Gwyddor Anifeiliaid

Yn ystod eich astudiaethau byddwch yn datblygu dealltwriaeth o’r fioleg allweddol sy’n ymwneud ag iechyd anifeiliaid dof, gan gynnwys anatomi, ffisioleg, maeth, gwneud diagnosis o afiechydon, ac ymddygiad. Byddwch hefyd yn gallu datblygu diddordeb penodol mewn gwyddor da byw, gwyddor ceffylau, neu wyddor ymddygiadol, trwy ddewis un o dri llwybr y radd. 

Bydd gan eich dealltwriaeth academaidd sylfaen gref yng nghyd-destun ymarferol a chymwysedig gwyddor anifeiliaid, a chaiff ei datblygu ymhellach gan ddarlithwyr gwadd o wahanol feysydd o’r diwydiant gwyddor anifeiliaid. Mae ein staff dysgu hefyd yn weithgar wrth gynnal ymchwil i feysydd milfeddygol megis afiechydon heintus, maeth, ymddygiad atgenhedlu a mwy.  

Mae’r cwrs hwn wedi’i achredu gan y Gymdeithas Fioleg Frenhinol. 

Ein Staff

Mae gan y rhan fwyaf o staff dysgu Adran Gwyddorau Bywyd gymwysterau hyd at safon PhD ac maent yn ymchwilwyr gweithgar. Hefyd, mae gan staff y cyrsiau galwedigaethol gefndir ym myd diwydiant. Mae yn yr Adran nifer fawr o staff sy'n gwneud ymchwil yn unig ac mae'n bosib y bydd y myfyrwyr yn dod i gysylltiad â hwy.

Pa gyfleoedd sydd ar gael am brofiad gwaith wrth astudio?  

Dysgwch am y gwahanol gyfleoedd sy'n cael eu cynnig gan y Gwasanaeth Gyrfaoedd a sut y gallwch chi wella'ch cyfleoedd cyflogaeth gyda Cynllun Blwyddyn mewn Gwaith (BMG). 

Astudio Gwyddor Anifeiliaid yn Aberystwyth oedd y profiad gorau ges i erioed. Nid yn unig wnaeth y profiad roi cipolwg i fi o'r maes ro'n i am greu gyrfa ynddo, ond fe wnaeth hefyd fy mharatoi ar gyfer bywyd y tu allan i'r Brifysgol. Mae'r modiwlau maetheg, bridio anifeiliaid ac iechyd anifeiliaid, i enwi dim ond rhai, yn codi'n aml yn fy swydd bob dydd. O'r darlithwyr i gynnwys y cwrs, does dim rhan o'r Brifysgol na fy nghwrs nad ydw i'n gweld ei eisiau ac yn edrych yn ôl arno gyda gwên. Sarah - BSc Gwyddor Anifeiliaid. Fformiwleiddiwr Bwyd Anifeiliaid, ForFarmers

Rydw i wrth fy modd ag agwedd ymarferol y cwrs Gwyddor Anifeiliaid, a'r darlithoedd diddorol. Mae gallu dewis llwybr yn golygu bod modd i ni arbenigo ac astudio'r hyn sydd fwyaf o ddiddordeb i ni o'r ail flwyddyn ymlaen. Mae bod yn Aberystwyth yn golygu bod digon o gyfle ar gyfer wyna a gwneud gwaith fferm ochr yn ochr â fy astudiaethau. Lewis Wescott

Mae'r cwrs wedi cynyddu fy ngwybodaeth yn sylweddol. Mae wedi agor llawer o ddrysau ar gyfer rhagolygon fy ngyrfa neu ar gyfer astudio ymhellach. Caitlin Jenkins

Dewisais Brifysgol Aberystwyth oherwydd ei henw ardderchog, yr ystod eang o fodiwlau oedd ar gael, ac oherwydd y cyfleusterau marchogaeth. Rwy'n cofio'r Brifysgol fel cymysgedd wych o fywyd gyda cheffylau, cwrdd â ffrindiau gwych gyda diddordebau tebyg, ac astudio pynciau a oedd yn agos at fy nghalon. Barbara - Rheolwr Masnachol, Iechyd Anifeiliaid ar gyfer Labordai Charles River

Gwneud Gwyddor Anifeiliaid ym Mhrifysgol Aberystwyth oedd penderfyniad gorau fy mywyd – mae wedi fy mowldio i'r person ydw i heddiw. Roedd pawb mor gyfeillgar, ac roedd y cwrs wedi'i osod ar yr union lefel gywir, gyda chyfleusterau gwych o astudio yn y llyfrgelloedd i'r sesiynau ymarferol yn y labordai a'r maes. Helpodd fy nghwrs drwy roi cipolwg i fi o'r diwydiant ffermio, ochr yn ochr â dealltwriaeth ddofn o anatomeg a ffisioleg yr anifeiliaid rydw i'n gweithio gyda nhw bob dydd.

Dawn - Arolygydd Marchnata Wyau ar gyfer Asiantaeth Iechyd Anifeiliaid a Labordai Milfeddygol (AHVLA), sy'n rhan o DEFRA

A minnau wedi fy magu yn nwyrain Lloegr, doeddwn i erioed wedi bod i Gymru tan i fi ddod i ymweld â Phrifysgol Aberystwyth. Gwerthwyd 'Aber' i fi y diwrnod hwnnw. Nid yn unig roedd y lleoliad yn wirioneddol hardd, ond roedd y cwrs Gwyddor Anifeiliaid yn sefyll allan wrth ymyl prifysgolion eraill ro'n i wedi gwneud cais amdanynt, gan fy ngalluogi i arbenigo mewn meysydd pwnc penodol sy'n addas ar gyfer fy sgiliau a fy niddordebau.

Laura - Ymgynghorydd Maetheg, Dodson and Horrell Ltd