Astudiaethau Ffilm a Theledu

Pam Astudio Astudiaethau Ffilm a Theledu yn Aberystwyth?

• Adran egnïol a chreadigol lle daw drama a theatr, ffilm a’r cyfryngau, a senograffeg a dylunio theatr ynghyd.
• Tirweddau dysgu cydweddol lle mae’r damcaniaethol a’r ymarferol yn cydblethu.
• Ystod eang o wahanol fodiwlau ymarferol a damcaniaethol mewn ffilm a theledu, o’r ffuglennol i’r dogfennol, ac o’r prif ffrwd i’r arbrofol.
• Staff dysgu rhagorol sy’n ymchwilio’n weithgar ac yn gweithio mewn partneriaeth â sefydliadau allanol.
• Cyfleusterau ac adnoddau rhagorol ar gyfer gwaith ffilm a theledu ymarferol: stiwdio deledu ac oriel diffiniad uchel â 3 chamera ac adnoddau allwedd croma ac awtociw; 30 o systemau golygu – meddalwedd Avid Media Composer, Adobe Premiere Pro a Final Cut Pro; 50 o gamerâu HD o safon a ddefnyddir yn y diwydiant – fformatau P2 ac AVCHD; camerâu DSLR a GoPro ar gael.
• Cysylltiadau â phartneriaid allweddol yn y diwydiant megis y BBC, Gŵyl Ffilmiau Tribeca, S4C, Fiction Factory, Gŵyl Ffilmiau Ryngwladol Caeredin, Gŵyl Ffilmiau Ffresh, BAFTA, Avid ac Arad Goch.
• Cyfleoedd cyfnewid cyffrous yn Ewrop ac yn rhyngwladol.
• Lleoliad daearyddol unigryw.
• Cyfle i ddefnyddio’r archif Sgrin a Sain yn y Llyfrgell Genedlaethol a Chanolfan y Celfyddydau ar y campws.

Ein Staff

Mae holl staff academaidd yr Adran Theatr, Ffilm a Theledu yn gwneud gwaith ymchwil a/neu'n ymwneud â phrosiectau Trosglwyddo Gwybodaeth, ac mae ganddynt naill ai gymwysterau academaidd perthnasol ar lefel doethuriaeth neu brofiad proffesiynol ac arbenigedd cyfatebol.

Beth alla i ei wneud â gradd mewn Astudiaethau Ffilm a Theledu?

Mae llawer o’n graddedigion wedi dod o hyd i swyddi yn y meysydd hyn:

• Ymchwilwyr, golygyddion, rheolwyr llawr, gweithredwyr camera, dylunwyr a chyfarwyddwyr cwmnïau cynhyrchu ffilm a theledu
• Dosbarthu ffilmiau
• Gwneud ffilmiau ar eu liwt eu hunain
• Marchnata a Chysylltiadau Cyhoeddus
• Rhaglennu gwyliau ffilm
• Hysbysebu
• Gweinyddu’r celfyddydau
• Addysg.

Pa sgiliau fydda i’n eu dysgu ar y cwrs?

Mae myfyrwyr yr adran yn dysgu sgiliau trosglwyddadwy y mae galw mawr amdanynt ymhlith cyflogwyr. Yn eu plith mae:

• defnyddio sgiliau creadigol, dyfeisgar a datrys problemau mewn amryw o sefyllfaoedd 
• ymchwilio, a chloriannu a threfnu gwybodaeth 
• saernïo a chyfleu syniadau’n effeithiol mewn amryw o sefyllfaoedd ac mewn amryw o ffyrdd 
• gweithio’n annibynnol a gydag eraill 
• trefnu dy amser a defnyddio dy sgiliau’n effeithiol 
• gwrando ar gyngor beirniadol a’i ddefnyddio 
• dy gymell dy hun ac arfer hunanddisgyblaeth
• defnyddio amryw o sgiliau ac adnoddau technoleg gwybodaeth 
• dangos mentergarwch wrth ddatblygu prosiectau diwylliannol.

Beth fydda i’n ei ddysgu?

Bydd y crynodeb isod yn rhoi darlun i chi o'r hyn y gallwch ei astudio yn ystod y cynllun gradd tair blynedd.

Yn dy flwyddyn gyntaf byddi’n cymryd:

• modiwlau rhagarweiniol craidd ar hanes, damcaniaeth a dadansoddi cynyrchiadau ffilm a theledu
• modiwlau ymarferol sy’n datblygu sgiliau ym mhob cam o’r broses gynhyrchu: sgriptio, ffilmio, cyfarwyddo, a’r golygu terfynol
• dewis o blith modiwlau ar y Sinema Brydeinig, Sinema Glasurol Hollywood ac Astudio’r Cyfryngau.

Yn dy ail flwyddyn cei gyfle i:

• datblygu sgiliau cynhyrchu stiwdio, gwneud ffilmiau dogfen ac ysgrifennu ar gyfer ffilm a theledu
• meithrin gwybodaeth a sgiliau beirniadol allweddol mewn ystod o fodiwlau damcaniaethol sy’n cyd-fynd â’i gilydd ac sy’n cwmpasu sinema Hollywood, gwneud ffilmiau dogfen, sinema gelfyddydol a materion cyfoes yn y diwylliant digidol
• gwella dy ragolygon cyflogadwyedd a dy sgiliau trosglwyddadwy drwy’r modiwl lleoliad gwaith gorfodol.

