Mathemateg / Economeg

Fel myfyriwr Mathemateg ac Economeg yn Aberystwyth byddwch yn dysgu disgyblaethau hanfodol algebra, calcwlws, dadansoddi mathemategol ac ystadegaeth. Wrth astudio’r elfen Economeg o’r cwrs hwn fe gewch y cyfle i ddarganfod y materion economaidd sy’n effeithio ar fywyd pob-dydd, gan gynnwys: creu swyddi, pwysau chwyddiant, materion masnach ryngwladol, proses cystadleuaeth mewn busnes, arloesi a thwf, datblygiad gwledydd y trydydd byd, diogelu adnoddau naturiol a llunio polisi llywodraethau, ac yn rhoi i chi sylfaen gadarn mewn Econometreg.

Pam astudio Mathemateg/Economeg ym Mhrifysgol Aberystwyth?

• Mae Mathemateg yn cael ei dysgu yn Aberystwyth ers 1872, felly mae'r adran yn adeiladu ar sylfaen o dros 140 mlynedd o ragoriaeth dysgu.
• Mae Economeg yn bwnc bywiog a deinamig, ac er mwyn sicrhau y cewch y datblygiad proffesiynol gorau posib, cyfunwn eich astudiaethau â phrofiad gwaith a chyfleoedd allgyrsiol ychwanegol.
• Mae'r ddwy adran yn ganolfannau ymchwil gweithredol sydd ag athrawon ymroddedig sy'n rhoi’r wybodaeth ddiweddaraf am eu pwnc i chi, gan ddefnyddio canlyniadau eu gwybodaeth, o safon fyd-eang, yn uniongyrchol yn eu dysgu.
• Mae galw mawr am ein graddedigion ym myd diwydiant, ac mae ein graddedigion yn cael canlyniadau cadarnhaol iawn o ran eu cyflogau.
• Mae sawl modiwl ar gael drwy gyfrwng y Gymraeg; am fwy o fanylion, edrychwch ar y modiwlau sydd ar gael ar y cwrs hwn.

Ein Staff

Mae’r holl ddarlithwyr yn yr Adran Mathemateg wedi’u cymhwyso i lefel PhD ac yn weithgar ym myd ymchwil. Mae gan y rhan fwyaf gymhwyster addysgu uwchraddedig ac mae’n rhaid i staff newydd gwblhau’r TUAAU. Mae’r adran hefyd yn cyflogi nifer o diwtoriaid rhan-amser, sydd â phrofiad dysgu eang, a rhai arddangoswyr sy’n cael eu dewis o blith ein myfyrwyr israddedig ac uwchraddedig.

Caiff myfyrwyr Ysgol Fusnes Aberystwyth eu dysgu gan ddarlithwyr a staff dysgu eraill sy'n weithgar mewn gwaith ymchwil ac yn ymarferwyr arbenigol yn eu dewis maes. 

Mae gan dros 75% o’r aelodau o staff sy’n dysgu’n llawn amser gymhwyster hyd at lefel PhD. Ar hyn o bryd mae'r rhan fwyaf ohonynt yn weithgar mewn gwaith ymchwil, sy'n golygu bod myfyrwyr yn elwa o gael dysgu gwybodaeth 'newydd' yn eu dewis maes yn ogystal ag astudio testunau cydnabyddedig. Mae'r Ysgol hefyd yn cyflogi staff rhan-amser a llawn amser sydd wedi'u neilltuo ar gyfer dysgu yn unig.  Mae llawer o’r staff rhan-amser yn cyfuno dyletswyddau dysgu gyda gwaith ymgynghori a gweithgareddau busnes, gan sicrhau bod myfyrwyr yn gallu cael gafael nid yn unig ar yr ymchwil ddiweddaraf ond hefyd yr wybodaeth gymhwysol ddiweddaraf.

Beth alla i ei wneud gyda gradd Mathemateg / Economeg?

Mae'r cyfuniad hwn o bynciau yn darparu ystod amrywiol o gyflogaeth broffesiynol i raddedigion sy'n cynnwys:

• Dadansoddi ystadegol ac ystadegaeth gyfrifiannol 
• Gwasanaethau Economaidd Llywodraethau 
• Peirianneg Awyrennol 
• Trysorlys ei Fawrhydi 
• Dadansoddi Risg a gwaith actiwaraidd 
• Y Cyngor Prydeinig
• Technoleg gwybodaeth

Pa gyfleoedd profiad gwaith a geir ym Mhrifysgol Aberystwyth?

Mae cyflogadwyedd wedi'i wreiddio ar draws ein dysgu a'n tiwtora i sicrhau eich bod yn ymwybodol o sgiliau a chymwyseddau, ac yn eu meithrin trwy gydol eich amser yn astudio gyda ni ac fe gewch ddysgu mwy yma.

Gallwch wella'ch cyfleoedd cyflogaeth gyda GO Wales a BMG (y cynllun Blwyddyn mewn Gwaith) sy'n cael eu rheoli gan ein hadran Gyrfaoedd. 

Pa sgiliau fydd y radd hon yn eu rhoi i fi?

O astudio am ein gradd mewn Mathemateg / Economeg fe gewch y sgiliau canlynol:

• Deall ymddygiad a strwythur sefydliadau; 
• Gwell sgiliau rhifedd a'r gallu i ymchwilio, dehongli a defnyddio data busnes ac ariannol;
• Dealltwriaeth ddofn o’r hyn sy’n achosi newidiadau economaidd a newidiadau allanol eraill, ac o’u heffeithiau;
• Y gallu i gyfathrebu'n glir yn ysgrifenedig ac ar lafar;
• Datrys problemau’n effeithiol;
• Sgiliau dadansoddi a meddwl yn greadigol;
• Gwneud penderfyniadau;
• Gallu gweithio'n annibynnol ac yn aelod o dîm; 
• Sgiliau rheoli amser a threfnu;
• Hunanddibyniaeth a'r gallu i’ch ysgogi eich hun.