Ffrangeg / Mathemateg

Pam astudio Ffrangeg/Mathemateg ym Mhrifysgol Aberystwyth?

• Mae ystod eang o arbenigedd ar gael yn yr Adran, ac mae hyn i'w weld yn y dewis o fodiwlau rydym yn eu cynnig. Gallai myfyrwyr ddewis modiwlau ar ieithyddiaeth (fodern a hanesyddol); dialecteg (astudiaeth o wahanol ffurfiau ar Ffrangeg, o'r gorffennol a'r presennol); llenyddiaeth; hanes syniadau a mudiadau artistig; portreadau llenyddol o Baris, llenyddiaeth teithio a materion cyfoes.
• B ydd pob myfyriwr ar y cwrs hwn yn treulio eu trydedd flwyddyn yn byw'n annibynnol mewn gwlad lle siaredir Ffrangeg. Gallech ddewis astudio yn y Brifysgol, gweithio fel cynorthwyydd iaith, neu ffurfiau eraill ar leoliadau gwaith.
• Mae Mathemateg yn cael ei haddysgu yn Aberystwyth ers 1872, felly mae'r adran yn adeiladu ar dros 140 mlynedd o ragoriaeth addysgu.
• Bydd mathemateg fel pwnc yn rhoi cyfle i chi ddatgelu disgyblaeth sy'n cyfuno nodi a dadansoddi siapau a phatrymau gyda'r gallu i ddadansoddi data yn hyderus.
• Yn ystod y flwyddyn gyntaf, byddwch yn cael cyflwyniad cynhwysfawr i astudiaethau Ffrengig a sgiliau ymchwil perthnasol ar ffurf tiwtorialau. 
• Byddwch yn dod yn fyfyriwr mewn Adran Ieithoedd Modern a sgoriodd 93% ar gyfer bodlonrwydd myfyrwyr yn Arolwg Cenedlaethol o Fyfyrwyr 2017 (ACF, 2017), sy'n dangos ein hymrwymiad i roi profiad cofiadwy a gwerthfawr i chi. Mae'r Adran Fathemateg hefyd wedi cael sgôr bodlonrwydd cyffredinol myfyrwyr o 100% (ACF 2018). 
• Yn ystadegol, mae graddedigion Ieithoedd Modern ymhlith y graddedigion mwyaf cyflogadwy. Yn adroddiad Cyrchfannau Ymadawyr Addysg Uwch 2017 a gyhoeddwyd yn 2018, nodwyd bod gradd mewn Ieithoedd Modern yn cynnig llwybr clir tuag at swydd neu astudiaeth bellach. Yn ein hadran ni, roedd 95% o'n graddedigion mewn gwaith neu astudiaeth bellach ymhen 6 mis ar ôl graddio (HESA 2018). O'r Adran Fathemateg, roedd 96% o'r myfyrwyr a raddiodd yn 2017 mewn gwaith neu astudiaeth bellach ymhen 6 mis ar ôl graddio, ac mae'r ffigur hwn 4% yn uwch na'r canran cyfartalog ar gyfer myfyrwyr Mathemateg (HESA 2018). Yn ogystal, bu i'r Canllaw Prifysgolion Da a gyhoeddir gan y Times a'r Sunday Times ein gosod ymhlith y deg adran orau o ran rhagolygon graddedigion (canlyniadau cyflogaeth) ar gyfer pwnc Ffrangeg. Mae ein dull pwrpasol o addysgu yn sicrhau y bydd eich cyfnod pontio o'r brifysgol i'r byd gwaith yn un llyfn.
• Mae'r radd hon ar gael i ddechreuwyr a myfyrwyr ar lefel uwch. Bydd dechreuwyr yn cyflawni cwrs dwys yn ystod y flwyddyn gyntaf.

Ein Staff

Mae gan bob un o ddarlithwyr yr Adran Ieithoedd Modern gymwysterau hyd at safon PhD ac maent yn gwneud gwaith ymchwil. Rydym hefyd yn cyflogi tiwtoriaid iaith, rhai ohonynt â gradd PhD, a phob un yn addysgwyr profiadol. O bryd i'w gilydd, cyflogwn siaradwyr brodorol o brifysgolion sy'n bartneriaid i ni dramor (lectoriaid), sy'n dod atom â chymeradwyaeth uchel ar sail eu llwyddiant academaidd yn eu prifysgolion eu hunain, ac mae sawl un ohonynt wedi hyfforddi fel addysgwyr. 

Mae’r holl ddarlithwyr yn yr Adran Mathemateg wedi’u cymhwyso i lefel PhD ac yn weithgar ym myd ymchwil. Mae gan y rhan fwyaf gymhwyster addysgu uwchraddedig ac mae’n rhaid i staff newydd gwblhau’r TUAAU. Mae’r adran hefyd yn cyflogi nifer o diwtoriaid rhan-amser, sydd â phrofiad dysgu eang, a rhai arddangoswyr sy’n cael eu dewis o blith ein myfyrwyr israddedig ac uwchraddedig.

