Busnes a Rheolaeth a Chyfrifiadura

Pam astudio Rheoli Busnes a Chyfrifiadureg ym Mhrifysgol Aberystwyth? 

Ar ôl cwblhau'r radd hon bydd gennych ddealltwriaeth eang o reoli ymarferol, gwybodaeth fanwl am fasnach yn y sector cyhoeddus a'r sector preifat, a gafael gadarn ar gymhlethdod heriau rheoli ac effeithiau cyfunol y materion economaidd, ariannol, dynol a chyfreithiol sy’n wynebu arweinwyr.

Mae'r radd Rheoli Busnes wedi'i hachredu gan y Sefydliad Rheolaeth Siartredig (CMI), a’r fantais i chi yw, ar ôl graddio, y byddwch yn gymwys i gael eithriadau rhag gorfod ennill rhai cymwysterau os ydych am gael achrediad proffesiynol yn y dyfodol. Ar ben hynny, mae elfen gyfrifiadurol y cwrs hwn wedi'i hachredu gan y Sefydliad Siartredig TG (BCS) ar ran y Cyngor Peirianneg, sy'n golygu y gallwch ddatblygu'r sgiliau sydd eu hangen i ddatrys problemau cymhleth sy'n cynnwys dadansoddi, dylunio, dod o hyd i atebion i ddatrys problemau, a’u gweithredu.

Mae'r gydnabyddiaeth hon gan y gwahanol gyrff proffesiynol yn dangos ansawdd dysgu'r ddwy adran academaidd, gan sicrhau y byddwch yn graddio gyda'r radd orau bosib, elfen y mae Prifysgol Aberystwyth yn manteisio arni wrth anelu at ei nod o ddarparu dysgu o safon ragorol. 

Bydd myfyrwyr ar y cwrs hwn yn cael y cyfle i gael profiad o labordai pwrpasol ar gyfer Linux, Mac OS X ac o weinyddwyr canolog, yn ogystal ag offer roboteg gan gynnwys Arduinos, robotiaid symudol a robotiaid hwylio.

O ystyried natur ymarferol y radd hon, cewch eich dysgu gan ymarferwyr yn academia ac ym myd diwydiant, sy’n sicrhau y cewch gyfle i ymdrwytho yn y pwnc ochr yn ochr â gweithwyr proffesiynol a'u rhwydweithiau cysylltiedig. 

Ein Staff

Caiff myfyrwyr Ysgol Fusnes Aberystwyth eu dysgu gan ddarlithwyr a staff dysgu eraill sy'n weithgar mewn gwaith ymchwil ac yn ymarferwyr arbenigol yn eu dewis maes. 

Mae gan dros 75% o’r aelodau o staff sy’n dysgu’n llawn amser gymhwyster hyd at lefel PhD. Ar hyn o bryd mae'r rhan fwyaf ohonynt yn weithgar mewn gwaith ymchwil, sy'n golygu bod myfyrwyr yn elwa o gael dysgu gwybodaeth 'newydd' yn eu dewis maes yn ogystal ag astudio testunau cydnabyddedig. Mae'r Ysgol hefyd yn cyflogi staff rhan-amser a llawn amser sydd wedi'u neilltuo ar gyfer dysgu yn unig.  Mae llawer o’r staff rhan-amser yn cyfuno dyletswyddau dysgu gyda gwaith ymgynghori a gweithgareddau busnes, gan sicrhau bod myfyrwyr yn gallu cael gafael nid yn unig ar yr ymchwil ddiweddaraf ond hefyd yr wybodaeth gymhwysol ddiweddaraf.

Mae gan bron bob un o ddarlithwyr yr Adran Cyfrifiadureg gymwysterau hyd at safon PhD, ac mae gan y gweddill brofiad helaeth ym maes ymchwil neu ddiwydiant. Mae'n rhaid i bob darlithydd newydd ennill cymhwyster TUAAU, ac felly maent yn Gymrodyr Uwch neu'n Gymrodyr o'r Academi Addysg Uwch. Mae'r adran hefyd yn cyflogi nifer o staff arddangos a thiwtoriaid rhan amser a rhai arddangoswyr sy'n fyfyrwyr, wedi’u dewis o blith ein hisraddedigion a'n huwchraddedigion. Mae ein cymrodyr ymchwil a'n cynorthwywyr ymchwil (y rhan fwyaf ohonynt â gradd PhD) hefyd yn gwneud rhywfaint o waith dysgu o bryd i'w gilydd pan fo hynny'n briodol.

Mae'r BSc Rheoli Busnes a Chyfrifiadureg yn darparu sylfaen ardderchog ar gyfer gyrfa broffesiynol mewn busnes, rheolaeth neu gyfrifiadureg. Mae Ysgol Fusnes Aberystwyth yn cynnig modiwl ymgynghoriaeth / cyflogadwyedd pwrpasol lle mae myfyrwyr yn gwneud cais i gystadlu i fod yn aelodau o dîm o ymgynghorwyr i gwmni o fewn eu dewis ddiwydiant.

Mae ein graddedigion i’w cael mewn amryw yrfaoedd proffesiynol; mae rhai o'r diwydiannau allweddol yn cynnwys bancio buddsoddi, rheoli risg, yswiriant a gwarantu. Yn yr un modd, mae galw mawr am ein graddedigion mewn swyddi rheoli mwy cyffredinol, gan gynnwys rheoli manwerthu, y sector cyhoeddus, y GIG, dosbarthu a rheoli logisteg.

Byddwch yn graddio gydag ystod eang o sgiliau busnes a chyfrifiadura a fydd yn golygu y gallwch weithio mewn amryw swyddi, gan gynnwys dadansoddwr systemau, peiriannydd meddalwedd, rheolwr neu ymgynghorydd TG. Gallech ddewis gweithio mewn busnes, y sector cyhoeddus neu'r sector nid-er-elw ac mae graddedigion diweddar wedi mynd ymlaen i weithio i BAE Systems, Barclays, Experian, Microsoft a'r Weinyddiaeth Amddiffyn.

Bydd astudio ein cwrs gradd mewn Rheoli Busnes a Chyfrifiadureg yn rhoi’r sgiliau canlynol i chi: 

• Deall ymddygiad a strwythur sefydliadau
• Gallu defnyddio sgiliau dadansoddi a meddwl creadigol ar gyfer gwneud penderfyniadau lefel uchel a datrys problemau
• Sgiliau rhifedd gwell a'r gallu i ymchwilio, dehongli a defnyddio data busnes ac ariannol 
• Y gallu i gyfathrebu'n glir yn ysgrifenedig ac ar lafar i hwyluso gwaith tîm a gwaith annibynnol llwyddiannus.