BA

Hanes Celf

Prif Ffeithiau

V350

  • Tariff UCAS

    120 - 96

  • Hyd y cwrs

    3 blynedd

Ar gael ar gyfer Dechrau Medi 2025

Manylion pellach ynglŷn â'r gofynion mynediad

Ymgeisio Nawr

Wrth astudio'r BA mewn Hanes Celf yn yr Ysgol Gelf ym Mhrifysgol Aberystwyth, byddwch yn astudio hanes celf, yn ogystal â chymryd rhan weithredol yn yr ysgol. Mae cartref yr Ysgol yn adeilad rhestredig godidog lle daw hanes ac ymarfer ynghyd. Yn y lle hwn, fe gaiff celf ei chreu, ei churadu a’i harddangos. Mae sawl modd o ddefnyddio astudiaethau hanes celf yn ymarferol. Mae'n hyrwyddo meddwl yn feirniadol ac yn darparu sylfaen gadarn i yrfaoedd ym maes addysg a chyhoeddi, mewn newyddiaduraeth a hysbysebu, yn ogystal ag mewn curadu a gweinyddu’r celfyddydau. 

Bydd y radd hon yn eich arfogi â sgiliau ymchwil ac ysgrifennu hanfodol. Mae hyn yn sicrhau eich bod nid yn unig yn dysgu sut i ddarllen hanes celf ond eich bod yn gwybod beth mae'n ei olygu i fod yn hanesydd celf. 

Trosolwg o'r Cwrs

Pam astudio Hanes Celf yn Aberystwyth? 

Felly beth sy'n rhoi'r fantais i ni? 

  • Wrth astudio yn yr Ysgol Gelf, gallwch fanteisio ar gasgliad o gelf ac arteffactau sydd o fri rhyngwladol. Mae ein casgliad yn cynnwys tua 20,000 o brintiau, ffotograffau, darluniau, paentiadau a serameg. Rydym yn defnyddio'r gweithiau celf gwreiddiol hyn i feithrin gwybodaeth ymarferol am hanes celf. 
  • Mae'r Ysgol Gelf yn amgueddfa gelf a achredwyd gan y llywodraeth ac mae hi’n rhedeg ei horielau ei hun. Dim ond dwy ysgol o'r fath sydd yn y Deyrnas Unedig. Oherwydd hyn mae myfyrwyr yn cael cyfle i astudio celf yn gwbl ymarferol mewn amgylchedd amgueddfa. Mae'n rhoi cyfle i ymwneud yn greadigol â hanes celf trwy guradu gweithiau o'n casgliad yn rhan o'ch cynllun gradd. Am enghreifftiau o arddangosfa wedi'i churadu gan fyfyrwyr, ewch i'n blog Amgueddfa ac Orielau. 
  • Wrth astudio gyda ni, byddwch yn ymuno ag adran gelf yn y rheng uchaf yn y Deyrnas Gyfunol. Yr Ysgol Gelf yw'r unig brifysgol yng Nghymru sy'n dyfarnu gradd Hanes Celf. 
  • Mae ein staff yn weithgar o ran ymchwil, ac mae eu canfyddiadau yn llywio ein haddysgu yn yr Ysgol Gelf. Mae ein tîm o arbenigwyr yn cynnwys haneswyr celf adnabyddus, curaduron wrth eu gwaith ac artistiaid sy’n arddangos eu gwaith. 
  • Yn ystod eich amser yn yr Ysgol Gelf, cewch gyfle i weithio gyda, ac astudio, ein casgliad o brintiau, ffotograffau, paentiadau a serameg sy'n enwog yn rhyngwladol. 
  • Gall pob myfyriwr yn ein hysgol ddefnyddio ein cyfleusterau addysgu sy'n cynnwys ystafell MAC, stiwdios a mannau dysgu. 
  • Yr uchafbwynt i bob myfyriwr yn ein hadran yw curadu arddangosfa yn ein horielau yn rhan o'u cynllun gradd. 
  • Ar stepen ein drws ceir Llyfrgell Genedlaethol Cymru. Yn un o ddim ond pum llyfrgell hawlfraint yn y Deyrnas Unedig, mae'r Llyfrgell Genedlaethol yn Aberystwyth yn dal dros chwe miliwn o lyfrau, mapiau, printiau a llawysgrifau, ac mae ganddi gasgliad rhagorol o baentiadau a gweithiau ar bapur. 

