Gwyddor Milfeddygaeth (BVSc)

Mae Ysgol Filfeddygaeth Aberystwyth, ar y cyd â’r Coleg Milfeddygaeth Brenhinol, yn darparu cynllun gradd BVSc Milfeddygaeth. Sefydlwyd Prifysgol Aberystwyth ym 1872, ac ers canrif a mwy bu’n darparu ymchwil arloesol ym meysydd Amaethyddiaeth, a Gwyddorau Anifeiliaid a Biolegol.

Y Coleg Milfeddygaeth Brenhinol, a sefydlwyd ym 1791, yw’r ysgol filfeddygaeth annibynnol fwyaf a’r hynaf ym Mhrydain, ac y mae’n Aelod Sefydliad o Brifysgol Llundain. Yn ôl cynghrair QS o Brifysgolion y Byd, sy’n barnu fesul pwnc, hi yw ysgol filfeddygol flaenaf y byd, 2019.

Bydd y cynllun BVSc Milfeddygaeth ym Mhrifysgol Aberystwyth a’r Coleg Milfeddygaeth Brenhinol, yn cynnig cyfle ichi hyfforddi mewn dau sefydliad blaenllaw.

Addysgu Ymarferol a Chlinigol

Efrydiau Allanol Hwsmonaeth Anifeiliaid (AHEMS)

Ymgymerir ag AHEMS yn ystod tair blynedd gyntaf y rhaglen. Mae lleoliadau AHEMS wedi’u llunio i’ch cynorthwyo i gadarnhau’r hyn a ddysgoch am hwsmonaeth anifeiliaid, i ddatblygu sgiliau trin anifeiliaid, a dysgu am ddiwydiannau anifeiliaid. Rhaid cwblhau 12 wythnos o AHEMS cyn cael mynediad i drydedd flwyddyn y cwrs. Er mwyn cael gwell dealltwriaeth o anghenion y byd milfeddygol yng Nghymru, bydd o leiaf 6 wythnos o’r AHEMS yn cael eu cyflawni yng Nghymru.

Efrydiau Allanol Clinigol (ClinEMS)

ClinEMS yw’r cyfnod a neilltuir i ennill profiad clinigol ymarferol ym mlynyddoedd olaf eich rhaglen filfeddygol, i ategu eich dysgu a’ch profiad clinigol. Trwy gyfrwng ClinEMS byddwch yn ennill profiad mewn amrywiaeth o sefydliadau gwahanol, clinigol a chysylltiedig â milfeddygaeth, lle byddwch yn cadarnhau’r hyn a ddysgoch am ddiagnosis a rheoli clefydau anifeiliaid, yn gwella eich sgiliau clinigol ymarferol, ac yn cael gwell dealltwriaeth o’r ffordd y mae sefydliadau milfeddygol yn gweithredu.

Byddwch yn ymgymryd â lleoliadau ClinEMS ym mlynyddoedd tri, pedwar a phump y rhaglen BVSc, sef cyfanswm o 26 wythnos mewn lleoliadau. Er mwyn cael gwell dealltwriaeth ynglŷn â milfeddygfeydd yng Nghymru, bydd o leiaf 13 wythnos o’r ClinEMS yn cael eu cyflawni yng Nghymru.

Cylchdroeon clinigol o fewn i’r sefydliad

Yn ystod dwy flynedd olaf y cwrs, bydd eich profiad clinigol yn canolbwyntio ar:

• arsylwi, trafod a phrofiad ymarferol o fod yn aelod o’r tîm clinigol yn ysbytai’r Coleg Milfeddygaeth, ac mewn sefydliadau clinigol y mae’r Coleg yn bartner iddynt
• lleoliadau mewn meddygfeydd milfeddygol
• presenoldeb mewn darlithoedd, seminarau a gweithdai
• cwblhau prosiect ymchwil sylweddol

Ein Staff

Mae gan y rhan fwyaf o staff dysgu Adran Gwyddorau Bywyd gymwysterau hyd at safon PhD ac maent yn ymchwilwyr gweithgar. Hefyd, mae gan staff y cyrsiau galwedigaethol gefndir ym myd diwydiant. Mae yn yr Adran nifer fawr o staff sy'n gwneud ymchwil yn unig ac mae'n bosib y bydd y myfyrwyr yn dod i gysylltiad â hwy.

