Cymraeg / Mathemateg

O ddewis astudio Cymraeg a Mathemateg byddwch yn perthyn i ddwy adran sydd wedi’u hen sefydlu, a chanddynt dros gan mlynedd o brofiad o ymchwilio a dysgu. Ochr yn ochr â’r traddodiad hwn, ceir addysgu dynamig sy’n procio’r meddwl yn y ddwy adran. 

Aberystwyth oedd y Brifysgol gyntaf i ddysgu Mathemateg yng Nghymru ac ers hynny bu’n darparu addysg o'r ansawdd orau mewn amgylchedd sy'n gyfeillgar a chefnogol gyda’r nod o droi Mathemateg ac Ystadegau yn gymwysiadau ymarferol. Adran y Gymraeg ac Astudiaethau Celtaidd Prifysgol Aberystwyth yw’r hynaf o’i bath yn y byd. Mae wedi bod yn addysgu ac yn ysbrydoli cenedlaethau o fyfyrwyr ers y cychwyn cyntaf. Mae’r Adran yn arwain y sector mewn meysydd fel ysgrifennu creadigol, y Gymraeg yn y gweithle proffesiynol ac astudiaethau cyfieithu. 

 Ar fodiwlau Cymraeg y radd hon, cyflwynir pynciau deniadol, diddorol a pherthnasol i’n ffordd o weld Cymru a’r byd drwy’r Gymraeg, ac mae’r cynllun gradd hwn yn cynnwys llwybrau Ail Iaith ac Iaith Gyntaf. Bydd modiwlau Mathemateg y radd yn datgelu disgyblaeth ddiddorol a heriol sy’n amlygu sut mae mathemateg yn hanfodol bwysig i gymdeithas fodern ac yn cyfrannu at nifer o agweddau ar fywyd, gan gynnwys gwyddoniaeth, peirianneg, technoleg a chyllid. Cewch eich cyflwyno i ddisgyblaethau craidd hanfodol y pwnc, wedi'u hategu gan gasgliad gwych o fodiwlau dewisol.

Ein Staff

Mae holl staff academaidd Adran y Gymraeg ac Astudiaethau Celtaidd yn ysgolheigion sy'n gwneud gwaith ymchwil ac yn arbenigwyr yn eu dewis feysydd astudio, gan gynnwys astudiaethau iaith a llenyddiaeth yn ogystal ag ysgrifennu creadigol.

Mae’r holl ddarlithwyr yn yr Adran Mathemateg wedi’u cymhwyso i lefel PhD ac yn weithgar ym myd ymchwil. Mae gan y rhan fwyaf gymhwyster addysgu uwchraddedig ac mae’n rhaid i staff newydd gwblhau’r TUAAU. Mae’r adran hefyd yn cyflogi nifer o diwtoriaid rhan-amser, sydd â phrofiad dysgu eang, a rhai arddangoswyr sy’n cael eu dewis o blith ein myfyrwyr israddedig ac uwchraddedig.

Beth gallaf ei wneud â gradd mewn Cymraeg / Mathemateg? 

Mae graddedigion y Gymraeg yn mynd ymlaen i swyddi ardderchog. Mae llawer yn mynd ymlaen i fyd addysg, tra bo’r cyfryngau Cymraeg yn denu llawer i berfformio, gweinyddu a chynhyrchu. Aiff rhai o raddedigion yr adran i weithio mewn meysydd fel gwaith cymdeithasol a’r gyfraith. Yn sgil Deddf yr Iaith Gymraeg a sefydlu’r Cynulliad Cenedlaethol cynyddodd y galw am weision sifil sy’n medru’r Gymraeg, ac am bobl i gyfieithu ac i weinyddu mewn sawl cylch. 

Mae astudio Mathemateg yn eich paratoi ar gyfer ystod eang o swyddi lle croesewir sgiliau dadansoddol a chyfrifiadurol yn benodol. Mae ein myfyrwyr bellach yn cael eu cyflogi ym meysydd cyfrifeg a bancio, yswiriant ac mewn cwmnïau actiwari, adrannau addysgu, meddygol ac ystadegau’r llywodraeth, gweithgynhyrchu awyrofod, a llawer o feysydd eraill. 

Byddwch hefyd yn dod yn rhan o bwll o raddedigion y mae galw mawr amdanynt ar draws llawer o ddiwydiannau am eu sgiliau datrys problemau, eu prosesau meddwl dadansoddol clir, a'u gallu i lunio dadl resymegol. 

Yn ystod y cwrs, byddwch yn datblygu llu o sgiliau trosglwyddadwy - sgiliau y mae cyflogwyr yn eu gwerthfawrogi'n fawr. Dyma rai enghreifftiau: 

• mynegi syniadau a chyfathrebu gwybodaeth yn glir a threfnus, ar lafar ac yn ysgrifenedig 
• meddwl yn greadigol a datrys problemau’n effeithlon 
• ymchwilio a dadansoddi data 
• sgiliau mathemategol a chyfrifiadurol uwch 
• sylfaen drylwyr mewn technoleg gwybodaeth 
• gweithio’n annibynnol 
• hunangymhelliant a hunanddibyniaeth 
• gwaith tîm, gallu trafod cysyniadau mewn grwpiau, gan drafod amrywiol syniadau a dod i gytundeb 
• trefnu a rheoli amser, gan gynnwys y gallu i gwrdd â therfynau amser tynn. 

Bydd y sgiliau ymchwilio a dadansoddi y byddwch wedi eu datblygu dros gyfnod eich cwrs gradd hefyd yn sail cadarn i astudio’n uwchraddedig ac am yrfa yn y byd academaidd. 

Pa gyfleoedd sydd ar gael i wneud profiad gwaith wrth astudio? 

Cliciwch yma i ddysgu am y gwahanol gyfleoedd y mae tîm Gyrfaoedd Prifysgol Aberystwyth yn eu cynnig. 

Gwella'ch cyfleoedd cyflogaeth gyda GO Wales a BMG (y cynllun Blwyddyn mewn Gwaith) sy'n cael eu rheoli gan ein hadran Gyrfaoedd.