Ein Staff

Drwy ymwneud yn weithredol ag ymarfer, hanes a churadu celf, mae staff yr Ysgol Gelf yn ceisio darparu amgylchedd dysgu cyfoethog i'r myfyrwyr. Mae eu profiad fel artistiaid sy'n arddangos eu gwaith, haneswyr celf sy'n cyhoeddi eu gwaith, a churaduriaid gweithredol yn llywio eu gwaith dysgu.

Modiwlau Dechrau Medi - 2025

Noder: Y modiwlau a restrir isod yw'r modiwlau y bwriedir eu cyflwyno ar hyn o bryd yn ystod y flwyddyn academaidd nesaf ac mae'n bosibl y gallant newid. Maent wedi'u cynnwys yma i roi syniad o strwythur y cwrs.

Gyrfaoedd

Cyfleoedd Gyrfaol 

Dengys ymchwil fod y rhan fwyaf o'n graddedigion yn creu gyrfaoedd yn y maes o'u dewis. Mae ein graddedigion yn eu sefydlu eu hunain yn haneswyr celf, curadwyr a gweinyddwyr proffesiynol. Mae cyflogwyr yn cynnwys: 

  • Cyngor y Celfyddydau 
  • BBC 
  • Y Cyngor Dylunio 
  • Papur Newydd Yr Observer 
  • Academi Frenhinol y Celfyddydau 
  • Ymddiriedolaeth y Casgliadau Brenhinol 
  • Oriel Saatchi 
  • Oriel Tate 
  • Amgueddfa Victoria ac Albert 

Mae ein graddedigion yn: 

  • addysgwyr prifysgol 
  • athrawon ysgolion uwchradd 
  • rheolwyr orielau celf 
  • curaduron amgueddfeydd neu arddangosfeydd 
  • newyddiadurwyr 
  • cyfarwyddwyr celf ym maes cyhoeddi 
  • gwarchodwyr paentio îsl, serameg a gweithiau ar bapur. 

Bob blwyddyn mae nifer sylweddol o'n graddedigion yn cofrestru ar gynlluniau gradd Meistr yn y Celfyddydau ym Mhrifysgol Aberystwyth ac mewn lleoedd eraill i wella eu cyfleoedd gyrfa ymhellach. 

Sgiliau Trosglwyddadwy  

Mae astudio Celf nid yn unig yn ddeallusol ysgogol ac yn rhoi boddhad personol, ond mae iddo hefyd lawer o fanteision ymarferol. Mae’n hyrwyddo agwedd gadarnhaol tuag at ddatrys problemau, yn datblygu doniau rhyngbersonol ac yn gwella eich gallu i lwyddo mewn byd cyfnewidiol. Mae galw mawr am y sgiliau trosglwyddadwy hyn yn y farchnad swyddi heddiw, a dyna pam eu bod yn cael eu hyrwyddo'n weithredol gennym ni yn ystod eich astudiaethau yn yr Ysgol Gelf. Maent yn cynnwys y gallu i: 

  • ymchwilio i ffeithiau a dehongli gwybodaeth 
  • gallu cyfathrebu syniadau'n effeithiol, ar lafar ac yn ysgrifenedig. 
  • cysylltu damcaniaeth ag ymarfer a datblygu meddwl rhyngddisgyblaethol 
  • y gallu i weithio'n annibynnol neu’n rhan o dîm creadigol 
  • cadw ffocws, cymhelliant a chanolbwyntio ar y nod. 