Trefnir yr addysgu yn ‘ffrydiau’. Dychwelir at y ffrydiau hyn yn aml, gan ganolbwyntio i ddechrau ar yr anifail iach, a symud ymlaen trwy glefydau gwahanol systemau, a sut i’w harchwilio a’u trin. Bydd hefyd ffrydiau sy’n canolbwyntio ar yr wyddoniaeth sylfaenol ac effaith clefydau anifeiliaid ar iechyd y cyhoedd.

Yn y ddwy flynedd gyntaf byddwch yn treulio eich amser ym Mhrifysgol Aberystwyth, yn astudio bioleg sy’n sail i filfeddygaeth, yn meithrin sgiliau sylfaenol wrth drin anifeiliaid fferm, ceffylau, ac anifeiliaid anwes, yn ogystal â datblygu eich dawn gyfathrebu, datrys problemau a gweithio mewn tîm. Mae gan Brifysgol Aberystwyth hanes hir o ddarparu addysgu ac ymchwil ar iechyd anifeiliaid ac mae’n ymrwymedig i ragoriaeth addysgiadol.

Ym mlwyddyn tri byddwch yn astudio ar Gampws Hawkshead y Coleg Milfeddygaeth Brenhinol, lle byddwch yn ennill yr wybodaeth a’r sgiliau ymarferol uwch mewn gwyddor glinigol sy’n angenrheidiol er mwyn gallu cymryd rhan gyflawn mewn ymarfer clinigol yn y Coleg Milfeddygaeth, mewn meddygfeydd cydweithredol, ac mewn milfeddygfeydd preifat ym mlynyddoedd pedwar a phump. Ar ben hyn, byddwch yn dod yn ôl i Brifysgol Aberystwyth ym mlynyddoedd pedwar a phump i gael cylchdroeon o hyfforddiant clinigol arbenigol am gyfnod cyfyngedig.

Mae gan y Coleg Milfeddygaeth dair adran academaidd a chlinigol eithriadol. Mae’r darlithwyr ymhob adran ym Mhrifysgol Aberystwyth a’r Coleg Milfeddygol nid yn unig yn ymchwilwyr a chlinigwyr ar lwyfan byd-eang sy’n llwyr ymroddedig i’w meysydd; y maent hefyd yn weithwyr proffesiynol arbennig o gymwysedig. Ym Mhrifysgol Aberystwyth, bydd myfyrwyr yn elwa o ddefnyddio ffermydd eang y Brifysgol, canolfan geffylau Lluest a chyfleusterau addysgu eraill.

Y ffrydiau sy’n sail i’r addysgu yw:

O’r flwyddyn gyntaf i’r drydedd:

• Egwyddorion Gwyddoniaeth
• Symudiadau (Locomotor)
• Cardiofasgwlaidd a resbiradol
• Troethgenhedlol: arennol
• Troethgenhedlol: atgenhedlu
• Y system ymborthol
• Niwroleg a synhwyrau arbennig
• Lymfforeticwlaidd a gwaedfagol
• Croen
• Meddyginiaeth poblogaeth ac iechyd cyhoeddus milfeddygol (PMVPH)
• Meddyginiaeth ar sail ysgolheictod.

Yn ystod y bedwaredd a’r bumed flwyddyn:

Mae mwyafrif yr addysgu yn ystod pedwaredd a phumed flwyddyn y rhaglen ar ffurf cylchdroeon clinigol, lle byddwch yn gweithio mewn grwpiau bach mewn amrywiaeth o amgylcheddau clinigol.

Bydd myfyrwyr yn cymryd rhan mewn cylchdroeon o fewn i’r sefydliad a lleoliadau ClinEMS ar draws rhywogaethau a disgyblaethau. Byddant hefyd yn ymgymryd â phrosiect ymchwil o'u dewis

Gallwch weld manyleb y rhaglen yma. 

Mae Coleg Brenhinol y Milfeddygon yn sicrhau ansawdd graddau milfeddygaeth y Deyrnas Gyfunol (DG) er mwyn gwneud yn sicr bod llawfeddygon milfeddygol yn gymwys i’r gwaith wrth raddio, ac yn ymuno â Chofrestr y Coleg (RCVS).

