Mathemateg / Busnes a Rheolaeth

O fewn Mathemateg fe ddysgwch ddisgyblaethau hanfodol algebra, calcwlws a dadansoddi mathemategol, tra bydd elfennau Busnes a Rheolaeth y cwrs hwn yn eich galluogi i ddarganfod meysydd strategaeth, marchnata, rheoli gweithrediadau, cyllid, cyfrifeg, rheoli adnoddau dynol a mentergarwch - yn ogystal ag ystod o fodiwlau arloesol ac arbenigol eraill. Mae’r radd wedi'i datblygu ar gyfer myfyrwyr sy’n awyddus i ragori a chyrraedd y lefel uchaf o ran ymarfer rheoli busnes byd-eang.

Pan ddewiswch astudio gyda ni, cewch eich croesawu i amgylchedd lle mae’r staff yn gwneud pob ymdrech i'ch helpu i wireddu’ch potensial llawn.

Pam astudio Mathemateg / Busnes a Rheolaeth ym Mhrifysgol Aberystwyth? 

• Mae Mathemateg yn cael ei dysgu yn Aberystwyth ers 1872, felly mae'r adran yn adeiladu ar sylfaen o dros 140 mlynedd o ragoriaeth dysgu.
• Mae Busnes yn bwnc bywiog a deinamig, lle y gallwch ddatblygu’ch sgiliau proffesiynol i’r lefel orau posib, ac fe gyfunwn eich astudiaethau â phrofiad gwaith a chyfleoedd allgyrsiol ychwanegol.
• Mae'r ddwy adran yn ganolfannau ymchwil gweithredol lle mae’r athrawon ymroddedig yn cyfleu canlyniadau eu hymchwil, sydd o safon fyd-eang, i roi i chi’n uniongyrchol y wybodaeth ddiweddaraf am eu pwnc.
• Mae galw mawr am ein graddedigion ym myd diwydiant, ac mae ein graddedigion yn cael canlyniadau cadarnhaol iawn o ran eu cyflogau.
• Mae sawl modiwl ar gael drwy gyfrwng y Gymraeg; am fwy o fanylion, edrychwch ar y modiwlau sydd ar gael ar y cwrs hwn. 

Ein Staff

Mae’r holl ddarlithwyr yn yr Adran Mathemateg wedi’u cymhwyso i lefel PhD ac yn weithgar ym myd ymchwil. Mae gan y rhan fwyaf gymhwyster addysgu uwchraddedig ac mae’n rhaid i staff newydd gwblhau’r TUAAU. Mae’r adran hefyd yn cyflogi nifer o diwtoriaid rhan-amser, sydd â phrofiad dysgu eang, a rhai arddangoswyr sy’n cael eu dewis o blith ein myfyrwyr israddedig ac uwchraddedig.

Caiff myfyrwyr Ysgol Fusnes Aberystwyth eu dysgu gan ddarlithwyr a staff dysgu eraill sy'n weithgar mewn gwaith ymchwil ac yn ymarferwyr arbenigol yn eu dewis maes. 

Mae gan dros 75% o’r aelodau o staff sy’n dysgu’n llawn amser gymhwyster hyd at lefel PhD. Ar hyn o bryd mae'r rhan fwyaf ohonynt yn weithgar mewn gwaith ymchwil, sy'n golygu bod myfyrwyr yn elwa o gael dysgu gwybodaeth 'newydd' yn eu dewis maes yn ogystal ag astudio testunau cydnabyddedig. Mae'r Ysgol hefyd yn cyflogi staff rhan-amser a llawn amser sydd wedi'u neilltuo ar gyfer dysgu yn unig.  Mae llawer o’r staff rhan-amser yn cyfuno dyletswyddau dysgu gyda gwaith ymgynghori a gweithgareddau busnes, gan sicrhau bod myfyrwyr yn gallu cael gafael nid yn unig ar yr ymchwil ddiweddaraf ond hefyd yr wybodaeth gymhwysol ddiweddaraf.

Beth alla i ei wneud gyda gradd Mathemateg/Busnes a Rheolaeth?

Mae'r cyfuniad hwn o bynciau yn darparu ystod amrywiol o gyflogaeth broffesiynol i raddedigion sy'n cynnwys:

• Dadansoddi ystadegol ac ystadegaeth gyfrifiannol
• Rheoli Gweithredol mewn Mentrau Bach a Chanolig eu Maint ac Amgylcheddau Corfforaethol
• Peirianneg Awyrennol
• Goldman Sachs – Bancio Buddsoddi
• Dadansoddi Risg a gwaith actiwaraidd
• Gwasanaeth Cyhoeddus – Asiantaethau'r Llywodraeth
• Rheoli Manwerthu
• Dysgu

Pa gyfleoedd sydd ar gael i fi ym Mhrifysgol Aberystwyth?

Mae cyflogadwyedd wedi'i wreiddio ar draws ein dysgu a'n tiwtora i sicrhau eich bod yn ymwybodol o sgiliau a chymwyseddau, ac yn eu meithrin trwy gydol eich amser yn astudio gyda ni ac fe gewch ddysgu mwy yma.

Gallwch wella'ch cyfleoedd cyflogaeth gyda GO Wales a’r cynllun Blwyddyn mewn Gwaith (BMG) a reolir gan ein Gwasanaeth Gyrfaoedd.

Ar ôl i chi gwblhau'r radd hon, byddwch wedi meithrin sgiliau yn y meysydd canlynol:

• Sgiliau ymchwil a dadansoddi data
• Gwell sgiliau mathemategol a chyfrifiannol
• Dulliau arloesol o ddatrys problemau yn y byd go iawn
• Sgiliau datrys problemau a meddwl creadigol effeithiol
• Y gallu i weithio'n annibynnol ac yn rhan o dîm
• Sgiliau rheoli amser a threfnu
• Y gallu i gyfathrebu'n glir yn ysgrifenedig ac ar lafar
• Hunanddibyniaeth a'r gallu i’ch ysgogi eich hun.