun ehangach gwleidyddiaeth y byd, a gallwch astudio rhanbarthau megis y Dwyrain Canol, Rwsia a chyfandiroedd America, yn ogystal ag Ewrop. 

Mae myfyrwyr Hanes Milwrol a Chysylltiadau Rhyngwladol yn aml wrth wraidd bywyd myfyrwyr yn yr Adran Gwleidyddiaeth Ryngwladol yn Aber, ac mae rhai yn ymuno â'n Corfflu Hyfforddi Swyddogion lleol. Yn ogystal â mireinio eich sgiliau academaidd, bydd ein modiwlau yn rhoi ichi'r wybodaeth y bydd ei hangen arnoch ar gyfer bywyd ar ôl y Brifysgol, megis ysgrifennu briffiau polisi, rhoi cyflwyniadau a defnyddio eich creadigrwydd i ddatrys problemau. Mae gan ein graddedigion yrfaoedd mewn ystod eang o feysydd, megis diplomyddiaeth, newyddiaduraeth, dysgu, a gweithio i sefydliadau rhyngwladol fel y Cenhedloedd Unedig, yn ogystal â dilyn llwybrau i raddedigion ym maes busnes, diwydiant, a'r sector cyhoeddus.

Cyfleoedd - Gall myfyrwyr Gwleidyddiaeth a Chysylltiadau Rhyngwladol yn Aberystwyth wneud y canlynol:

• Ymuno â'n 'Gemau Argyfwng' enwog – ymarfer chwarae rôl mewn symudiadau gwleidyddol a diplomyddol a gynhelir dros 3 diwrnod, ac un o uchafbwyntiau’r cwrs.
• Gwneud cais am le ar ein Cynllun Lleoliadau Seneddol: cyfle i fyfyrwyr yn yr ail flwyddyn dreulio interniaeth chwe wythnos o hyd yn gweithio ochr yn ochr ag Aelod Seneddol yn San Steffan neu Aelod o’r Senedd yng Nghaerdydd.
• Cymryd rhan yng ngweithgareddau'r Adran, fel y trafodaethau 'Bwrdd Crwn' rheolaidd ar ddigwyddiadau allweddol ledled y byd, gweithgareddau y Gymdeithas Gwleidyddiaeth Ryngwladol, y cyfnodolyn myfyrwyr Interstate a'n nosweithiau cwis a phitsa poblogaidd.    

Ein Staff

Mae pob un o ddarlithwyr yr Adran Gwleidyddiaeth Ryngwladol yn ymchwilwyr gweithgar ac mae ganddynt gymwysterau hyd at safon PhD, ac mae gan y rhan fwyaf hefyd TUAAU.

Mae cyflogadwyedd wedi'i wreiddio ym mhob cwrs rydym yn ei ddarparu. Mae ein graddau'n cynnig sylfaen gadarn ar gyfer amrywiaeth eang o yrfaoedd ar draws ystod o sectorau. Mewn economi fyd-eang sy'n newid yn gyflym, mae ein graddedigion yn hyblyg ac yn gallu defnyddio ystod o sgiliau trosglwyddadwy, sy'n golygu bod galw amdanynt o hyd.

Mae'r setiau sgiliau'n cynnwys:

• sgiliau datrys problemau a meddwl creadigol effeithiol
• sgiliau technoleg gwybodaeth
• y gallu i weithio'n annibynnol ac fel rhan o dîm
• sgiliau rheoli amser a threfnu
• sgiliau cyfathrebu ar lafar ac yn ysgrifenedig
• hunanddibyniaeth a'r gallu i ysgogi eu hunain.

Pa gyfleoedd sydd ar gael i mi ar ôl i mi gwblhau fy ngradd?

Mae ein graddedigion yn gweithio yn y meysydd canlynol:

• y sector datblygu
• gwleidyddiaeth leol a chenedlaethol
• y Gwasanaeth Sifil
• ymchwil y Llywodraeth
• ymchwil cymdeithasol
• y trydydd sector er enghraifft gyda chyrff anllywodraethol
• sefydliadau rhyngwladol
• newyddiaduraeth.

Pa gyfleoedd sydd ar gael i mi wrth astudio yn y Brifysgol?

Mae cyflogadwyedd wedi'i wreiddio yn ein haddysgu. Rydym yn addysgu ein myfyrwyr i anelu am yr yrfa maen nhw'n dymuno ei chael, ac nid y swydd y gallan nhw ei chael.

• Rydyn ni'n gweithredu cynllun Lleoliadau Seneddol clodfawr, sy'n eich galluogi i gael profiad gwaith gwerthfawr gydag Aelod o Senedd Cymru (Caerdydd) neu Aelod Seneddol (Tŷ'r Cyffredin, San Steffan) am gyfnod o 4-6 wythnos yn ystod yr haf. Yn ystod y cyfnod hwn, byddwch yn llunio adroddiadau ac areithiau, yn cyflawni prosiectau ymchwil, ac yn ymateb i faterion yn yr etholaeth. Mae'n bosib y bydd cyfleoedd pellach i chi gymryd rhan mewn etholiadau a materion rhyngwladol amrywiol.
• Rydyn ni hefyd yn gartref i Interstate, sef y cyfnodolyn gwleidyddiaeth ryngwladol hynaf a gaiff ei redeg gan fyfyrwyr yng ngwledydd Prydain, sy'n cynnig cyfle unigryw i chi gyhoeddi eich gwaith (yn arbennig o fanteisiol os ydych yn dymuno symud ymlaen i astudiaeth uwchraddedig) neu ennill profiad gwerthfawr wrth weithio fel rhan o'r tîm golygyddol. Mae cymdeithasau myfyrwyr cyffrous yn meithrin ymdeimlad cryf o gymuned yn yr adran, gan gynnig rhaglen o ddadleuon gwleidyddol, siaradwyr gwadd, cynadleddau a gweithdai, ochr yn ochr â gweithgareddau cymdeithasol niferus fel y ddawns flynyddol.

Pa gyfleoedd sydd ar gael i wneud profiad gwaith wrth astudio?

Cliciwch yma i ddysgu am y gwahanol gyfleoedd y mae tîm Gyrfaoedd Prifysgol Aberystwyth yn eu cynnig.

Gallwch wella'ch cyfleoedd cyflogaeth gyda GO Wales a BMG (y cynllun Blwyddyn mewn Gwaith) sy'n cael eu rheoli gan ein hadran Gyrfaoedd.

Dw i wrth fy modd fy mod i'n cael archwilio pynciau sydd o ddiddordeb personol i fi. Gall y gwaith darllen fod yn helaeth ar brydiau, ond mae bob amser yn ddiddorol cael safbwyntiau newydd ar bethau ro'n i'n meddwl fy mod eisoes yn gwybod amdanyn nhw. Mae'r seminarau yn dda hefyd - mae trafod y pynciau a chael gwybod beth mae fy nghyd-fyfyrwyr wedi'i ddehongli am y pwnc yn fy helpu i ddatblygu fy atebion a fy nealltwriaeth fy hun, sydd wedyn yn fy ngalluogi i gael gwell sgoriau pan ddaw hi at ysgrifennu traethodau a'r arholiadau!

Adam Curtis