BA

Cudd-wybodaeth a Diogelwch Rhyngwladol

BA Cudd-wybodaeth a Diogelwch Rhyngwladol Cod L253 Dewch i Ddiwrnod Agored Dewch i Ddiwrnod Agored

Ymgeisio Nawr

Prif Ffeithiau

L253

  • Tariff UCAS

    128 - 104

  • Hyd y cwrs

    3 blynedd

  • Cyfrwng Cymraeg

    80%

Ar gael ar gyfer Dechrau Medi 2025

Manylion pellach ynglŷn â'r gofynion mynediad

Ymgeisio Nawr

Mewn byd sy’n gynyddol ryng-gysylltiedig a chymhleth, mae gweithredwyr rhyngwladol yn wynebu ystod o heriau diogelwch. Mae’r rhain yn cynnwys gwrthdaro o fewn a rhwng gwladwriaethau, terfysgaeth fyd-eang, bygythiadau seiber, ymlediad arfau niwclear, pandemigau iechyd byd-eang, troseddu traws-wladol, dadleoli poblogaeth, trychinebau naturiol a newid hinsawdd. Bydd y radd hon yn ymwneud â syniadau o feysydd astudiaethau strategol, cudd-wybodaeth a diogelwch er mwyn deall a dadansoddi’r heriau hyn o waha nol bersbectifau, ac ymchwilio i ymatebion dyfeisgar a holistaidd.

Ar radd Cudd-wybodaeth a Diogelwch Rhyngwladol byddwch yn ymchwilio i gymhlethdod casglu ac asesu cudd-wybodaeth cyn ei rhannu ymysg llunwyr penderfyniadau. Byddwch yn ystyried sut mae’r broses hon a’i chynnyrch yn dylanwadu ar ymatebion i fygythiadau diogelwch. Byddwch hefyd yn cael y cyfle i werthuso pwysigrwydd gwybodaeth, cyfrinachedd a gwyliadwraeth (‘surveillance’) wrth ystyried y goblygiadau moesegol a deddfwriaethol sy’n deillio o ymwneud â gweithgareddau cudd-wybodaeth drwy astudiaethau achos hanesyddol.

Trosolwg o'r Cwrs

Rydym yn cynnig ystod eang o fodiwlau ar draws strategaeth, cudd-wybodaeth a diogelwch. Gallwch hefyd gymryd modiwlau ar gysylltiadau rhyngwladol, gan ymgorffori eich gwybodaeth am strategaeth, cudd-wybodaeth a diogelwch yng nghyd-destun ehangach gwleidyddiaeth fyd-eang, ar bynciau megis: sefydliadau rhyngwladol, datblygu, economi wleidyddol, newid yn yr hinsawdd, yn ogystal â gwleidyddiaeth ranbarthol yn Affrica, Ewrop, cyfandiroedd America a'r Dwyrain Canol.

Gallwch gymryd rhan yn ein ‘Gemau Argyfwng’ enwog - ymarferion chwarae rôl dros dri diwrnod sy’n ymdrin ag ymarferion gwleidyddol, economaidd a diplomyddol a fydd yn datblygu’ch sgiliau trafod a chyfathrebu, meddwl yn feirniadol, gweithio’n rhan o dîm, a datrys problemau. Gallwch hefyd cymryd rhan yn ein Cynllun Lleoliadau Seneddol, sy’n gyfle ichi ennill profiad hynod werthfawr ochr yn ochr ag Aelod Seneddol (Tŷ’r Cyffredin, San Steffan) neu Aelod o’r Senedd (Senedd Cymru, Caerdydd) am gyfnod o bedair i chwe wythnos yn ystod yr haf.

Ein Staff

Mae pob un o ddarlithwyr yr Adran Gwleidyddiaeth Ryngwladol yn ymchwilwyr gweithgar ac mae ganddynt gymwysterau hyd at safon PhD, ac mae gan y rhan fwyaf hefyd TUAAU.