Profiad Gwaith 

Mae llawer o gyfleoedd i feithrin profiad proffesiynol yn ystod eich astudiaethau. I gael gwybodaeth benodol ewch i ymweld â’n Gwasanaeth Gyrfaoedd 

Gallwch wella eich rhagolygon am swydd ymhellach gyda GO Wales a thrwy ein Cynllun Blwyddyn mewn Gwaith. Mae'r ddau yn cael eu rheoli gan ein tîm Gwasanaeth Gyrfaoedd. 

Dysgu ac Addysgu

Beth fydda i’n ei ddysgu? 

Bydd y trosolwg hwn yn rhoi darlun i chi o'r hyn y gallech fod yn ei astudio yn ystod ein cynllun gradd tair blynedd. Mae'r cynllun yn eich galluogi i ddatblygu gwybodaeth hanesyddol, meddwl beirniadol a sgiliau ymarferol wrth ysgrifennu ac ymchwilio o dan arweiniad haneswyr celf sy’n cyhoeddi eu gwaith ac artistiaid a churaduron wrth eu gwaith. 

Mae ymchwil staff yn llywio ein haddysgu ac yn darparu amgylchedd dysgu ysgogol sy'n seiliedig ar ymarfer. Mewn asesiad diweddar ledled y DU, ystyriwyd bod 100% o effaith ymchwil ein staff hanes celf 'o'r radd flaenaf' ac yn 'rhagorol yn rhyngwladol'. 

Yn ystod eich blwyddyn gyntaf byddwch yn: 

  • meithrin sylfaen eang mewn celf Orllewinol wedi’i threfnu yn ôl themâu, genres, mudiadau ac arddulliau o'r Dadeni i'r ugeinfed ganrif (er enghraifft, cynrychioliadau o'r ffigur dynol a ffyrdd o edrych ar dirwedd) 
  • dysgu hanfodion ymchwilio a dehongli gweithiau celf a diwylliant gweledol 
  • archwilio casgliadau Amgueddfa’r Ysgol Gelf ac ymgysylltu â gweithiau celf yn uniongyrchol 
  • dewis o fodiwlau dewisol i ddyfnhau eich dealltwriaeth o bynciau penodol. 

Yn eich ail flwyddyn, byddwch yn: 

  • ymchwilio i hanes celf Orllewinol yr ugeinfed ganrif, y newid o Foderniaeth i Ôl-foderniaeth, yn ogystal â diwylliant gweledol cyfoes 
  • ystyried dulliau beirniadol a damcaniaethol o ymdrin â hanes ac ymarfer celf 
  • parhau i adeiladu eich cwricwlwm eich hun o'n portffolio o fodiwlau hanes celf dewisol ar bynciau fel ffotograffiaeth, gwneud printiau, darlunio llyfrau a gweithiau haniaethol 
  • derbyn arweiniad unigol a phwnc-benodol mewn ymarfer proffesiynol (ysgrifennu ac ymchwil) wrth i chi ddatblygu eich prosiect traethawd hir dan oruchwyliaeth staff. 

Yn ystod eich trydedd flwyddyn byddwch yn: 

  • dewis o amrywiaeth o bynciau rhyngddisgyblaethol megis addasu, y Gothig, a pherthynas celf a sain 
  • cael cyfle i dynnu ar eich gwybodaeth uniongyrchol am ein casgliad celf drwy guradu arddangosfa gyda thîm o'ch cyfoedion 
  • cael cipolwg ar sut mae celf yn cael ei chreu drwy weithdai a sesiynau ymarferol sy'n ystyried technegau, offer a deunyddiau 
  • cynnal ymchwil gwreiddiol wrth i chi weithio tuag at eich traethawd hir dan oruchwyliaeth staff. 

Sut fydda i'n cael fy nysgu? 

