Bioleg a Newid Hinsawdd (gyda blwyddyn integredig mewn diwydiant)

Beth fydda i'n ei ddysgu?

Mae maes llafur ein cwrs gradd BSc Bioleg a Newid Hinsawdd gyda’r flwyddyn sylfaen integredig yn union yr un fath ag ar y cwrs tair blynedd BSc Bioleg a Newid Hinsawdd (FC71).

Yn ystod y flwyddyn gyntaf byddwch yn ymchwilio ystod eang o bynciau craidd sy’n cynnwys ecoleg, amrywiaeth microbaidd, y biosffer, y blaned werdd, esblygiad ac amrywiaeth bywyd. Bwriad hyn yw rhoi sylfaen gadarn i chi ym maes Bioleg a Newid Hinsawdd. Cewch hefyd ddethol eich modiwlau eich hun o blith y rhai sydd ar gael. 

Yn ystod yr ail flwyddyn byddwch yn ymchwilio i wahanol ffactorau newid amgylcheddol y dyfodol a sut y bydd hyn yn effeithio ar blanhigion, anifeiliaid ac ecosystemau. Byddwch hefyd yn archwilio prosesau gwneud penderfyniadau, y negodi a’r wleidyddiaeth sy’n ymwneud â llywodraethu hinsawdd yn yr oes sydd ohoni. I baratoi ar gyfer traethawd hir y flwyddyn olaf, byddwch yn astudio’r prosesau sy’n sail i gynllunio ymchwil wyddonol dda. 

Yn y drydedd flwyddyn, byddwch yn treulio blwyddyn yn gweithio mewn maes diwydiant sy’n berthnasol i'ch gradd, a bydd hyn yn cyfrif tuag at eich gradd derfynol. Disgwylir i chi drefnu’r lleoliad gwaith eich hun, ond bydd ein Gwasanaeth Gyrfaoedd yn gallu cynnig cymorth. Does dim gwarant y bydd tâl am y gwaith, ac os na allwch chi ddod o hyd i leoliad, gallwch newid i'r cwrs tair blynedd BSc Bioleg a Newid Hinsawdd (FC71). Yn ystod eich blwyddyn mewn diwydiant, byddwch yn talu ffioedd is.  

Yn ystod y flwyddyn olaf byddwch yn archwilio natur a maint bioamrywiaeth, o lefel amrywiaeth genetig i fiomau ac fe gewch eich cyflwyno i ddulliau o fesur a monitro newid mewn bioamrywiaeth ar wahanol lefelau. Byddwch yn ystyried bygythiadau anthropogenig y presennol a’r dyfodol i'r systemau naturiol ac i ddynol ryw, gan gynnwys effeithiau megis llygredd, newid yn yr hinsawdd a gor-ymelwa ar adnoddau. Yn olaf, byddwch yn ymgymryd â darn o ymchwil fanwl ar thema sy’n cyd-fynd â’ch gradd neu eich diddordebau. Mae hwn yn brofiad sy’n uchafbwynt i'r cwrs ac oherwydd yr ystod o ymchwil yn Aberystwyth ni chewch drafferth yn dod o hyd i brosiect sy’n ennyn eich diddordeb ac sy’n datblygu eich sgiliau gwyddonol. Gall y prosiectau fod yn rhai sy’n seiliedig ar waith labordy neu waith maes, neu’n astudiaethau dadansoddi data, ond bydd y cyfan yn eich helpu i ddatblygu sgiliau dadansoddi uwch. 

Yn ychwanegol at y modiwlau craidd a ddisgrifir uchod, cewch gyfle i ddethol modiwlau eraill sy’n cyd-fynd â’ch diddordebau chi. Rydym yn cynnig ystod eang o fodiwlau yn yr ail flwyddyn a’r flwyddyn olaf ac efallai y byddwch am ystyried pynciau nad ydych wedi meddwl amdanynt o’r blaen.

Sut bydda i'n cael fy addysgu? 

Nid darlithoedd ac arholiadau yw popeth yma yn Aberystwyth. Rydym yn rhoi pwyslais mawr ar waith maes ac ymarferol er mwyn gadael i chi faeddu eich dwylo ac adeiladu sgiliau ymarferol a dadansoddol. Mae'r sgiliau hyn yn hanfodol ar gyfer dilyn gyrfa ym maes Biowyddorau ac addysgu, ond maent hefyd yn gwneud graddedigion Bioleg yn bobl ddeniadol i gyflogwyr mewn llawer o sectorau eraill. Mae seminarau, tiwtorialau a chyrsiau maes preswyl hefyd yn chwarae rôl wrth addysgu yma. Ein nod yw gwneud popeth a wnawn yn gwbl hygyrch i bawb, ac mae ein staff addysgu a'n staff cymorth yn ymroddedig i hyn.

Sut bydda i'n cael fy asesu?

Wrth gwrs, mae'n rhaid sefyll arholiadau, ond mae gan bob modiwl fwy nag un math o asesiad. Mae asesiadau gwaith cwrs yn amrywio o adroddiadau ymarferol neu adroddiadau maes i ysgrifennu erthyglau sy'n gweddu i gyfnodolyn a gwneud podlediadau. Mae ein hasesiadau wedi'u cynllunio nid yn unig i brofi eich gwybodaeth a'ch dealltwriaeth, maent hefyd yn adeiladu sgiliau ar gyfer y byd go iawn, er enghraifft sgiliau gwaith tîm, cyflwyno ac ysgrifennu adroddiadau sydd eu hangen mewn unrhyw swydd raddedig. Pan fyddwn yn addysgu ac yn arholi, rydym yn anelu at greu gwyddonwyr y dyfodol a darpar gyflogeion o'r radd flaenaf ar yr un pryd.

Tiwtor Personol

Bydd tiwtor personol yn cael ei bennu i chi, a’r tiwtor hwn fydd eich prif berson cyswllt yn ystod eich astudiaethau. Bydd eich tiwtor personol yn gallu cynnig cymorth wth ichi ymgartrefu pan fyddwch yn cyrraedd yma gyntaf, ac fe fydd ar gael i'ch cynorthwyo gydag unrhyw beth yn dilyn hynny, ar lefel academaidd neu bersonol.