Gyrfaoedd

Mae ein graddau’n darparu sylfaen gadarn i amrywiaeth fawr o yrfaoedd ar draws ystod o sectorau, ac mae ein graddedigion yn hyblyg ac yn gallu dibynnu ar set o sgiliau trosglwyddadwy. Mae graddedigion y cwrs hwn wedi cael gwaith ym meysydd: datblygu; gwleidyddiaeth leol a chenedlaethol; y Trydydd Sector; y Gwasanaeth Sifil; a newyddiaduraeth, ymhlith eraill.

Pa gyfleoedd sydd ar gael i mi wrth astudio yn Aberystwyth? 

Mae cyflogadwyedd wedi'i wreiddio yn ein haddysgu. Rydym yn addysgu ein myfyrwyr i anelu am yr yrfa maen nhw'n dymuno ei chael, ac nid y swydd y gallan nhw ei chael.

  • Rydyn ni'n gweithredu cynllun Lleoliadau Seneddol clodfawr, sy'n eich galluogi i gael profiad gwaith gwerthfawr gydag Aelod o Senedd Cymru (Caerdydd) neu Aelod Seneddol (Tŷ'r Cyffredin, San Steffan) am gyfnod o 4-6 wythnos yn ystod yr haf. Yn ystod y cyfnod hwn, byddwch yn llunio adroddiadau ac areithiau, yn cyflawni prosiectau ymchwil, ac yn ymateb i faterion yn yr etholaeth. Mae'n bosib y bydd cyfleoedd pellach i chi gymryd rhan mewn etholiadau a materion rhyngwladol amrywiol.
  • Rydyn ni hefyd yn gartref i Interstate, sef y cyfnodolyn hynaf gan fyfyrwyr ar wleidyddiaeth ryngwladol yng ngwledydd Prydain, sy'n rhoi cyfle unigryw i chi gyhoeddi eich gwaith (sy'n arbennig o fanteisiol os byddwch yn dymuno cyflawni astudiaeth ôl-raddedig) neu i gael profiad gwerthfawr yn gweithio fel rhan o'r tîm golygyddol. Mae cymdeithasau myfyrwyr cyffrous yn meithrin ymdeimlad cryf o gymuned yn yr adran, gan gynnig rhaglen o ddadleuon gwleidyddol, siaradwyr gwadd, cynadleddau a gweithdai, ochr yn ochr â gweithgareddau cymdeithasol niferus fel y ddawns flynyddol.

Pa gyfleoedd sydd ar gael am brofiad gwaith wrth astudio? 

Dysgwch am y gwahanol gyfleoedd sy'n cael eu cynnig gan y Gwasanaeth Gyrfaoedd a sut y gallwch chi wella'ch cyfleoedd cyflogaeth gyda Cynllun Blwyddyn mewn Gwaith (BMG).

Dysgu ac Addysgu

Beth bydda i'n ei ddysgu?

Yn eich blwyddyn gyntaf, cewch eich cyflwyno i'r cysyniadau a'r themâu sy'n ganolog i astudiaeth o wleidyddiaeth ryngwladol, a strategaeth, cudd-wybodaeth a diogelwch.

Yn eich ail flwyddyn, cewch archwilio strategaeth, cudd-wybodaeth a diogelwch ym maes gwleidyddiaeth ryngwladol yn fwy trylwyr:

  • Astudiaethau Cudd-wybodaeth - Mae modiwlau ar astudiaethau cudd-wybodaeth yn archwilio cymhlethdodau o ran sut caiff cudd-wybodaeth ei chasglu a'i hasesu cyn ei rhannu â phenderfynwyr, a byddwch yn archwilio sut mae'r broses hon a'i chynhyrchion yn dylanwadu ar ymatebion i beryglon diogelwch. Byddwch yn cael cyfle hefyd i werthuso pwysigrwydd gwybodaeth, cyfrinachedd, a goruchwyliaeth, gan ystyried y goblygiadau moesegol, moesol a chyfreithiol sy'n codi wrth ymwneud â gweithgarwch cudd-wybodaeth drwy astudiaethau achos hanesyddol.
  • Astudiaethau Strategol - Bydd modiwlau ar astudiaethau strategol yn eich galluogi i leoli penblethau cudd-wybodaeth yn fframwaith y cysyniadau strategol allweddol sy'n siapio ein dealltwriaeth o ryfel a heddwch. Drwy archwilio natur a chymeriad rhyfel byddwch yn dysgu sut mae gwahanol weithredwyr, technoleg, daearyddiaeth ac ideoleg yn cyflawni newid neu'n creu parhad yn y system ryngwladol. 
  • Astudiaethau Diogelwch - Bydd modiwlau ar astudiaethau diogelwch yn eich galluogi i nodi a deall yr amrywiaeth o beryglon, risgiau a heriau i ddiogelwch rhyngwladol, gwladol ac unigol. Mae'r pwyslais ar ddulliau addysgu arloesol, fel gemau strategol a chwarae rôl, yn nodwedd allweddol o'r cynllun hwn. Mae'r gweithgareddau arloesol hyn yn archwilio'r broses o wneud penderfyniadau ac yn datblygu eich sgiliau dadansoddi a datrys problemau.

