Astudiaethau Treftadaeth Ddiwylliannol: Llyfrgelloedd, Archifau ac Amgueddfeydd

Mae elfen hanesyddol gref i’r cwrs Astudiaethau Treftadaeth Ddiwylliannol ac mae'n golygu y gallwch gyfuno’ch diddordeb mewn hanes â dealltwriaeth ymarferol a damcaniaethol o sut mae gwybodaeth yn cael ei gwerthfawrogi a'i defnyddio gan bobl o bob cefndir – yn hanesyddol, addysgol a chymdeithasol. Mae'r radd hon, a gynigir ar y cyd gan yr Adran Hanes a Hanes Cymru a'r Adran Astudiaethau Gwybodaeth, yn manteisio ar ein cryfderau hirsefydlog mewn hyfforddiant proffesiynol ym meysydd astudiaethau gwybodaeth a llyfrgelloedd, archifau, a rheoli cofnodion, ochr yn ochr â Hanes a Hanes Cymru.  

Cewch hyfforddiant mewn rheoli a defnyddio gwybodaeth, adnoddau treftadaeth, archifau a chofnodion - yn wrthrychau corfforol ac ar fformatau digidol fel ei gilydd. Byddwch hefyd yn datblygu sgiliau wrth gymhwyso technoleg gwybodaeth yn y maes hwn. Mae'r cynllun gradd hwn yn hybu’ch gallu i gynnal ymchwil, i archwilio a dadansoddi, ac i leisio’ch syniadau.  

Dyma rai o'r cyfleoedd sydd ar gael i fyfyrwyr Astudiaethau Treftadaeth Ddiwylliannol yn Aberystwyth: 

• astudio mewn tref hanesyddol 'gyfoethog o ran gwybodaeth' sy'n gartref i Lyfrgell Genedlaethol Cymru (un o ddim ond pum llyfrgell hawlfraint yn y Deyrnas Unedig sy’n ymgorffori Archif Genedlaethol Sgrin a Sain Cymru) ac sy’n cynnal arddangosfeydd ar ddiwylliant a threftadaeth Cymru yn rheolaidd); Cyngor Llyfrau Cymru 
• Comisiwn Brenhinol Henebion Cymru, Amgueddfa Ceredigion, llyfrgelloedd ac archifau'r Brifysgol, ac amrywiaeth o adnoddau a sefydliadau perthnasol eraill 
• cael eu dysgu gan arbenigwyr yn eu maes.

Ein Staff

Mae gan ddarlithwyr yr Adran Astudiaethau Gwybodaeth naill ai gymwysterau hyd at safon PhD neu maent yn gweithio mewn agweddau ar y pwnc lle mae'r pwyslais ar ymarfer proffesiynol. Mae llawer o'r staff yn gwneud ymchwil sy'n berthnasol i ddatblygiad damcaniaethol ac ymarferol y ddisgyblaeth a'r proffesiynau cysylltiedig. I ganfod mwy am ein staff, ewch i'n tudalen staff yr adran.

Mae staff yr Adran Hanes a Hanes Cymru yn ymchwilwyr gweithgar ac yn arbenigwyr yn eu meysydd Hanes. Mae’r mwyafrif wedi cymhwyso gyda PhD ac mae ganddynt TUAAU hefyd. I ganfod mwy am ein staff, ewch i’n tudalen staff yr adran.

Bydd graddedigion y radd hon wedi cael eu paratoi'n dda at yrfa mewn sefydliad diwylliannol, neu mewn swydd weinyddol sy’n cynnwys cyfrifoldeb am gadw cofnodion. Ac enwi ychydig o enghreifftiau, byddai hefyd yn berthnasol i'r rhai sy'n ystyried gweithio fel cynorthwyydd archifol neu sydd am gael hyfforddiant proffesiynol ôl-raddedig mewn gweinyddu archifau a rheoli cofnodion.