Y Gyfraith a Chysylltiadau Rhyngwladol

Mae gradd LLB y Gyfraith a Chysylltiadau Rhyngwladol ym Mhrifysgol Aberystwyth yn gwrs cytbwys sy'n cyfuno damcaniaeth ac ymarfer ac mae wedi'i gynllunio i ateb anghenion a disgwyliadau cyflogwyr. Mae elfennau o'r radd yn cael eu cydnabod gan Fwrdd Safonau'r Bar a’r Awdurdod Rheoleiddio Cyfreithwyr - llwybr uniongyrchol i'r proffesiwn cyfreithiol. 

Ar gyfer elfennau Cyfraith y radd, byddwch yn cael eich dysgu yn adran y Gyfraith a Throseddeg, adran a fu’n dysgu graddau yn y Gyfraith ers 1901. Byddwch yn archwilio'r gyfraith, y ffordd mae'r gyfraith yn gweithredu, a'r berthynas rhwng y gyfraith, cyfiawnder a chymdeithas. Yn ogystal ag astudio'r pynciau cyfreithiol sylfaenol, cewch gyfle i deilwra eich gradd yn ôl eich diddordebau eich hun, gan ddewis o blith nifer o fodiwlau ychwanegol sy'n cwmpasu meysydd cyfreithiol cyfoes ac arbenigol. 

Yn ogystal â hyn, byddwch yn gallu cyfoethogi’ch astudiaethau trwy gymryd rhan yn ein Cymdeithas Ymrysona, sy'n cystadlu'n genedlaethol ac yn rhyngwladol, er mwyn datblygu'ch sgiliau allweddol mewn cyfreitha ac eirioli. Hefyd, i fyfyrwyr sy'n dymuno ymrysona trwy gyfrwng y Gymraeg, rydyn ni’n cynnig cystadleuaeth Ymryson trwy’r Gymraeg. 

Ar gyfer yr elfennau Cysylltiadau Rhyngwladol byddwch yn cael eich dysgu yn yr adran Gwleidyddiaeth Ryngwladol. Hon yw adran brifysgol gyntaf y byd ym maes Gwleidyddiaeth Ryngwladol ac fe’i sefydlwyd ym 1919 ar ddiwedd y Rhyfel Byd Cyntaf. Byddwch yn astudio'r cysyniadau, arferion, polisïau, hanesion a rhanbarthau sy'n rhoi ffurf i wleidyddiaeth ryngwladol fel disgyblaeth, ac yn archwilio sut mae'r holl ffactorau hyn yn cael eu trawsnewid yn radical yn yr unfed ganrif ar hugain. 

Ar ben hyn, cewch gyfle i gymryd rhan yn y 'Gemau Argyfwng' cyffrous ac enwog a gynhelir gan yr adran, yn y cynllun nodedig o Leoliadau Seneddol, a chyfle i gyfrannu at y cyfnodolyn gwleidyddiaeth ryngwladol hynaf sy'n cael ei redeg gan fyfyrwyr, 'Interstate'.  

Ein Staff

Mae gan staff Adran y Gyfraith a Throseddeg gan mwyaf naill ai gymwysterau hyd at safon PhD neu mae ganddynt brofiad proffesiynol a chymwysterau fel cyfreithwyr wrth eu gwaith. Mae gan lawer o'r staff hefyd gymhwyster dysgu uwchraddedig (Addysg Uwch).

Mae pob un o ddarlithwyr yr Adran Gwleidyddiaeth Ryngwladol yn ymchwilwyr gweithgar ac mae ganddynt gymwysterau hyd at safon PhD, ac mae gan y rhan fwyaf hefyd TUAAU.

Beth fydda i'n gallu ei wneud gyda gradd yn y Gyfraith a Chysylltiadau Rhyngwladol?