Yn y flwyddyn olaf, cewch eich cyflwyno i egwyddorion cyffredinol dulliau ymchwil, methodolegau a fframweithiau damcaniaethol i dy alluogi i ymgymryd ag ymchwil annibynnol ac i ysgrifennu eich traethawd estynedig.

Cewch hefyd astudio amrywiaeth o fodiwlau dewisol gan gynnwys pynciau megis Nato, ysbïwyr yn rhyfela, propaganda a chudd-wybodaeth gudd, terfysgaeth a gwrthderfysgaeth.

Gweithgareddau allgyrsiol

Rydym yn eich annog i gymryd rhan yn y Gemau Argyfwng, sef cwrs preswyl a gynhelir yn flynyddol y tu allan i Aberystwyth. Mae'r Gemau Argyfwng wedi canolbwyntio ar argyfyngau dyngarol, proses heddwch Gogledd Iwerddon, uchelgais niwclear Iran, yr etholiad i benodi arlywydd UDA, trychinebau amgylcheddol yn yr Arctig, a'r rhyfel rhwng Rwsia a Georgia.

Bydd y Gemau Argyfwng yn gyfle ichi ddysgu am yr agweddau ar wleidyddiaeth ryngwladol na ellir eu dysgu mewn darlithoedd a seminarau - yn enwedig y cyfyngiadau a wynebir gan arweinyddion gwleidyddol wrth ymateb i wahanol argyfyngau. I lawer o'n myfyrwyr, y Gemau Argyfwng yw pinacl y cwrs.

Sut bydda i'n cael fy addysgu?

Rydym yn cyflwyno'r radd hon drwy gyfrwng darlithoedd a seminarau.

Sut bydda i'n cael fy asesu?

Cewch eich asesu ar ffurf traethodau, adroddiadau, arholiadau, adolygiadau llyfr, logiau dysgu a chyflwyniadau.

Gofynion Mynediad Nodweddiadol

Tariff UCAS 128 - 104

Safon Uwch ABB-BCC

Gofynion TGAU (o leiaf gradd C/4):
Cymraeg neu Saesneg

Diploma Cenedlaethol BTEC:
DDM-MMM

Bagloriaeth Ryngwladol:
30-28

Bagloriaeth Ewropeaidd:
75%-65% overall

Mae'r Brifysgol yn croesawu ceisiadau israddedig gan fyfyrwyr sy'n astudio'r Diploma Mynediad i Addysg Uwch neu gymwysterau lefel T, ar yr amod eu bod yn cyflawni'r canlyniadau perthnasol o ran cynnwys y pwnc a'r dysgu. Ni allwn dderbyn Diplomâu Mynediad i Addysg Uwch na lefelau T fel cymhwyster cyffredinol ar gyfer pob cwrs gradd israddedig.
Mae ein polisi derbyn cynhwysol yn rhoi gwerth ar ehangder yn ogystal â dyfnder yr astudio. Dewisir ymgeiswyr ar sail eu teilyngdod eu hunain a gall cynigion amrywio. Os hoffech wirio a yw eich cymwysterau yn gymwys cyn cyflwyno cais, cysylltwch â'r Swyddfa Derbyn Israddedigion am gyngor ac arweiniad.

Yn ôl i'r brig

|