Beth alla i ei wneud gyda gradd mewn Ffrangeg a Mathemateg?

Mae ein graddedigion wedi cael swyddi yn y sectorau canlynol:

• ymgynghori ystadegol
• addysgu
• cyfrifo a bancio
• dadansoddi risg a gwaith actiwaraidd
• rheolaeth ariannol a dadansoddi buddsoddiadau
• technoleg gwybodaeth a gwyddor data
• cyfieithu a chyfieithu ar y pryd
• marchnata a chyfathrebu.

Sgiliau Trosglwyddadwy

Bydd astudio am radd mewn Ffrangeg a Mathemateg yn eich paratoi gydag ystod o sgiliau trosglwyddadwy sy'n werthfawr iawn i gyflogwyr. Mae'r rhain yn cynnwys:

• y gallu i fynegi syniadau a chyfleu gwybodaeth mewn modd clir a threfnus, yn ysgrifenedig ac ar lafar
• sgiliau datrys problemau a meddwl creadigol effeithiol
• y gallu i weithio'n annibynnol
• sgiliau trefnu a rheoli amser, gan gynnwys y gallu i weithio i derfynau amser
• hunanddibyniaeth a'r gallu i ysgogi eich hun
• y gallu i weithio mewn tîm a thrafod cysyniadau mewn grwpiau, a rhoi lle i syniadau gwahanol a dod i gytundeb
• sgiliau ymchwil.

Beth fydda i'n ei ddysgu?

Bydd y crynodeb isod yn rhoi darlun i chi o'r hyn y gallech ei astudio yn ystod y cynllun gradd pedair blynedd.

Yn ystod eich pedair blynedd, bydd gennych bedair awr wythnosol o waith iaith, sy'n cynnwys gwaith:

• llafar
• ysgrifenedig
• clywedol
• cyfieithu.

Yn ystod y flwyddyn gyntaf, byddwch yn archwilio:

• cyflwyniad i astudiaethau llenyddol a gwareiddiad
• ffilm Ewropeaidd
• algebra a chalcwlws
• geometreg
• tebygolrwydd differol ac ystadegau
• gwleidyddiaeth a diwylliant ieithyddol ledled Ewrop.

Yn ystod eich ail flwyddyn, byddwch yn archwilio:

• y posibilrwydd o wneud prosiect ymchwil annibynnol
• yr opsiwn o astudio modiwlau iaith arbenigol (iaith busnes ac ati)
• dadansoddi a hafaliadau differol rhannol
• algebra haniaethol a llinol
• modelu ystadegol
• hydrodynameg
• dewis eang o fodiwlau cynnwys ar lenyddiaeth, ffilm a chelf
• materion cyfoes mewn cymdeithasau Ffrengig a Ffrangeg
• dysgu Saesneg i siaradwyr ieithoedd eraill.

Yn ystod eich trydedd flwyddyn, byddwch yn cyflawni eich Blwyddyn Dramor, lle byddwch yn astudio gyda'n Prifysgolion partner o dan Raglen Erasmus +

Yn ystod eich blwyddyn olaf, byddwch yn astudio:

• semanteg a geiriaduraeth
• ieithyddiaeth Ffrangeg
• mudiadau artistig a diwylliannol
• llenyddiaeth Ffrangeg y 18^fed a'r 19^eg Ganrif
• materion cyfoes mewn gwlad lle siaredir Ffrangeg
• prosiect ymchwil annibynnol gorfodol.

Sut bydda i'n cael fy addysgu?

Addysgir ein myfyrwyr drwy gyfrwng darlithoedd, seminarau, a gweithdai iaith.

Rydym yn asesu ein myfyrwyr mewn ystod o ffyrdd, yn dibynnu ar y modiwlau. Yn ein dosbarthiadau iaith, byddwch yn cael eich asesu drwy asesiadau parhaus ac arholiad ar ddiwedd y flwyddyn gyntaf a'r bedwaredd flwyddyn. Asesir ein modiwlau dewisol a gorfodol drwy waith cwrs ar ffurf cyflwyniad a/neu draethawd ac arholiad.

Caiff eich cynnydd ei fonitro'n rheolaidd drwy ymgynghoriadau tiwtorialau a gyda'r Portffolio Datblygiad Personol (PDP). Yn ystod eich blwyddyn olaf, er mwyn eich paratoi ar gyfer bywyd ar ôl y brifysgol, yn lle'r PDP bydd gofyn i chi lunio CV a llythyr eglurhaol yn Ffrangeg.