Ymddygiad Anifeiliaid

Pam astudio Ymddygiad Anifeiliaid ym Mhrifysgol Aberystwyth? 

Mae ein cwrs: 

• yn darparu sylfaen gadarn o sgiliau a gwybodaeth yn y biowyddorau a fydd yn amhrisiadwy i chi ym maes ymddygiad anifeiliaid a’r tu hwnt 
• wedi'i achredu gan y Gymdeithas Fiolegol Frenhinol, yn gydnabyddiaeth o’i ansawdd 
• yn cynnwys llawer o ddeunydd arbenigol ar ymddygiad anifeiliaid a ddysgir gan staff sy'n cynnal ymchwil wyddonol i’r maes hwn  
• yn cynnig cwrs maes preswyl opsiynol lle yr ymchwilir i ymddygiad anifeiliaid drwy waith prosiect mewn grwpiau bach 
• yn gosod ymddygiad yn ei gyd-destun drwy fodiwlau sy'n ymdrin ag iechyd a lles anifeiliaid a ddysgir gan filfeddygon, a modiwlau dewisol sy'n datblygu gwybodaeth a sgiliau ym maes cadwraeth 
• yn cynnwys prosiect ymchwil annibynnol sylweddol yn eich blwyddyn olaf, lle byddwch yn elwa o arolygiaeth academaidd unigol 
• yn arbennig o addas i fyfyrwyr sy'n dymuno gwella eu cyflogadwyedd mewn meysydd fel cadwraeth anifeiliaid, gofal a lles anifeiliaid, neu ymchwil i ymddygiad anifeiliaid, ond mae hefyd yn datblygu sgiliau y mae galw amdanynt mewn ystod eang o broffesiynau eraill addas i raddedigion. 

Cyfleoedd 

• Mae ein myfyrwyr yn elwa o gytundebau cyfnewid rhyngwladol â phrifysgolion yn Ewrop, Gogledd America, Asia ac Awstralia, felly gallwch wneud cais i dreulio eich ail flwyddyn, neu ran ohoni, yn astudio ymddygiad anifeiliaid dramor. 
• Gallwch ddewis astudio nifer o’n modiwlau trwy gyfrwng y Gymraeg. Edrychwch ar y tab modiwlau am fwy o wybodaeth. 

Mae gan Aberystwyth gyfleusterau ardderchog ar gyfer ymddygiadwyr anifeiliaid, gan gynnwys: 

• acwariwm modern lle cedwir rhywogaethau dŵr oer a throfannol, morol a dŵr croyw. 
• amrywiaeth o anifeiliaid dof bach a mawr ar gael i chi ar gyfer ymchwil ymddygiad anifeiliaid yn ein ffermydd, ein canolfan geffylau a’n canolfan addysg milfeddygaeth. 
• coetiroedd helaeth ar gael i chi ger ein campws, lle y ceir mwy na 100 o flychau nythu pwrpasol - lle delfrydol i astudio adar a mathau eraill o fywyd gwyllt  
• cynefinoedd gwyllt a phrydferth ar garreg ein drws, gan gynnwys cynefinoedd morol, gweundiroedd, mynyddoedd, glaswelltir a choedwigoedd, sy’n cynnig amrywiaeth aruthrol o gyfleoedd ar gyfer gwaith maes a hamddena.  
• cyfleoedd i weld rhywogaethau anifeiliaid cyffredin a phrin ym Mhrydain megis dolffiniaid trwyn potel, morloi llwyd yr Iwerydd, y bele, dyfrgwn, gweilch y pysgod a barcudiaid coch. 
• casgliad helaeth o sbesimenau swolegol yn ein hamgueddfa. 

Dysgu a arweinir gan ein hymchwil 

Cewch eich dysgu gan dîm angerddol o ymddygiadwyr anifeiliaid sydd hefyd yn wyddonwyr gweithgar ym maes ymchwil. Mae eu hymchwil yn rhoi sail i’n gwaith dysgu, ac yn darparu cyfleoedd rhagorol ar gyfer y prosiect ymchwil y byddwch yn ymgymryd ag ef yn eich blwyddyn olaf. Mae ein darlithwyr ymddygiad anifeiliaid hefyd yn athrawon brwdfrydig ac arloesol. 

