Swoleg

Mae’r cwrs pedair blynedd hwn yn cynnwys blwyddyn sylfaen integredig, wedi'r flwyddyn honno mae'r cwrs yr un fath a'r cwrs tair blynedd safonol, BSc Swoleg (C300).

Pam astudio Swoleg ym Mhrifysgol Aberystwyth?

Mae ein cwrs:

• yn darparu sylfaen gadarn o sgiliau a gwybodaeth yn y biowyddorau a fydd yn amhrisiadwy i chi ym maes swoleg a thu hwnt
• wedi'i achredu gan y Gymdeithas Fioleg Frenhinol i gydnabod ei ansawdd
• yn cynnwys ystod eang o opsiynau modiwl arbenigol fel y gallwch ddilyn eich diddordebau mewn meysydd fel ymddygiad anifeiliaid, bioleg y môr a dŵr croyw, parasitoleg a chadwraeth bywyd gwyllt
• yn cynnwys amrywiaeth o gyrsiau maes preswyl dewisol sy'n caniatáu i chi ymgolli yn eich gwaith astudio a chymryd rhan mewn gwaith prosiect mewn grwpiau bach
• yn cael ei addysgu gan staff gwybodus y mae eu hymchwil ym maes swoleg yn llywio eu haddysgu
• yn cynnwys prosiect ymchwil annibynnol sylweddol yn eich blwyddyn olaf, lle byddwch yn elwa o arolygiaeth academaidd un-wrth-un
• yn addas iawn i fyfyrwyr sy'n dymuno gwella eu cyflogadwyedd mewn meysydd fel cadwraeth anifeiliaid neu ymchwil wyddonol, ond mae hefyd yn datblygu sgiliau y mae galw amdanynt mewn ystod eang o broffesiynau eraill i raddedigion.

Cyfleoedd!

• Mae ein myfyrwyr yn elwa o gytundebau cyfnewid rhyngwladol gyda phrifysgolion yn Ewrop, Gogledd America, Asia ac Awstralia, felly gallwch wneud cais i dreulio eich ail flwyddyn, neu ran ohoni, yn astudio Swoleg dramor.
• Gallwch ddewis astudio nifer o fodiwlau trwy gyfrwng y Gymraeg. Edrychwch ar y tab modiwlau am fwy o wybodaeth.

Mae gan Aberystwyth gyfleusterau ardderchog ar gyfer swolegwyr, gan gynnwys:

• acwariwm modern lle cedwir rhywogaethau dŵr oer a throfannol, morol a dŵr croyw.
• amrywiaeth o anifeiliaid dof bach a mawr ar gael i chi at ddibenion ymchwil swoleg drwy ein ffermydd, ein canolfan geffylau a’n canolfan addysg filfeddygol.
• mynediad at goetir helaeth ger ein campws gyda blychau nythu pwrpasol sydd o gymorth wrth astudio adar a bywyd gwyllt arall.
• cynefinoedd gwyllt a phrydferth ar garreg ein drws, gan gynnwys cynefinoedd morol, gweundiroedd, mynyddoedd, glaswelltir a choedwigoedd, sy’n cynnig amrywiaeth aruthrol o gyfleoedd ar gyfer gwaith maes a hamddena.
• cyfleoedd i weld rhywogaethau anifeiliaid cyffredin a phrin ym Mhrydain megis dolffiniaid trwyn potel, morloi llwyd yr Iwerydd, y bele, dyfrgwn, gweilch y pysgod a barcudiaid coch.
• casgliad helaeth o sbesimenau swolegol yn ein hamgueddfa.

Addysgu dan arweiniad ymchwil

• Cewch eich addysgu gan dîm angerddol o swolegwyr sydd hefyd yn wyddonwyr sy’n weithgar ym maes ymchwil. Mae eu hymchwil yn sail i’n haddysgu, ac yn darparu cyfleoedd rhagorol ar gyfer y prosiect ymchwil y byddwch yn ymgymryd ag ef yn eich blwyddyn olaf. Mae ein darlithwyr Swoleg hefyd yn athrawon brwdfrydig ac arloesol!

Ein Staff

Mae gan y rhan fwyaf o staff dysgu Adran Gwyddorau Bywyd gymwysterau hyd at safon PhD ac maent yn ymchwilwyr gweithgar. Hefyd, mae gan staff y cyrsiau galwedigaethol gefndir ym myd diwydiant. Mae yn yr Adran nifer fawr o staff sy'n gwneud ymchwil yn unig ac mae'n bosib y bydd y myfyrwyr yn dod i gysylltiad â hwy.

Beth ydw i'n ei ennill o astudio BSc Swoleg?

Mae graddedigion BSc Swoleg o Brifysgol Aberystwyth:

• yn wyddonwyr bywyd medrus, gyda gwybodaeth ddamcaniaethol ac ymarferol gref ynghylch Swoleg
• yn meddu ar ddealltwriaeth uniongyrchol o ymchwil ym maes swoleg o ganlyniad i'w prosiectau ymchwil yn ystod eu blwyddyn olaf, a phwyslais ein gradd ar addysgu a arweinir gan ymchwil
• yn meddu ar brofiad rhyngwladol o bosib, os ydynt yn cymryd rhan mewn cynllun cyfnewid academaidd
• yn feddylwyr beirniadol hyderus a chraff, sy'n gallu gweithio'n annibynnol ac yn rhan o dîm
• yn meddu ar sgiliau gwyddonol a dadansoddi data cryf sy'n ddymunol ym maes swoleg a thu hwnt
• yn aelodau o gymuned gefnogol o swolegwyr ddoe a heddiw Prifysgol Aberystwyth
• yn ennill blwyddyn o aelodaeth gyda'r Gymdeithas Fioleg Frenhinol ar ôl graddio i'w helpu i sefydlu eu gyrfaoedd.

Ym mha feysydd mae ein myfyrwyr yn mynd i weithio?

Mae ein graddedigion yn meddu ar sgiliau y mae galw amdanynt mewn ystod eang o yrfaoedd ym maes swoleg a thu hwnt. Maent wedi:

• ymgymryd ag astudiaethau uwchraddedig ar lefel Meistr neu PhD, a chael gyrfaoedd fel ymchwilwyr ym maes Swoleg
• gweithio ym maes ymgynghoriaeth ecolegol, gwneud ffilmiau bywyd gwyllt, gofalu am anifeiliaid sw a mwy
• sefydlu gyrfaoedd ym maes cyfathrebu gwyddonol, addysg amgylcheddol ac addysgu 
• ymgymryd â rolau gwyddonol y tu hwnt i faes swoleg oherwydd eu sylfaen eang o sgiliau gwyddonol trosglwyddadwy.

Mae ein gradd Swoleg hefyd yn addas ar gyfer cael mynediad at amrywiaeth o raglenni hyfforddi i raddedigion.

Pa gyfleoedd profiad gwaith sydd ar gael i mi wrth i mi astudio? 

Yn ystod eu hastudiaethau, mae ein myfyrwyr wedi gwirfoddoli i sefydliadau fel yr RSPB. Mae llawer hefyd wedi gwirfoddoli mewn sw, neu fel cynorthwywyr ymchwil gwirfoddol ar ein prosiectau ymchwil gwyddonol.

Dysgwch am y gwahanol gyfleoedd sy'n cael eu cynnig gan y Gwasanaeth Gyrfaoedd a sut y gallwch chi wella'ch cyfleoedd cyflogaeth gyda Cynllun Blwyddyn mewn Gwaith (BMG).