Cyfrifiadureg Uwch (gyda lleoliad diwydiannol integredig)

Rhaglen amser llawn 17 mis yw hon, ond mae'n dechrau ym mis Ionawr yn hytrach na mis Medi. Byddwch yn gwneud lleoliad diwydiannol yn ystod misoedd yr haf, ar ôl y semester cyntaf. Mae'r elfen o'r cwrs hwn a gyflwynir trwy gwrs yn union yr un fath â’r cwrs MSc Cyfrifiadureg Uwch (G493). 

Mae'r cwrs yn ehangu eich profiad o'r offer, y dulliau a'r technegau a ddefnyddir gan beirianwyr meddalwedd proffesiynol, ac yn canolbwyntio ar gymhwyso peirianneg meddalwedd uwch, a’ch paratoi am swyddi cyfrifol yn y diwydiant meddalwedd. Beth bynnag yw eich profiad blaenorol neu eich dyheadau ar gyfer y dyfodol, ar y cwrs hwn byddwch yn elwa ar gyfuno damcaniaeth arloesol a chymwysiadau ymarferol mewn adran o'r radd flaenaf. 

Mae pynciau prosiect MSc diweddar yn cynnwys dysgu peirianyddol ar gyfer y rhyngrwyd pethau, cymwysiadau realiti estynedig ar gyfer twristiaeth, dadansoddi a rheoli data allyriadau amaethyddol, canfod ymyrraeth rhwydwaith a rheoli'r gadwyn gyflenwi. 

Mae'r cwrs yn dechrau ym mis Ionawr ac yn para 17 mis.  

Bydd y lleoliad diwydiannol yn cael ei gynnal yn ystod yr haf. 

Mae ein graddau Meistr trwy gwrs wedi'u cynllunio i ateb anghenion myfyrwyr sy'n awyddus i ehangu eu sgiliau er mwyn cyflymu eu gyrfa ddiwydiannol neu'r rhai sy'n chwilio am sylfaen i yrfa mewn ymchwil. Mae cyfleoedd gwaith i wyddonwyr cyfrifiadurol yn eang, ac yn cynnwys ymgynghorwyr TG a darparwyr gwasanaethau TG, sectorau awyrofod ac amddiffyn, gwasanaethau amaethyddol ac ariannol, telathrebu, gofal iechyd, gweithgynhyrchu, manwerthu, y sector cyhoeddus, a'r trydydd sector. Mae graddedigion hefyd yn sefydlu eu cwmnïau eu hunain, gan ddarparu gwasanaethau dylunio gwefannau ac ymgynghori. 

Gall Gwasanaeth Gyrfaoedd y Brifysgol roi cyngor ar gyfleoedd cyflogaeth, sefydlu eich busnes eich hun, a gweithio'n llawrydd. 

Sut y byddaf yn cael fy nysgu? 

Byddwch yn sefydlu ystod eang o sgiliau hanfodol trwy nifer o fodiwlau craidd, ac yn cyfarwyddo eich astudiaeth eich hun trwy ddewis o blith amrywiaeth o fodiwlau arbenigol. Byddwch hefyd yn ennill profiad gwerthfawr yn gweithio mewn diwydiant ac yn cymhwyso'r hyn rydych chi wedi ei ddysgu yn y Prosiect unigol.

Beth fydda i'n ei ddysgu?  

Yn ystod y ddau semester cyntaf byddwch yn ymgymryd â nifer o fodiwlau craidd a dewisol. Cyflwynir y modiwlau trwy ddarlithoedd, dosbarthiadau problem, seminarau, gweithdai, prosiectau grŵp ac unigol, a chyfres o ddarlithwyr gwadd. Mae'r rhaglen yn rhoi cyfleoedd i fyfyrwyr ddatblygu a dangos gwybodaeth a dealltwriaeth, sgiliau, rhinweddau a phriodoleddau eraill yn y meysydd canlynol: 

• Dealltwriaeth gynhwysfawr o’r egwyddorion dylunio a ddefnyddir mewn systemau meddalwedd i ateb gofynion diogelwch, perfformiad, dibynadwyedd ac ansawdd y gwasanaeth. 
• Ymwybyddiaeth feirniadol o arfer cyfredol, cyfleoedd a chyfyngiadau sy'n ymwneud â pheirianneg meddalwedd uwch. 
• Gwybodaeth am y materion cyfreithiol, cymdeithasol, moesegol a phroffesiynol sy'n berthnasol i ddatblygu a darparu meddalwedd. 
• Dealltwriaeth o safonau, arferion gorau a materion cyfreithiol pwysig sy'n rheoli’r gwaith o adeiladu, gweithredu a defnyddio systemau meddalwedd. 
• Gwybodaeth am fframweithiau, offer a thechnegau pensaernïol pwysig er mwyn datblygu systemau meddalwedd cymhleth. 
• Ymwybyddiaeth feirniadol o broblemau cyfredol a/neu ddatblygiadau diweddar yn y ddisgyblaeth. 
• Gwybodaeth am nifer o ddulliau datblygu y gellid eu defnyddio wrth ddatblygu systemau cymhleth. 

Sut y byddaf yn cael fy asesu?  

Mae'r dulliau asesu yn cynnwys cymysgedd o aseiniadau ysgrifenedig, aseiniadau rhaglennu, portffolio ymarferol, arholiadau ymarferol, cyflwyniadau llafar, ac arholiadau ysgrifenedig. Bydd cyflwyno eich Prosiect MSc yn llwyddiannus yn semester 3 yn arwain at ddyfarnu'r MSc.