Ein Staff

Mae gan y rhan fwyaf o staff dysgu Adran Gwyddorau Bywyd gymwysterau hyd at safon PhD ac maent yn ymchwilwyr gweithgar. Hefyd, mae gan staff y cyrsiau galwedigaethol gefndir ym myd diwydiant. Mae yn yr Adran nifer fawr o staff sy'n gwneud ymchwil yn unig ac mae'n bosib y bydd y myfyrwyr yn dod i gysylltiad â hwy.

Beth fyddaf i’n ei gael o astudio am radd BSc Ymddygiad Anifeiliaid? 

Mae graddedigion Ymddygiad Anifeiliaid Prifysgol Aberystwyth: 

• yn wyddonwyr ymddygiad medrus, sydd â gwybodaeth gref am ymddygiad anifeiliaid, o safbwynt damcaniaethol ac yn ymarferol 
• yn meddu ar ddealltwriaeth uniongyrchol am ymchwil ym maes ymddygiad anifeiliaid o ganlyniad i'w prosiectau ymchwil yn ystod eu blwyddyn olaf, a phwyslais ein gradd ar ddysgu a arweinir gan ymchwil 
• efallai wedi cael profiad rhyngwladol, os ydynt wedi cymryd rhan mewn cynllun cyfnewid academaidd 
• yn feddylwyr beirniadol hyderus a chraff, sy'n gallu gweithio'n annibynnol ac yn rhan o dîm. Mae ganddynt sgiliau cryf yn y gwyddorau a dadansoddi, sgiliau deniadol iawn ym maes ymddygiad anifeiliaid a’r tu hwnt 
• yn aelodau o gymuned gefnogol o ymddygiadwyr sydd ym Mhrifysgol Aberystwyth ar hyn o bryd neu a fu yma yn y gorffennol 
• yn cael aelodaeth o’r Gymdeithas Fioleg Frenhinol am flwyddyn ar ôl graddio i'w helpu i sefydlu eu gyrfaoedd. 

Ym mha feysydd mae ein myfyrwyr yn mynd i weithio? 

Mae gan ein graddedigion sgiliau y mae galw amdanynt mewn ystod eang o yrfaoedd ym maes ymddygiad anifeiliaid a’r tu hwnt. Maent wedi: 

• ymgymryd ag astudiaethau uwchraddedig ar lefel Meistr neu PhD, gan anelu at yrfaoedd ymchwil ym maes ymddygiad anifeiliaid 
• mynd i faes ymgynghori ecolegol, neu swyddi gofal anifeiliaid ymarferol fel gofalwyr cŵn neu dechnegwyr anifeiliaid gwyddonol 
• sefydlu gyrfaoedd ym maes cyfathrebu gwyddonol, addysg amgylcheddol ac addysgu  
• ymgymryd â swyddi gwyddonol y tu hwnt i faes ymddygiad anifeiliaid, fel cynorthwywyr labordai meddygol, er enghraifft, oherwydd eu sylfaen eang o sgiliau gwyddonol trosglwyddadwy. 

Mae ein gradd ymddygiad anifeiliaid hefyd yn addas ar gyfer cael eich derbyn i amrywiaeth o raglenni hyfforddi i raddedigion. 

Pa gyfleoedd profiad gwaith a geir wrth astudio? 

Yn ystod eu hastudiaethau, mae llawer o'n myfyrwyr wedi gwirfoddoli ar brosiectau cadwraeth yn lleol a thramor fel Prosiect Adfer Bele’r Coed a rhaglen fridio caeth y Lyncs Iberaidd, neu ar gyfer sefydliadau fel yr RSPB. Mae llawer o fyfyrwyr hefyd yn gwirfoddoli mewn sŵau, neu’n cynorthwyo ar ein prosiectau ymchwil gwyddonol. 

