Cymraeg y Gweithle Proffesiynol / Busnes a Rheolaeth

Yn y flwyddyn gyntaf cewch eich cyflwyno i'r prif themâu sy’n greiddiol i astudio Cymraeg y Gweithle Proffesiynol ac i hanfodion y byd Busnes a Rheolaeth. 

Yn dibynnu ar y llwybr y byddwch yn ei ddilyn (iaith gyntaf neu ail iaith) byddwch yn astudio defnydd a chyweiriau'r iaith gyfoes mewn amgylchiadau amrywiol ac fe gewch eich cyflwyno i egwyddorion sylfaenol Cymraeg safonol drwy ganolbwyntio ar gyweiriau’r iaith, ynghyd â nodweddion megis confensiynau sillafu, ffurfiau’r iaith lenyddol, y treigladau a phriod-ddulliau. Cewch gyfle i feithrin eich sgiliau ysgrifenedig, ac i atgyfnerthu eich dealltwriaeth o ramadeg y Gymraeg. Cewch hefyd ddethol o blith pynciau eraill sy’n ennyn eich diddordeb. Ym maes busnes a rheolaeth, cewch eich cyflwyno i amrywiaeth o hanfodion marchnata a ffurfiau cyfoes ar farchnata, er enghraifft brandio, a marchnata digidol, ac i hanfodion cyfrifeg a chyllid. Byddwch hefyd yn edrych ar sefydliadau a’r berthynas rhwng rheolwyr a threfniadaeth, o safbwynt damcaniaethol a sefyllfaoedd go iawn. Bydd dysgu am hanes a natur marchnata fel disgyblaeth busnes craidd a phwnc academaidd yn fodiwl craidd yn ogystal. 

Yn yr ail flwyddyn, yn dibynnu ar y llwybr iaith y byddwch yn ei ddilyn, byddwch yn gweithio ar feithrin eich gallu i ysgrifennu'r Gymraeg yn safonol a chywir ac i'w llefaru'n raenus, gan adeiladu ar yr hyn a ddysgwyd yn y flwyddyn gyntaf. Byddwch hefyd yn astudio gwahanol agweddau ar gyfieithu ac addasu llenyddol, technegol, hanesyddol ac ymarferol. Cewch hefyd astudio modiwlau dewisol megis Cymraeg llyfr a Chymraeg llafar a Chymraeg y gweithle proffesiynol sy’n canolbwyntio ar y defnydd cynyddol a wneir o’r Gymraeg yn y byd gwaith yng Nghymru.  

Ym maes busnes a rheolaeth cewch gyflwyniad i amrywiaeth o bynciau ar thema rheoli gweithrediadau a chadwyni cyflenwi, a byddwch yn edrych ar y cysyniadau allweddol a ddefnyddir i arwain, ysgogi, rheoli a gwobrwyo pobl mewn sefydliadau heddiw. 

Yn y flwyddyn olaf, yn dibynnu unwaith eto ar y llwybr iaith, byddwch yn parhau i ddatblygu eich dealltwriaeth o’r gwahanol agweddau ar gyfieithu ac addasu llenyddol, technegol, hanesyddol ac ymarferol gan adeiladu ar yr hyn a ddysgwyd yn yr ail flwyddyn, ac fe gewch gyfle i ymgymryd ag ymchwil wreiddiol o dan arweiniad goruchwyliwr.  

Ym maes busnes a rheolaeth, byddwch yn dysgu am bwysigrwydd strategaeth fusnes i gwmnïau, i randdeiliaid ac i'r gymuned fusnes yn ehangach. Byddwch hefyd yn dysgu am rôl strategaeth ariannol wrth wneud penderfyniadau ynghylch buddsoddi, ariannu a phennu adnoddau. Ceir hefyd opsiwn i gwblhau modiwl profiad gwaith yn ystod y tymor neu yn ystod yr haf (rhwng yr ail a’r drydedd flwyddyn): Sgiliau Cyflogadwyedd ar gyfer Gweithwyr Proffesiynol. Cefnogir y modiwl yma trwy gynnal seminarau cyfrwng Cymraeg yn hytrach na darlithoedd.

Byddwch yn gallu dewis o blith amrywiaeth eang o fodiwlau dewisol yn ogystal. 

Sut byddwch chi’n cael eich addysgu? 

Fe'ch addysgir trwy gyfuniad o ddarlithoedd traddodiadol, seminarau a dulliau dysgu arloesol eraill. Ceir awyrgylch anffurfiol yn y seminarau, er mwyn meithrin trafodaeth fwy agored.

Sut byddwch chi'n cael eich asesu?

Bydd eich gwaith yn cael ei asesu ar ffurf traethodau, cyflwyniadau, arholiadau, asesu cyson, ymarferion penodol, gwaith ymchwil a datblygu syniadau, rhoi cyflwyniadau, a gweithio'n rhan o dîm. 

Tiwtor Personol 

Bydd tiwtor personol yn cael ei bennu ichi am gyfnod cyfan eich cwrs gradd. Bydd y tiwtor yn gallu eich helpu gydag unrhyw broblemau neu ymholiadau, yn faterion academaidd neu bersonol. Mae croeso ichi gysylltu â'ch tiwtor personol ar unrhyw adeg os byddwch angen cymorth arnoch.