Amaethyddiaeth gyda Gwyddor Anifeiliaid

Beth fydda i'n ei ddysgu? 

Yn y flwyddyn gyntaf, cewch gyflwyniad i'r technolegau sy'n cael eu datblygu’n fwyfwy ar gyfer y diwydiant amaethyddol ac yn cael eu mabwysiadu yn y diwydiant. Byddwch yn astudio’r prif systemau cynhyrchu anifeiliaid fferm, glaswelltir amaethyddol a chnydau grawnfwyd yn ogystal â'r ffactorau sy'n sylfaen i amryw strategaethau tyfu cnydau. Byddwch yn edrych ar y ffactorau sy’n dylanwadu ar sut y defnyddir y tir ac yn datblygu sgiliau rheoli busnes defnyddiol, gan gynnwys paratoi cyllidebau ffermydd a dadansoddi marchnadoedd nwyddau.  

Yn yr ail flwyddyn, byddwch yn ystyried y ffactorau sy'n dylanwadu ar gynhyrchiant anifeiliaid, iechyd a lles, defnyddio adnoddau’n effeithlon, perfformiad ariannol ac ansawdd cynnyrch. Byddwch yn canolbwyntio ar faeth, anatomeg a ffisioleg anifeiliaid.  

Yn ystod y drydedd flwyddyn, byddwch yn edrych ar sut y defnyddir ymchwil i ddatblygu systemau cynhyrchu anifeiliaid mwy effeithlon. Byddwch yn ystyried amaethyddiaeth a materion amaethyddol ar draws ystod o safbwyntiau penodol, amlddisgyblaethol a rhyngddisgyblaethol, ac yn meithrin dealltwriaeth o'r berthynas rhwng polisi, ffactorau economaidd-gymdeithasol, arferion amaethyddol a'r economi wledig.   

Bydd ymweliadau â ffermydd, canolfannau ymchwil, busnesau gwledig a sefydliadau sy’n ymwneud â rheoleiddio a rheoli cefn gwlad yn rhan annatod o’r cwrs gan amlygu’r materion allweddol dan sylw a’ch galluogi i weld sut mae cymhwyso eich addysg ddamcaniaethol ac academaidd i fusnes ymarferol.     

Yn eich blwyddyn olaf, byddwch yn ymgymryd â phrosiect ymchwil annibynnol, fel arfer yn ddadansoddol ei natur ac yn cynnwys casglu a dadansoddi data ar bwnc sy'n ymwneud ag amaethyddiaeth. Mae hyn yn rhoi cyfle i chi arbenigo mewn agwedd benodol ar y ddisgyblaeth dan arweiniad arolygydd traethawd hir.  

Sut bydda i'n cael fy addysgu? 

Bydd y cwrs hwn yn cael ei gyflwyno drwy raglen o ddarlithoedd, seminarau, gweithdai ac ymweliadau maes. Byddwch yn cael nifer o gyfleoedd i ddefnyddio eich dysgu academaidd mewn gweithgareddau ymarferol a gweithdai.  

Asesu 

Cewch eich asesu drwy nifer o ddulliau gan gynnwys traethodau, gweithgareddau ymarferol, cyflwyniadau llafar, taflenni gwaith, adroddiadau, ymarferion ystadegol, cynlluniau busnes, adolygiadau o destunau academaidd, llyfr nodiadau maes ac arholiadau. Bydd prosiectau ymchwil yn eich trydedd a phedwaredd flwyddyn yn eich galluogi i wneud ymchwil fanwl o dan arweiniad arolygydd.  

Tiwtor Personol 

Bydd tiwtor personol yn cael ei neilltuo i chi, a’r person hwn fydd eich prif gyswllt trwy gydol eich astudiaethau. Bydd eich tiwtor personol yno i’ch helpu i ymgartrefu pan fyddwch yn cyrraedd gyntaf, a bydd wrth law i’ch helpu gyda materion academaidd neu faterion personol.