Yn y drydedd flwyddyn cei:

• arbenigo mewn cynhyrchu gwaith dogfennol, ffilm ffuglennol, cyfryngau arbrofol neu sgriptio, a meithrin sgiliau uwch yn y maes hwn
• astudio meysydd pwnc arbenigol sy’n ymdrin â hanes technoleg, ffilmiau arbrofol, sinema cwlt, teledu a chymdeithas yn yr 20fed ganrif, ac enwogrwydd y sêr
• dechrau prosiect ymchwil annibynnol, a fydd yn arwain at draethawd hir ar dy ddewis bwnc ym maes ffilm a theledu
• manteisio ar gymorth a chyfarwyddyd helaeth pa drywydd bynnag y byddi’n penderfynu ei ddilyn.

Sut gaf i fy nysgu?

Cei dy ddysgu drwy amrywiaeth o ddarlithoedd, seminarau, dangosiadau, arddangosiadau technegol a gwaith prosiect mewn grŵp. Mae’r amrywiaeth hwn yn rhan hanfodol o’n hathroniaeth, ac yn creu amgylchedd dysgu cyffrous a chynhyrchiol heb ei ail.

Sut gaf i fy asesu?

Rydym yn asesu ein myfyrwyr drwy:

• Cynyrchiadau sy’n cael eu dyfeisio mewn grwpiau
• Prosiectau ffilm a fideo unigol
• Dadansoddiadau ymarferol
• Dyddiaduron cynhyrchu a sgriptio creadigol
• Traethodau ac arholiadau ffurfiol
• Dyddlyfrau adfyfyriol, blogiau, Wicis
• Cyflwyniadau mewn seminarau.

Gellid dy asesu hefyd drwy ofyn i ti gyflwyno:

• Byrddau stori
• Sgriptiau ar gyfer ffilmiau
• Cynigion

Galli ddefnyddio’r deunydd hwn i gyd i greu portffolio i’w gyflwyno i ddarpar gyflogwyr.

Mwy o wybodaeth:

Bydd tiwtor personol wedi’i neilltuo i ti drwy gydol dy gwrs gradd, a fydd yn gallu dy helpu ag unrhyw broblemau neu gwestiynau, boed yn academaidd neu’n bersonol. Mae croeso i ti gysylltu â dy diwtor personol unrhyw bryd i gael cymorth a chyngor.

Cei gyfle hefyd i gwblhau Cynllun Datblygu Personol yn Aberystwyth. Proses strwythuredig yw hon o hunanarfarnu, adfyfyrio a chynllunio, lle galli gofnodi dy ddatblygiad personol, academaidd a phroffesiynol gydol dy amser yn y brifysgol. Drwy gofnodi dy berfformiad academaidd, a thynnu sylw at y sgiliau sydd gennyt eisoes a’r rhai y bydd eu hangen arnat er mwyn dy helpu i gael gwaith yn y dyfodol, bydd portffolio’r Cynllun Datblygu Personol yn rhoi i ti’r offer angenrheidiol i gynllunio’n effeithiol, datblygu dulliau astudio llwyddiannus, ac ystyried dy opsiynau a dy ddyheadau ar gyfer dy yrfa yn y dyfodol.

Ers gadael y Brifysgol yn Aberystwyth rydw i nawr yn gweithio ar raglenni plant i gwmni teledu Boomerang yng Nghaerdydd. Roeddwn i wastad wedi bod eisiau gweithio yn y cyfryngau, felly roedd y dewis i astudio ym Mhrifysgol Aberystwyth yn un hawdd. Dros y tair blynedd, bues yn ffodus iawn i ddysgu gan ddarlithwyr profiadol, deallus, a oedd o hyd yn barod i helpu, ac fe gafon ni dipyn o hwyl drwy gydol y cwrs. Cefais gyfle i ddefnyddio amrywiaeth eang o offer modern a oedd yn golygu fod gennyf y gallu a’r ddealltwriaeth i weithio gyda’r offer diweddaraf wrth fynd allan i’r byd mawr i chwilio am waith. Mae Aberystwyth yn sicr yn le hoffus iawn i astudio, ac nid yn unig y mae’r cwrs wedi ei gynllunio mewn ffordd sy’n rhoi’r cyfle i bobl astudio pob agwedd ar fyd teledu, ond mae hefyd yn rhoi’r gallu i’r unigolyn adeiladu’r cwrs mewn modd sy’n caniatáu iddyn nhw ddysgu’r sgiliau priodol sydd o ddiddordeb iddyn nhw. Rhywbeth sydd wedi bod o help mawr i mi yn bersonol ydy’r ffaith fod gan yr Adran yn Aberystwyth gysylltiadau da â chwmni teledu Boomerang, a oedd yn golygu fod nifer o’r myfyrwyr, yn cynnwys fi, wedi cael y cyfle i wneud profiad gwaith gyda’r cwmni, yn enwedig tra roeddynt yn defnyddio stiwdio o fewn ein Adran i recordio rhaglenni. Golygodd hyn i Boomerang gynnig swydd i mi yn syth wedi gadael Aberystwyth. Felly rydw i’n hynod o ddiolchgar i’r Adran, a’r darlithwyr am y cyfleodd y maent wedi’u rhoi i mi. Mi wnes i fwynhau pob eiliad o fy amser yn Aberystwyth, ac mae wir yn lle sy’n cynnig bywyd myfyriwr anhygoel, heb sôn am roi’r profiad a’r ddealltwriaeth sydd angen ar fyfyrwyr i ddechrau ar eu gyrfa. Byddwn yn argymell i unrhyw un sydd â diddordeb yn y maes i ystyried y cwrs yma o ddifri.

Nathan Ifans