Dim ond unigolion sydd wedi’u cofrestru gyda’r Coleg sydd â’r hawl i’w galw eu hunain yn llawfeddygon milfeddygol a, gyda rhai eithriadau, i weithio mewn llawfeddygaeth filfeddygol yn y DG. Mae’r Coleg Milfeddygaeth, Prifysgol Aberystwyth a Choleg y Milfeddygon yn cydweithio’n agos i sicrhau bod y cwrs BVSc yn cwrdd â’r safonau angenrheidiol, fel y gall Coleg y Milfeddygon roi achrediad cyflawn iddo yn 2026 pryd y bydd y myfyrwyr cyntaf yn graddio.

Mae graddedigion yn datblygu gwybodaeth wyddonol ddofn y gellir ei chymhwyso i nifer o lwybrau gyrfa, gan gynnwys milfeddygfeydd clinigol cymysg, milfeddygfeydd ceffylau, milfeddygfeydd fferm/da byw, ymchwil filfeddygol, iechyd cyhoeddus a pholisi milfeddygol, y diwydiant fferyllol, diogelwch bwyd a diogelu meddyginiaethau. Yn ogystal â hyn, ar ôl hyfforddi yn rhannol yng Nghymru trwy gydol y cwrs gradd, bydd graddedigion yn hynod addas i barhau â’u gyrfa mewn milfeddygfeydd a sefydliadau a chyda cyflogwyr milfeddygol eraill yng Nghymru.

Mae gwybodaeth gyflawn am ein Gofynion Mynediad i’w gweld ar dudalennau gwe’r Ysgol Filfeddygol. Cliciwch yma i gael gwybod mwy.

Mae gwybodaeth gyflawn am ein gofynion iaith Saesneg i’w gweld ar dudalennau gwe’r Ysgol Filfeddygol. Cliciwch yma i gael gwybod mwy.

Mae rhagor o wybodaeth am sut i wneud cais ar gael yn ein Cwestiynau Cyffredin.

Profiad Gwaith

Er mwyn gwneud cais am y BVSc bydd angen ichi fod wedi cael profiad gwaith er mwyn bod wedi datblygu sgiliau trin anifeiliaid a chael dealltwriaeth dda am waith milfeddygon. Cyn gwneud cais, rhaid bod wedi cyflawni’r gofynion canlynol o leiaf:

• Cyfanswm o 70 awr (e.e. ⁠10 diwrnod gwaith llawn) o brofiad gwaith (cyflogedig neu wirfoddol) mewn un neu fwy o filfeddygfeydd
• Cyfanswm o 70 awr mewn un neu fwy o leoliadau gwaith anghlinigol gydag anifeiliaid byw (ni chyfrifir y cartref/busnes teuluol/perchen ar anifail anwes), ac o leiaf 35 ohonynt gydag anifeiliaid mawr (ni chyfrifir marchogaeth na fferm deuluol/perchen ar geffyl).

Rhaid i'r cyfuniad 140 awr gael eu cyflawni o fewn y cyfnod 18 mis yn union cyn y dyddiad cau i wneud y cais. Croesewir profiad cynharach ond ni fydd yn cyfrif tuag at yr amod 140 awr.

Cyfweliadau

Rhaid i bob ymgeisydd i’r cwrs ddod i gyfweliad os cânt eu gwahodd, ac ni fyddant yn cael cynnig heb iddynt ddod i gyfweliad. Cynhelir y cyfweliadau ym Mhrifysgol Aberystwyth; rhoddir manylion y dyddiadau maes o law.

Ar adeg y cyfweliad, bydd angen i'r ymgeiswyr ddod â'u pasbort (mewn rhai achosion bydd ddogfen adnabod ddilys arall ac arni ffoto yn dderbyniol), tystysgrifau gwreiddiol eu canlyniadau TGAU ac (os ydynt wedi'u cwblhau) Safon Uwch, neu gymwysterau cyfwerth, a llythyrau geirda ar gyfer yr holl ofynion profiad gwaith a nodir uchod.