Bioleg y Môr a Dŵr Croyw (gyda blwyddyn integredig mewn diwydiant)

Ar y cwrs hwn byddwch yn datblygu sgiliau ymarferol yn y technegau samplu a ddefnyddir yn yr amgylchedd dyfrol, sgiliau dadansoddi beirniadol ar ddata a thestunau academaidd, a sut mae cyflwyno eich canfyddiadau i amrywiaeth o randdeiliaid. Bydd hyn yn sicrhau eich bod wedi'ch paratoi'n dda ar gyfer swyddi proffesiynol sy'n ceisio deall a mynd i'r afael â'r heriau amrywiol sy'n wynebu organebau ac ecosystemau yn y moroedd ac mewn dŵr croyw.  

I gefnogi'ch dysgu, bydd dau long ymchwil ar gael i chi eu defnyddio, a fydd yn rhoi’r cyfle i chi gael profiad ymarferol go iawn o'r technegau samplu a ddefnyddir gan fiolegwyr y môr a dŵr croyw proffesiynol, yn ogystal â’n systemau acwariwm ar gyfer astudiaethau arbrofol ar organebau morol a dŵr croyw.  

Mae gwaith maes a dosbarthiadau ymarferol yn rhan annatod o'r cwrs trwy gydol eich astudiaethau. Bydd opsiwn i fynd ar gwrs maes mewn dwy ganolfan breswyl yn eich blwyddyn olaf, sydd ym Mhortiwgal a'r Alban ar hyn o bryd, a fydd yn rhoi cyfle i chi ymgolli yn eich astudiaethau bioleg y môr a dŵr croyw ymhellach i ffwrdd.  

Mae’r elfen a ddysgir o’r radd Bioleg y Môr a Dŵr Croyw (gyda blwyddyn integredig mewn diwydiant) (C166) yn union yr un peth â’r cwrs cyfatebol tair-blynedd, Bioleg y Mor a Dŵr Croyw (C164). Byddwch yn gwneud eich blwyddyn mewn diwydiant yn eich trydedd flwyddyn, ym Mhrydain neu dramor. Byddwch yn cael arolygaeth ac asesiadau ac fe fydd yn cyfrif tuag at ddosbarth eich gradd. Yn ystod eich blwyddyn mewn diwydiant fe fyddwch yn talu ffi ddysgu lai.  

Mae'r cwrs hwn wedi'i achredu gan y Gymdeithas Fioleg Frenhinol.  

Ein Staff

Mae gan y rhan fwyaf o staff dysgu Adran Gwyddorau Bywyd gymwysterau hyd at safon PhD ac maent yn ymchwilwyr gweithgar. Hefyd, mae gan staff y cyrsiau galwedigaethol gefndir ym myd diwydiant. Mae yn yr Adran nifer fawr o staff sy'n gwneud ymchwil yn unig ac mae'n bosib y bydd y myfyrwyr yn dod i gysylltiad â hwy.

Mae gan raddedigion Bioleg y Môr a Dŵr Croyw y sgiliau a'r wybodaeth i ddilyn ystod eang o yrfaoedd gan gynnwys ymgynghori ecolegol, rheoli amgylcheddol a chadwraeth, dysgu, a newyddiaduraeth wyddonol. Byddwch hefyd wedi’ch paratoi’n drylwyr ar gyfer gyrfa ymchwil wyddonol, gan barhau ag astudiaethau uwchraddedig ar lefel Meistr neu PhD.  

Ar ôl cwblhau blwyddyn mewn diwydiant byddwch yn gallu:  

• defnyddio’r hyn a ddysgwch ar eich cwrs ym myd gwaith  
• gwneud cysylltiadau gwerthfawr yn y diwydiant  
• datblygu sgiliau ymarferol sy'n gysylltiedig â'ch maes astudio  
• cyfoethogi blwyddyn olaf eich astudiaethau am eich bod yn sylweddoli’n well sut i’w chymhwyso i'ch gyrfa  
• cyfoethogi eich CV yn sylweddol a chynyddu eich rhagolygon o lwyddiant yn y farchnad swyddi.  

Sylwch nad yw lleoliadau gwaith ar gael yn awtomatig i bob ymgeisydd. Byddwch yn gyfrifol am sicrhau eich lleoliad profiad gwaith eich hun, gyda chefnogaeth ein Cydlynydd Blwyddyn mewn Diwydiant a’r cynghorydd gyrfaoedd i gynyddu eich siawns o lwyddo. Os nad ydych yn llwyddo i sicrhau profiad gwaith, byddwch yn gallu trosi eich cwrs i fersiwn tair blynedd y radd BSc Bioleg y Mor a Dŵr Croyw (C164).