Bioleg y Môr a Dŵr Croyw

Beth fydda i’n ei ddysgu? 

Yn y flwyddyn gyntaf, mewn dosbarthiadau damcaniaethol ac ymarferol, byddwch yn edrych ar yr amrywiaeth anhygoel o fywyd ar y Ddaear a'r moleciwlau allweddol sy'n ffurfio popeth byw. Byddwch yn astudio ffisioleg anifeiliaid gan ddefnyddio enghreifftiau o infertebratau a fertebratau ac yn craffu ar amrywiaeth eang bywyd microbaidd. Fe edrychwch ar ecoleg a bioleg planhigion ac yn ystyried heriau'r dyfodol, megis sut mae ymateb i newid hinsawdd byd-eang a gwarchod bioamrywiaeth. Byddwch yn datblygu’ch sgiliau ymarferol yn y maes a’r labordy, ac yn magu hyder wrth gasglu a dadansoddi data gwyddonol.  

Yn yr ail flwyddyn, byddwch yn canolbwyntio ar fioleg ac ecosystemau morol a dŵr croyw ac yn cael cyflwyniad i amrywiaeth yr algâu a’r angiosbermau dyfrol sy'n byw mewn amrywiaeth o gynefinoedd dyfrol. Byddwch yn ystyried cadwraeth ddyfrol gymhwysol ac yn meithrin profiad ymarferol o'r technegau a ddefnyddir i fonitro, cadw ac ymgymryd ag ymchwil mewn amgylcheddau dŵr bas.  

Yn y trydedd flwyddyn, byddwch yn meithrin dealltwriaeth am agweddau sylfaenol a chymhwysol ar fioleg cadwraeth pysgod, a’r rhan a chwaraeir gan bysgota detholus, dyframaeth a chadwraeth yn neinameg a chynaliadwyedd poblogaethau pysgod.  

Yn eich blwyddyn olaf fe gewch brofiad ymarferol wrth roi ar waith ystod o dechnegau addas ar gyfer rheoli’r amgylchedd a chynnal archwiliadau biolegol ac amgylcheddol, yn rhai traddodiadol a newydd, a hynny yn y maes a’r labordy. Byddwch yn meithrin sgiliau ysgrifennu newyddiaduraeth wyddonol a chyflwyno mewn cynadleddau. Byddwch hefyd yn gwneud prosiect ymchwil ar lefel Meistr gyda chymorth arolygydd traethawd hir, a allai fod yn rhan o un o sawl grŵp ymchwil arloesol.  

Drwy gydol y cwrs bydd yr amrywiaeth o fodiwlau dewisol yn eich galluogi i deilwra’ch cwrs i gyd-fynd â'ch diddordebau chi.  

Sut bydda i'n cael fy addysgu? 

Bydd ein cwrs yn cael ei gyflwyno drwy ddarlithoedd, tiwtorialau, gwaith maes, ymarferion a chyrsiau maes preswyl. Byddwch yn cael hyfforddiant trwyadl mewn cysyniadau a dulliau gwyddonol sy'n gysylltiedig ag esblygiad ac ecoleg systemau naturiol, gyda phwyslais ar amgylcheddau morol a dŵr croyw.  

Asesiad 

Byddwch yn cael eich asesu drwy draethodau, gwaith ymarferol, cyflwyniadau llafar, taflenni gwaith, adroddiadau, ymarferion ystadegol, coflenni, posteri, portffolios, wicis, dyddiaduron myfyriol, adolygiadau llenyddiaeth, erthyglau cylchgrawn, llyfrau nodiadau maes ac arholiadau.  

Tiwtor Personol 

Bydd tiwtor personol yn cael ei neilltuo i chi, a’r person hwn fydd eich prif gyswllt trwy gydol eich astudiaethau. Bydd eich tiwtor personol yno i’ch helpu i ymgartrefu pan fyddwch yn cyrraedd gyntaf, a bydd wrth law i’ch helpu gyda materion academaidd neu faterion personol.