Dysgwch am y gwahanol gyfleoedd sy'n cael eu cynnig gan y Gwasanaeth Gyrfaoedd a sut y gallwch chi wella'ch cyfleoedd cyflogaeth gyda Cynllun Blwyddyn mewn Gwaith (BMG).

Fe wnes i fwynhau'r cwrs yn fawr, a chael cyfle i astudio amrywiaeth o anifeiliaid ac archwilio llwybrau gyrfaol amrywiol, cyn penderfynu canolbwyntio ar ymddygiad cŵn a hyfforddiant. Mewn rhai modiwlau, roeddem yn gallu dewis y pwnc roedd yn rhaid i ni ei gyflwyno neu ysgrifennu amdano, gan roi cyfle i mi ganolbwyntio ar bwnc roedd gen i ddiddordeb arbennig ynddo. Roedd modiwlau a oedd yn canolbwyntio ar anifeiliaid sw ac anifeiliaid gwyllt yn caniatáu i mi archwilio gyrfaoedd posib yn y meysydd hyn, a helpodd modiwlau a oedd yn cynnwys gwaith grŵp a chyflwyniadau i wella fy hyder. Rebecca - Gofalwr Cŵn i'r Dogs Trust

Rwy'n cynorthwyo gyda chynnal amrywiaeth o arolygon fflora a ffawna, trawsleoli a goruchwylio gwaith adeiladu/dymchwel ar gyfer rhywogaethau a warchodir, gan gynnwys ystlumod, madfallod dŵr cribog, ymlusgiaid, pathewod, moch daear a gwaith ecolegol cysylltiedig arall ar safleoedd ledled Cymru a Lloegr. Fe wnes i fwynhau fy nghwrs yn fawr. Roedd yn amrywiol, yn heriol ac roedd wastad yn gwneud i mi ddymuno mynd i ddysgu mwy ar ôl y darlithoedd. Yn arbennig, roedd y modiwl cwrs maes ymddygiad anifeiliaid yn berffaith ar gyfer dysgu sut i astudio anifeiliaid yn y maes, gweithio fel tîm a chael canlyniadau'n brydlon. Mae'r rhain yn sgiliau hanfodol yn fy swydd bresennol a byddant yn parhau i fod yn berthnasol yn fy ngyrfa. Adam – Ecolegydd Maes, Aspect Ecology Ltd

Roeddwn wrth fy modd yn astudio Ymddygiad Anifeiliaid ym Mhrifysgol Aberystwyth. Roedd y staff bob amser yn gyfeillgar ac yn agos-atoch. Helpodd fy narlithwyr fi i gyflawni fy llawn botensial academaidd, ac roedd amrywiaeth y modiwlau yn fy mharatoi gyda sbectrwm eang o brofiadau. Felly diolch i Brifysgol Aberystwyth. Sarah – Hyfforddai Dysgu a Threftadaeth Cymunedol gyda'r Ymddiriedolaeth Genedlaethol

Roeddwn i'n mwynhau fy holl fodiwlau, ond roeddwn i'n mwynhau ymddygiad anifeiliaid ac ecoleg ymddygiad yn enwedig, ac roeddwn yn ddigon ffodus i gael yr hyblygrwydd i gynllunio fy mhrosiect traethawd hir fy hun yn y drydedd flwyddyn ar gyfoethogi'r amgylchedd i ddyfrgwn yn Sealife, Birmingham. Symudais i Fryste yn 2012 i astudio ar gyfer PhD ac rwyf wedi bod yn defnyddio trapiau camera mewn gerddi trefol i astudio ymddygiad gofodol a chymdeithasol llwynogod. Rhoddodd fy amser yn Aberystwyth sylfaen gadarn i mi mewn gwyddoniaeth a chefais fy nghyflwyno i ymchwil academaidd. Fe ges i fodd i fyw yn Aber! Jo – myfyriwr PhD, Prifysgol Bryste