Biowyddor Ceffylau a Milfeddygol

Beth fydda i’n ei ddysgu?    

Yn y flwyddyn gyntaf byddwch yn astudio modiwlau sylfaen a fydd yn datblygu’ch gwybodaeth am fioleg ac yn eich paratoi ar gyfer astudio Biowyddorau Ceffylau a Milfeddygol yn ystod tair blynedd nesaf eich gradd. 

Yn eich ail flwyddyn, cewch gyflwyniad i anatomeg a ffisioleg y ceffyl, ac i effeithiau ymarfer corff a hyfforddiant ar systemau corfforol penodol. Byddwch yn edrych ar fioleg swyddogaethau corfforol allweddol mewn da byw, ceffylau ac anifeiliaid anwes, gan gynnwys treulio, atgenhedlu, twf, datblygu a llaetha. Byddwch yn astudio pynciau biolegol megis geneteg, metabolaeth, bywyd microbaidd a micro-organebau. Darperir sesiynau ymarferol, yn cyfuno sgiliau trin anifeiliaid â hyfforddiant ar gyfer yr arholiadau,  gan roi profiad uniongyrchol o'r technegau a ddefnyddir wrth wneud gwneud diagnosis, pennu triniaethau posib a rheoli'r amgylchedd. 

Bydd opsiwn i fynd ar daith astudio ceffylau sy’n cynnwys ymweliadau ag amrywiaeth o gyrff masnachol gan gynnwys stablau hyfforddi rasio, bridfeydd a mentrau cysylltiedig megis traciau rasio a gwerthiannau. Mae’n bosib bydd yn cynnwys mentrau eraill megis labordai milfeddygol, milfeddygfeydd neu ysgolion milfeddygol, digwyddiadau chwaraeon ceffylau, canolfannau bridio a/neu hyfforddi ceffylau nad ydynt yn bedigri, a thai arwerthu.   

Yn eich trydedd flwyddyn byddwch yn edrych ar bynciau fel maeth cymhwysol ceffylau a da byw, ac anatomeg atgenhedlu a ffisioleg atgenhedlu mamaliaid. Byddwch yn magu dealltwriaeth o ymatebion imiwnedd mewn pobl ac mewn anifeiliaid a drinnir gan filfeddygon, a byddwch yn dod yn gyfarwydd â therminoleg filfeddygol a chanllawiau lles ar gyfer gofalu am anifeiliaid sâl a rhai sydd wedi'u hanafu. Cynhelir sesiynau ymarferol ar archwilio anifeiliaid sâl ac ar ddulliau o wneud diagnosis ar glefydau.  

Yn ystod eich blwyddyn olaf, byddwch yn astudio lles anifeiliaid a dulliau asesu lles, a byddwch yn adeiladu ar eich gwybodaeth am imiwnoleg drwy edrych ar sut mae clefydau heintus yn lledaenu a sut y gellir eu rheoli. Byddwch hefyd yn astudio ffarmacoleg filfeddygol ac yn magu dealltwriaeth am gyffuriau milfeddygol a’r strategaethau triniaeth gysylltiedig o safbwynt eu biocemeg, eu darganfyddiad, eu defnydd yn ymarferol a'r ddeddfwriaeth berthnasol. Bydd prosiect ymchwil gorfodol yn rhoi cyfle i chi i wneud ymchwil fanwl o dan arweiniad arolygydd.  Gall eich prosiect fod yn seiliedig ar arbrofion yn y labordy neu ymarferion gwaith maes, ac fe gall gynnwys elfen o ymarfer modelu cyfrifiadurol neu ddadansoddi data.    

Sut fydda i'n cael fy nysgu?  

Fe’ch dysgir drwy amrywiaeth o ddulliau gan gynnwys darlithoedd, seminarau, gweithdai, sesiynau ymarferol, ymweliadau maes a gwaith labordy. Byddwch yn cael eich hyfforddi’n drylwyr mewn cysyniadau, ymchwil a methodoleg sy'n ymwneud â gwyddor ceffylau. Byddwch yn ymgymryd â'r dysgu hwn drwy ymchwil ac arbrofi yn y labordy, yn ogystal â gwaith ymarferol.   

Asesu  

Cewch eich asesu drwy amryw ddulliau gan gynnwys traethodau, gweithgareddau ymarferol ac adroddiadau, cyflwyniadau, posteri, adroddiadau labordy, arholiadau, portffolios, dyddiaduron adfyfyrio, dadansoddiadau ar borthiant a/neu ymarferion dogni, erthyglau cylchgrawn, gwe-dudalennau a phodlediadau. 

Tiwtor Personol 

Bydd tiwtor personol yn cael ei neilltuo i chi, a’r person hwn fydd eich prif gyswllt trwy gydol eich astudiaethau. Bydd eich tiwtor personol yno i’ch helpu i ymgartrefu pan fyddwch yn cyrraedd gyntaf, a bydd wrth law i’ch helpu gyda materion academaidd neu faterion personol.