Caiff ein rhaglen ei chyflwyno drwy gyfrwng darlithoedd, seminarau, gweithdai, dosbarthiadau tiwtorial a theithiau maes.  Byddwch yn cael dosbarthiadau tiwtorial unigol i'ch tywys a'ch cefnogi drwy gydol eich gyrfa academaidd. 

Yn gyffredinol cewch eich asesu drwy gyfrwng gwaith cwrs (traethodau, prosiect traethawd hir ac, i raddau llai, arholiadau). Fel rhaglen sy'n canolbwyntio ar ymarfer, rydym hefyd yn defnyddio ystod o asesiadau ymarferol, gan gynnwys cyflwyniadau seminar a gwaith prosiect. Mae’r canlyniadau dysgu’n cael eu cyfleu'n glir yn yr amlinelliad ar gyfer pob modiwl, felly rydych bob amser yn gwybod pa fath o waith sy'n gysylltiedig. 

Tystiolaeth Myfyrwyr

Rwyf wrth fy modd bod Hanes Celf yn gyfuniad o lawer o gyrsiau gwahanol. Nid yw’n edrych ar gelf yn unig. Mae'n ymwneud â hanes cymdeithasol a gwleidyddol, anthropoleg gymdeithasol, astudio diwylliannau gwahanol a dysgu am sut mae artistiaid yn cyfleu eu syniadau a'u meddyliau trwy gyfrwng eu cyfryngau eu hunain. Mae wedi fy helpu i gael gafael llawer gwell ar hanes yn gyffredinol ac i ddeall sut i fwynhau edrych ar gelf a deall ei negeseuon. Mae dysgu am hanes celf hefyd wedi dysgu llawer i mi am sut i ymchwilio a phwysigrwydd cynnal a gwerthfawrogi ein treftadaeth ddiwylliannol gyffredin. 

Amy Barson 

Ar hyn o bryd rydw i yn fy ail flwyddyn yn astudio ar gyfer BA mewn Hanes Celf. Rwy'n falch fy mod wedi dewis astudio'r pwnc, gan ei fod wedi bod yn hynod ddiddorol ac wedi agor fy llygaid i hanes helaeth Celf, yn ogystal â fy herio i ystyried ei bwysigrwydd cynyddol yn y byd sydd ohoni. Nid oedd gennyf wybodaeth helaeth am Hanes Celf o'r blaen, ond mae'r cwrs wedi rhoi trosolwg trylwyr i mi o lawer o brif agweddau'r pwnc. Mae hefyd wedi rhoi sgiliau defnyddiol i mi mewn arsylwi, cyfathrebu a phrofiad gyda deunyddiau artistiaid. 

Rebecca Jones 

Gofynion Mynediad Nodweddiadol

Tariff UCAS 120 - 96

Safon Uwch BBB-CCC

Gofynion TGAU (o leiaf gradd C/4):
Cymraeg neu Saesneg

Diploma Cenedlaethol BTEC:
DDM-MMM

Bagloriaeth Ryngwladol:
30-26

Bagloriaeth Ewropeaidd:
75%-65% overall

Mae'r Brifysgol yn croesawu ceisiadau israddedig gan fyfyrwyr sy'n astudio'r Diploma Mynediad i Addysg Uwch neu gymwysterau lefel T, ar yr amod eu bod yn cyflawni'r canlyniadau perthnasol o ran cynnwys y pwnc a'r dysgu. Ni allwn dderbyn Diplomâu Mynediad i Addysg Uwch na lefelau T fel cymhwyster cyffredinol ar gyfer pob cwrs gradd israddedig.
Mae ein polisi derbyn cynhwysol yn rhoi gwerth ar ehangder yn ogystal â dyfnder yr astudio. Dewisir ymgeiswyr ar sail eu teilyngdod eu hunain a gall cynigion amrywio. Os hoffech wirio a yw eich cymwysterau yn gymwys cyn cyflwyno cais, cysylltwch â'r Swyddfa Derbyn Israddedigion am gyngor ac arweiniad.

Yn ôl i'r brig

|