Cymraeg / Cysylltiadau Rhyngwladol

Ar y cwrs hwn, byddwch yn rhannu'ch amser rhwng Adran y Gymraeg ac Astudiaethau Celtaidd a’r Adran Gwleidyddiaeth Ryngwladol - dwy adran uchel iawn eu bri. Mae’r ddwy adran wedi eu sefydlu ers canrif a mwy ond wedi symud gyda’r amser er mwyn cynnig cyrsiau arloesol sy’n berthnasol i'r ugeinfed ganrif ar hugain. 

Byddwch yn astudio modiwlau Cymraeg sy'n dod o dan brif themâu arbenigedd staff sy’n dysgu ar ein graddau Cymraeg, sef ysgrifennu creadigol, y Gymraeg yn y gweithle proffesiynol ac astudiaethau cyfieithu. Mae Cysylltiadau Rhyngwladol yn bwnc hollol ddeinamig a bydd y modiwlau yn adlewyrchu bywiogrwydd, egni a datblygiadau byd sy’n newid yn gyflym. Mae’r cyfuniad o addysgu rhagorol ac ymchwil gyffrous yn y ddwy adran yn creu profiad unigryw ac eithriadol ar y cwrs, a hynny mewn awyrgylch cyfeillgar. Ceir cyfle o bob math hefyd i ddatblygu sgiliau trosglwyddadwy a fydd yn cynyddu eich cyfleoedd gyrfa. 

Ar y modiwlau Cymraeg, byddwch yn dyfnhau eich dealltwriaeth o’r iaith, ei llenyddiaeth gyfoethog, a’i diwylliant, gyda modiwlau sy’n amrywio o hanes ein llên i lenyddiaeth gyfoes, ac o gymdeithaseg yr iaith Gymraeg i ysgrifennu creadigol a sgriptio. At hynny, byddwch yn dod yn rhan o’r bwrlwm Cymraeg a Chymreig a geir yn yr Adran. Ar y modiwlau Cysylltiadau Rhyngwladol byddwch yn astudio themâu megis grym a chyfiawnder, gwrthdaro a chydweithio. Byddwch yn astudio cyflwr dynoliaeth a’r modd y mae cymdeithasau dynol yn ymwneud â’i gilydd ac yn delio â phob math o newidiadau byd-eang, yn economaidd, diwylliannol a gwleidyddol. Mae Cysylltiadau Rhyngwladol yn bwnc cyffrous a rhyngddisgyblaethol sy’n cynnwys Gwleidyddiaeth, Hanes, Athroniaeth, y Gyfraith, Daearyddiaeth a Chymdeithaseg er mwyn ceisio deall y byd o’n cwmpas a’r problemau sy’n ei wynebu. 

Ein Staff

Mae holl staff academaidd Adran y Gymraeg ac Astudiaethau Celtaidd yn ysgolheigion sy'n gwneud gwaith ymchwil ac yn arbenigwyr yn eu dewis feysydd astudio, gan gynnwys astudiaethau iaith a llenyddiaeth yn ogystal ag ysgrifennu creadigol.

Mae pob un o ddarlithwyr yr Adran Gwleidyddiaeth Ryngwladol yn ymchwilwyr gweithgar ac mae ganddynt gymwysterau hyd at safon PhD, ac mae gan y rhan fwyaf hefyd TUAAU.

Mae graddedigion y cwrs hwn yn mynd ymlaen i swyddi ardderchog. Mae llawer yn mynd ymlaen i fyd addysg, i'r swyddfa dramor, y weinyddiaeth amddiffyn a'r adran sy'n ymwneud â datblygiad rhyngwladol o fewn y gwasanaeth sifil, sefydliadau rhyngwladol, a mudiadau anllywodraethol. Mae eraill yn mynd i faes ymchwil wleidyddol gyda chwmniau preifat yn ogystal ag yn San Steffan, Senedd Cymru a Senedd Ewrop. Mae rhai yn cael eu denu i'r cyfryngau Cymraeg, i berfformio, gweinyddu a chynhyrchu. Aiff rhai i weithio mewn meysydd fel gwaith cymdeithasol a’r gyfraith neu newyddiaduraeth, neu i ddilyn gyrfa yn y lluoedd arfog. 

Yn ystod y cwrs, byddwch yn datblygu llu o sgiliau trosglwyddadwy - sgiliau y mae cyflogwyr yn eu gwerthfawrogi'n fawr. Dyma rai enghreifftiau: 

• mynegi syniadau a chyfathrebu gwybodaeth yn glir a threfnus, ar lafar ac yn ysgrifenedig 
• meddwl yn greadigol a datrys problemau’n effeithlon 
• ymchwilio a dadansoddi data 
• sgiliau mathemategol a chyfrifiadurol uwch 
• sylfaen drylwyr mewn technoleg gwybodaeth 
• gweithio’n annibynnol 
• hunangymhelliant a hunanddibyniaeth 
• gwaith tîm, gallu trafod cysyniadau mewn grwpiau, gan drafod amrywiol syniadau a dod i gytundeb 
• trefnu a rheoli amser, gan gynnwys y gallu i gwrdd â therfynau amser tynn. 

Bydd y sgiliau ymchwilio a dadansoddi y byddwch wedi eu datblygu dros gyfnod eich cwrs gradd hefyd yn sail cadarn i astudio’n uwchraddedig ac am yrfa yn y byd academaidd. 

Pa gyfleoedd sydd ar gael i wneud profiad gwaith wrth astudio? 

Cliciwch yma i ddysgu am y gwahanol gyfleoedd y mae tîm Gyrfaoedd Prifysgol Aberystwyth yn eu cynnig. 

Gwella'ch cyfleoedd cyflogaeth gyda GO Wales a BMG (y cynllun Blwyddyn mewn Gwaith) sy'n cael eu rheoli gan ein hadran Gyrfaoedd.