Seicoleg ac Addysg

Yn ystod y radd hon byddwch yn datblygu dealltwriaeth fwy trylwyr o ddatblygiad gwybyddol a chymdeithasol mewn pobl, o blentyndod ymlaen. Fe gewch gyfle i astudio ac ystyried yr amgylcheddau dysgu lle mae’r datblygiad hwn yn digwydd, yn ogystal ag ymdrin â’r ffordd y mae polisi ac ymarfer addysgol yn ategu’r rhain. 

Ein hethos yw addysgu mewn ffordd sy'n eich galluogi i ddatblygu gwybodaeth gysyniadol a damcaniaethol er mwyn datrys problemau mewn sefyllfaoedd yn y byd go iawn.  Yn ystod y cwrs tair blynedd, byddwch yn trafod ac yn dysgu am ddatblygiad dynol ac am gymhlethdodau’r hyn sy’n gyrru bodau dynol a sut rydym yn llywio’r amgylchedd mewnol ac allanol cymhleth mewn cyd-destun addysgol a chymdeithasol.   

Yn Aberystwyth, rydym yn cynnig amrywiaeth eang o fodiwlau sy'n eich galluogi i drin a thrafod agweddau amrywiol ar Seicoleg a chwnsela.  Gall myfyrwyr ar ein gradd Seicoleg ac Addysg fanteisio ar offer ymchwil cyffrous i ddeall yr ymennydd a gweithgarwch gwybyddol yn ogystal â chyfarpar mesur ymddygiadol.   

Bydd myfyrwyr ar y cwrs hwn yn ymuno ag un o'r adrannau mwyaf yn y brifysgol.  Mae'r Adran yn ymfalchïo yn y gefnogaeth academaidd a bugeiliol o ansawdd uchel a ddarperir dan arweiniad y tîm academaidd i sicrhau eich bod yn llwyddo yn eich astudiaethau ac yn cael y profiad gorau yn y brifysgol.   

Ein Staff

Mae gan ddarlithwyr cyrsiau israddedig yr Ysgol Addysg naill ai gymwysterau hyd at safon PhD neu maent yn ymarferwyr profiadol yn eu maes. Mae gan bob un o'r staff dysgu gymhwyster dysgu cydnabyddedig, neu maent yn gweithio tuag at gymhwyster o'r fath.

Mae holl staff dysgu'r Adran Seicoleg yn gwneud gwaith ymchwil ac mae gan bob un o’r staff parhaol gymwysterau hyd at safon PhD, ac mae gan y rhan fwyaf TUAAU neu maent yn gymrodyr/cymrodyr uwch o'r academi addysg uwch. Mae gan dros hanner y staff hefyd gymhwyster CPsychol, sy'n dynodi safon uchaf y Gymdeithas Seicoleg Brydeinig o ran gwybodaeth ac arbenigedd mewn seicoleg.

Bydd gradd Seicoleg o Brifysgol Aberystwyth yn eich paratoi ar gyfer amrywiaeth o yrfaoedd. Bydd ein gradd BSc Seicoleg ac Addysg yn galluogi graddedigion i ddilyn gyrfa yn y proffesiynau seicolegol craidd gan gynnwys seicoleg glinigol, seicoleg addysg, seicoleg gwnsela, seicoleg iechyd, niwrowyddoniaeth, seicoleg datblygiad ac ymddygiad cymhwysol, ymhlith eraill.  

Rydym wedi ymgorffori cyflogadwyedd ym mhob elfen o’r cwrs hwn, ac mae gennym nifer fawr o gyfleoedd sy'n galluogi myfyrwyr i ddatblygu'r sgiliau trosglwyddadwy sydd eu hangen i adeiladu CV ar gyfer gyrfa bosibl ym maes seicoleg neu faes arall cysylltiedig.   

Mae graddedigion ar ein gradd BSc Seicoleg ac Addysg wedi mynd ymlaen i ddilyn gyrfaoedd ym meysydd seicoleg glinigol a seicoleg addysg, gofal iechyd, adnoddau dynol a marchnata a chysylltiadau cyhoeddus. Bydd eich gradd Seicoleg yn rhoi i chi'r sgiliau mwyaf trosglwyddadwy y mae cyflogwyr yn chwilio amdanynt, gan gynnwys: ymchwil effeithiol a dadansoddi data; datrys problemau’n effeithiol; y gallu i weithio'n annibynnol ac fel rhan o dîm; y gallu i gyfathrebu'n effeithiol ac yn gryno a sgiliau technoleg gwybodaeth.  

Rwy'n caru fy nhiwtoriaid - maen nhw'n anhygoel, yn angerddol am eu meysydd seicoleg penodol ac yn garedig iawn, iawn! Rydw i hefyd yn caru fy adran - newydd, modern a hygyrch! Rydw i'n caru sut gwnaeth y cwrs i mi feddwl yn ddyfnach, edrych ar ddamcaniaethau newydd a meddwl am syniadau newydd. Mae'r cwrs C800 hefyd yn agored iawn i bobl ddwyieithog o wledydd eraill! Maryna Chwaszczewska, yr Adran Seicoleg.

Rydw i wrth fy modd gyda fy nghwrs oherwydd mae'r pynciau rydyn ni'n eu trafod yn ddiddorol ac yn berthnasol i fyd plentyndod. Mae'r darlithwyr yn angerddol iawn am y pwnc, sy'n cael ei adlewyrchu hefyd yn y ffyrdd amrywiol rydyn ni'n cael ein hasesu - cawson ni gyfle i ddylunio ein gêm ein hunain hyd yn oed! Mae hyn gymaint yn fwy ymarferol a realistig wrth weithio gyda phlant yn hytrach nag arholiad sych! Ar y cyfan, mae fy hyder mewn amrywiaeth o bynciau a fy ngalluoedd fy hun wedi cael eu cryfhau, sydd bob amser yn beth da mewn unrhyw yrfa. Byddwn yn sicr yn argymell y cwrs i unrhyw un sydd â diddordeb mewn gweithio gyda phlant, a gallaf eich sicrhau y byddwch yn cael cefnogaeth dda iawn gan staff mewn unrhyw fath o sefyllfa academaidd! Caroline Korell, Ysgol Addysg.