Mae Cyflogadwyedd wedi'i wreiddio yn ein holl gyrsiau. Mae ein

graddau'n darparu sylfaen gadarn i amrywiaeth fawr o yrfaoedd ar draws ystod o sectorau. Mae ein graddedigion yn hyblyg ac yn gallu dibynnu ar set o sgiliau

trosglwyddadwy mewn economi fyd-eang sy'n newid yn gyflym, sy'n sicrhau bod galw mawr amdanynt.

Bydd gradd yn y Gyfraith a Chysylltiadau Rhyngwladol yn agor y

drws ar amrywiaeth o gyfleoedd cyffrous ichi. Bydd y rhan o'r radd sy'n ymwneud â'r Gyfraith yn eich paratoi'n dda ar gyfer astudiaethau pellach i gymhwyso fel bargyfreithiwr neu gyfreithiwr. Mae Cysylltiadau Rhyngwladol yn faes amrywiol sy'n rhoi ichi'r cyfle i archwilio cymhlethdod y berthynas rhwng gwahanol wledydd. Cewch fanteisio ar y ddealltwriaeth hon ar ôl ichi ymuno â'r gweithle.

Byddwch mewn sefyllfa dda i gael gwaith mewn amrywiaeth o

sectorau, gan gynnwys y gyfraith, cysylltiadau rhyngwladol, y gwasanaeth sifil,

ymchwil llywodraethol, cyrff anllywodraethol, gwaith cyfreithiol, troseddeg,

busnes, adnoddau dynol, newyddiaduraeth ac addysg.

Sgiliau trosglwyddadwy

Mae eich dyfodol yn bwysig i ni, a bydd ein cyrsiau gradd yn rhoi'r canlynol ichi:

• yr hyder i ddewis a defnyddio'r ystod fwyaf priodol o fethodolegau cyfreithiol
• y gallu i ysgrifennu ac i gyfathrebu gydag amrywiaeth o gynulleidfaoedd, gan werthuso a threfnu gwybodaeth
• y gallu i gasglu, dosbarthu a dehongli cyfoeth o wybodaeth gyfreithiol yn gyflym ac yn gywir
• y gallu i fynegi syniadau a chyfleu gwybodaeth mewn modd clir a threfnus, yn ysgrifenedig ac ar lafar
• y gallu i drafod cysyniadau mewn grwpiau, rhoi lle i syniadau gwahanol, negodi a dod i gytundeb
• y gallu i weithio'n annibynnol ac yn rhan o dîm
• sgiliau ymchwil
• sgiliau datrys problemau a meddwl creadigol effeithiol
• sgiliau rheoli amser a threfnu, gan gynnwys y gallu i weithio i derfynau amser
• hunanddibyniaeth a'r gallu i ysgogi dy hun.

Pa gyfleoedd am brofiad gwaith fydd ar gael i mi wrth astudio?

Bydd cymryd rhan yn y Cynllun Lleoliadau Seneddol yn gyfle ichi

ddatblygu sgiliau ymarferol megis ysgrifennu adroddiadau ac areithiau, gweithio ar brosiectau ymchwil, ac ymateb i faterion etholaethol.

Mae'n bosib y bydd yr opsiwn i astudio'r modiwl Sgiliau Cyflogadwyedd ar gyfer Gweithwyr Proffesiynol ar gael i chi - modiwl sy'n darparu profiad penodol ac ymarferol yn y gweithle sy'n gwella rhagolygon myfyrwyr i gael eu cyflogi yn eu dewis feysydd yn y dyfodol. Ni ellir sicrhau lle ar y modiwl ar gyfer unrhyw fyfyriwr ac mae’n bosib y cynhelir cyfweliadau er mwyn cynnig lleoedd.

Cyfleoedd eraill

Dysgwch am y gwahanol gyfleoedd y mae Gwasanaeth Gyrfaoedd Prifysgol Aberystwyth yn eu cynnig, gan gynnwys y cyfle i wella'ch cyfleoedd gyrfa gyda GO Wales a'r cynllun Blwyddyn Mewn Gwaith (BMG).