Ieithoedd Modern

Bydd dechreuwyr yn dilyn cwrs dwys yn y flwyddyn gyntaf, sy’n cynnwys modiwl iaith dwys a chyflwyniad cyffredinol i wareiddiad a diwylliant Ewrop. Ar ôl y flwyddyn gyntaf, bydd pob myfyriwr ar y cwrs dechreuwyr yn ymuno â’r myfyrwyr yn y dosbarth lefel uwch. Os ydych yn ymuno â ni ar y lefel uwch, bydd y flwyddyn gyntaf yn mireinio’r sgiliau a ddysgwyd i chi ar eich cwrs Safon Uwch ac yn eich paratoi ar gyfer y tair blynedd nesaf a’r flwyddyn dramor.

Yn ystod y cynllun gradd pedair blynedd, caiff eich gallu ieithyddol ei wella trwy hyfforddiant wythnosol sy’n cwmpasu gwrando, darllen/ysgrifennu, cyfieithu a sgwrsio, yn ogystal â gramadeg, cyfieithu, a ieithyddiaeth. Cewch hefyd ddethol o blith modiwlau dewisol ar ddiwylliant, llenyddiaeth a hanes yn gysylltiedig â’ch dewis ieithoedd.

Eich blwyddyn dramor

Dyma’r uchafbwynt i bob myfyriwr, a bydd yn un o’r profiadau mwyaf cofiadwy a gewch yn eich bywyd. Rydym yn cynnig yr opsiynau canlynol i’n myfyrwyr:

• astudio yn un o’n prifysgolion partner
• astudio mewn ysgol iaith breifat
• gweithio fel Cynorthwyydd Saesneg gyda’r Cyngor Brydeinig
• mynd ar leoliad profiad gwaith mewn gwlad sy’n berthnasol i’ch dewis iaith neu ieithoedd.

Ein Staff

Mae gan bob un o ddarlithwyr yr Adran Ieithoedd Modern gymwysterau hyd at safon PhD ac maent yn gwneud gwaith ymchwil. Rydym hefyd yn cyflogi tiwtoriaid iaith, rhai ohonynt â gradd PhD, a phob un yn addysgwyr profiadol. O bryd i'w gilydd, cyflogwn siaradwyr brodorol o brifysgolion sy'n bartneriaid i ni dramor (lectoriaid), sy'n dod atom â chymeradwyaeth uchel ar sail eu llwyddiant academaidd yn eu prifysgolion eu hunain, ac mae sawl un ohonynt wedi hyfforddi fel addysgwyr. 

Yn ystadegol, mae ieithyddion modern ymhlith y graddedigion mwyaf cyflogadwy, ac mae ein graddau hefyd yn mynd â’n myfyrwyr ar draws y byd. Mae ein graddedigion yn mynd ymlaen i amrywiaeth eang o broffesiynau gan gynnwys dysgu, gweinyddu, rheoli, marchnata a llawer mwy. Mae’r radd hon yn agor y drws i lawer o broffesiynau, fel y

• gwasanaeth sifil
• twristiaeth
• gwaith cymdeithasol
• llyfrgellyddiaeth
• marchnata, cyhoeddi a darlledu.